ചന്ദ്രശേഖരൻ പിള്ള വധക്കേസിലെ പ്രതി ഒടുവിൽ പൊലീസിന്റെ വലയിൽ. മദ്യലഹരിയിൽ സഹോദരി ഭർത്താവിനെ വെട്ടിക്കൊലപ്പെടുത്തിയ ശേഷം മുങ്ങിയ മോഹനൻ പിള്ളയെ പൊക്കിയത് കോട്ടയത്തുനിന്ന്

കോഴിക്കോട്: നാൽപ്പത് വർഷം മുമ്പ് നടന്ന ക്രൂരമായ കൊലപാതകക്കേസിലെ പ്രതിയെ പൂച്ചാക്കൽ പൊലീസ് നാടകീയമായി അറസ്റ്റ് ചെയ്തു.

വെളിയം പടിഞ്ഞാറ്റിൻകര സ്വദേശി ചന്ദ്രശേഖരൻ പിള്ളയെ വെട്ടിക്കൊലപ്പെടുത്തിയ ശേഷം ഒളിവിൽ പോയ പ്രതി മോഹനൻ പിള്ളയാണ് പതിറ്റാണ്ടുകൾക്ക് ശേഷം പൊലീസ് പിടിയിലാകുന്നത്. 

ദീർഘകാലമായി പോലീസിനെ വെട്ടിച്ച് മറ്റ് ജില്ലകളിൽ ഒളിവിൽ കഴിഞ്ഞിരുന്ന പ്രതിയെ അതീവ രഹസ്യമായ നീക്കത്തിലൂടെയാണ് അന്വേഷണസംഘം കുടുക്കിയത്.

1987 ജനുവരി 11-ന് വൈകിട്ട് ആറിനായിരുന്നു നാടിനെ നടുക്കിയ കൊലപാതകം നടന്നത്. കൃത്യം നടക്കുമ്പോൾ വെറും 25 വയസ്സ് മാത്രമുണ്ടായിരുന്ന വെളിയം പടിഞ്ഞാറ്റിൻകര കോടിയാട്ട് വീട്ടിൽ മോഹനൻ പിള്ള, സഹോദരിയുടെ ഭർത്താവായ ചന്ദ്രശേഖരൻ പിള്ളയുമായി വീട്ടിൽ വെച്ച് തർക്കത്തിലാവുകയായിരുന്നു. 

കടുത്ത മദ്യലഹരിയിൽ വീട്ടിലെത്തി ബഹളമുണ്ടാക്കിയ മോഹനൻ പിള്ള, വാക്കേറ്റത്തിനൊടുവിൽ ചന്ദ്രശേഖരൻ പിള്ളയെ മാരകായുധം ഉപയോഗിച്ച് വെട്ടിക്കൊലപ്പെടുത്തുകയായിരുന്നു. കഴുത്തിൽ മൂന്നോളം ആഴത്തിലുള്ള വെട്ടുകളേൽപ്പിച്ച് മരണം ഉറപ്പാക്കിയ ശേഷമാണ് പ്രതി സംഭവസ്ഥലത്തുനിന്ന് തന്ത്രപരമായി രക്ഷപ്പെട്ടത്.

കൊലപാതകത്തിന് ശേഷം ആദ്യം തമിഴ്‌നാട്ടിലെ വേളാങ്കണ്ണിയിലേക്ക് കടന്ന പ്രതി അവിടെ കുറച്ചുകാലം ഒളിവിൽ കഴിഞ്ഞു. പിന്നീട് കേരളത്തിലേക്ക് മടങ്ങിയെത്തിയ ഇയാൾ കോട്ടയത്തെ കല്ലറ എന്ന സ്ഥലത്ത് തോട്ടം തൊഴിലാളിയായി ജോലി ചെയ്യുകയായിരുന്നു.

നിയമപാലകരിൽ നിന്ന് രക്ഷപ്പെടാനായി ഇവിടെ മറ്റൊരു വ്യാജ പേരിലാണ് ഇയാൾ അറിയപ്പെട്ടിരുന്നത്. തുടർന്ന് ഇവിടെവെച്ച് വിവാഹം കഴിക്കുകയും ആരും സംശയിക്കാത്ത രീതിയിൽ കുടുംബമായി താമസിച്ചുവരികയുമായിരുന്നു.

അടുത്തിടെ കടുത്ത അസുഖം ബാധിച്ചതിനെത്തുടർന്ന് പ്രതി കോട്ടയം മെഡിക്കൽ കോളജ് ആശുപത്രിയിൽ ചികിത്സ തേടിയിരുന്നു. ഇവിടെവെച്ച് വെളിയം സ്വദേശിയായ ഒരു നാട്ടുകാരനെ പ്രതി അപ്രതീക്ഷിതമായി കണ്ടുമുട്ടി.

വർഷങ്ങൾക്ക് ശേഷമുള്ള കൂടിക്കാഴ്ചയിൽ പ്രതി സ്വന്തം നാട്ടിലെ ചില കാര്യങ്ങളെക്കുറിച്ചും പഴയ ആളുകളെക്കുറിച്ചും അന്വേഷിച്ചത് കേസിൽ നിർണ്ണായക വഴിത്തിരിവായി മാറുകയായിരുന്നു.

സംശയം തോന്നിയ നാട്ടുകാരൻ പോലീസിനെ വിവരമറിയിച്ചതോടെ കേസ് ഡയറി വീണ്ടും തുറക്കുകയും അന്വേഷണം അതീവ ഊർജ്ജിതമാക്കുകയും ചെയ്തു. 

പ്രതിയുടെ നാട്ടിലെ ബന്ധുക്കളെയും പഴയ സുഹൃത്തുക്കളെയും കണ്ട് രഹസ്യമായി വിവരങ്ങൾ ശേഖരിച്ചു. ഒടുവിൽ മെഡിക്കൽ കോളജ് ആശുപത്രിയിൽവെച്ച് പ്രതിയുമായി സംസാരിച്ചയാളിൽ നിന്ന് ലഭിച്ച കൃത്യമായ അടയാളങ്ങളുടെയും സൂചനകളുടെയും അടിസ്ഥാനത്തിൽ പൊലീസ് കോട്ടയത്തിന്റെ വിവിധ ഭാഗങ്ങളിൽ അന്വേഷണം വ്യാപിപ്പിച്ചു. 

തോട്ടം തൊഴിലാളിയായി കഴിഞ്ഞിരുന്ന ഒളിത്താവളം വളഞ്ഞ പോലീസ് സംഘം ഒടുവിൽ പ്രതിയെ വലയിലാക്കുകയായിരുന്നു. കോടതിയിൽ ഹാജരാക്കിയ പ്രതിയെ വരും ദിവസങ്ങളിൽ തെളിവെടുപ്പിനായി വെളിയത്തെത്തിക്കും.