മോണ്ട്സെറാത്തിലെ ‘അവർ ലേഡി ഓഫ് മോണ്ട്സെറാത്ത്’ ആബിയിൽ ജപമാല പ്രാർഥന നടത്തുകയും സന്ദേശം നൽകുകയും ചെയ്ത ശേഷം, ലെയോ പതിനാലാമൻ മാർപാപ്പ അവിടുത്തെ ബെനഡിക്റ്റൈൻ സന്യാസി സമൂഹത്തോടൊപ്പം ഉച്ചഭക്ഷണത്തിൽ പങ്കുചേരുകയും തുടർന്ന് അവർ പരസ്പരം സമ്മാനങ്ങൾ കൈമാറുകയും ചെയ്തു. പെറുവിലെ ട്രൂജില്ലോയിൽ ‘അവർ ലേഡി ഓഫ് മോണ്ട്സെറാത്ത്’ ഇടവകയിലെ വികാരിയായിരുന്ന കാലത്തെക്കുറിച്ചും, മറ്റ് അഗസ്തീനിയൻ വൈദികർക്കൊപ്പം ഈ ആബി സന്ദർശിച്ച ഓർമ്മകളും പാപ്പ പങ്കുവച്ചതായി വത്തിക്കാൻ പ്രസ് ഓഫീസ് പ്രസ്താവനയിൽ അറിയിച്ചു.

അന്നേദിവസത്തെ കൂടിക്കാഴ്ചയ്ക്കും, ഒരു സമൂഹമായി ജീവിച്ചുകൊണ്ട് പരിശുദ്ധ കന്യകാമറിയത്തോടുള്ള ഭക്തി സാക്ഷ്യപ്പെടുത്തുന്ന സന്യാസികളുടെ ജീവിതശൈലിക്കും പാപ്പ നന്ദി രേഖപ്പെടുത്തി. സഭയ്ക്കും ലോകത്തിനും ഈ പ്രത്യേക കാലഘട്ടത്തിൽ സന്യാസികളുടെ ഈ സാക്ഷ്യം എത്രത്തോളം വിലപ്പെട്ടതാണെന്ന് പാപ്പ എടുത്തുപറഞ്ഞു. “ശബ്ദ കോലാഹലങ്ങളും തിരക്കുകളും ശ്രദ്ധാശൈഥില്യങ്ങളും നിറഞ്ഞ ഈ ലോകത്ത്, നിങ്ങൾ നൽകുന്ന നിശ്ശബ്ദതയെന്ന സമ്മാനത്തിന് നന്ദി,” പാപ്പ സന്യാസിമാരോട് പറഞ്ഞു.

“നിശ്ശബ്ദതയുടെ നിമിഷങ്ങൾ അനുഭവിക്കാനും പ്രാർഥിക്കാനും നമ്മെ പ്രേരിപ്പിക്കുന്ന മാതൃകകൾ ഇന്ന് ലോകത്തിന് ആവശ്യമുണ്ട്,” മാർപാപ്പ കൂട്ടിച്ചേർത്തു. 2025-ൽ സ്ഥാപിതമായതിന്റെ ആയിരം വർഷം (1000th anniversary) ആഘോഷിച്ച ഈ ആശ്രമത്തിൽ നിലവിൽ അൻപതോളം ബെനഡിക്റ്റൈൻ സന്യാസികളാണ് താമസിക്കുന്നത്.

ആബിയിലെ സന്ദർശക പുസ്തകത്തിൽ (Visitor’s Book) മാർപാപ്പ ഇങ്ങനെ കുറിച്ചു: “എന്റെ പത്രോസിന്റെ ശുശ്രൂഷയെ ഞാൻ മോണ്ട്സെറാത്ത് മാതാവിന്റെ പാദങ്ങളിൽ സമർപ്പിക്കുന്നു; അമ്മയുടെ മാതൃസഹജമായ മധ്യസ്ഥത മുഴുവൻ സഭയെയും സംരക്ഷിക്കട്ടെ. എന്റെ സ്നേഹത്തോടെയും അനുഗ്രഹത്തോടെയും.” തുടർന്ന്, തനിക്ക് ലഭിച്ച സ്നേഹനിർഭരമായ സ്വീകരണത്തിനും ആതിഥ്യമര്യാദയ്ക്കും നന്ദി പറഞ്ഞ പാപ്പ ഏവർക്കും തന്റെ ആശീർവാദം നൽകി.