ശ്രേഷ്ഠ കാതോലിക്ക ബാവായ്ക്ക് സീറോ മലബാര്‍ സഭയുടെ സ്‌നേഹാദരം
കാക്കനാട് : യാക്കോബായ സുറിയാനി ഓര്‍ത്തഡോക്‌സ് സഭയുടെ പ്രാദേശിക തലവന്‍ ശ്രേഷ്ഠ കാതോലിക്കായും മലങ്കര മെത്രാപ്പോലീത്തായുമായ ആബൂന്‍ മോര്‍ ബസ്സേലിയോസ് ജോസഫ് ബാവായ്ക്ക് സീറോ മലബാര്‍ സഭാ ആസ്ഥാനമായ കാക്കനാട് മൗണ്ട് സെന്റ് തോമസില്‍ സ്‌നേഹനിര്‍ഭരമായ സ്വീകരണം നല്‍കി.
സീറോ മലബാര്‍ മെത്രാന്മാരുടെ സിനഡ് സമ്മേളനത്തിനിടെയായിരുന്നു സ്വീകരണം. സഭാ ആസ്ഥാനത്ത് മേജര്‍ ആര്‍ച്ച്ബിഷപ്പ് മാര്‍ റാഫേല്‍ തട്ടില്‍, സീറോ മലബാര്‍ മെത്രാന്‍ സിനഡ് സെക്രട്ടറി ആര്‍ച്ച്ബിഷപ്പ് മാര്‍ ജോസഫ് പാംപ്ലാനി എന്നിവര്‍ ചേര്‍ന്ന് ശ്രേഷ്ഠ കാതോലിക്ക ബാവായെ സ്വീകരിച്ചു. തുടര്‍ന്ന്, സിനഡ് പിതാക്കന്മാരുമായും, മേജര്‍ ആര്‍ക്കി എപ്പിസ്‌കോപ്പല്‍ കൂരിയയിലെ മറ്റ് അംഗങ്ങളുമായും ശ്രേഷ്ഠ ബാവ ആശയവിനിമയം നടത്തി.
സഭകള്‍ തമ്മില്‍, പ്രത്യേകിച്ച് സീറോ മലബാര്‍ സഭയും യാക്കോബായ സുറിയാനി ഓര്‍ത്തഡോക്‌സ് സഭയും തമ്മില്‍ നിലനില്‍ക്കുന്ന കൂട്ടായ്മയെയും സഹവര്‍ത്തിത്വത്തെയും കുറിച്ച് ശ്രേഷ്ഠ ബാവ പ്രസംഗത്തില്‍ പറഞ്ഞു.
മാര്‍ത്തോമന്‍ പൈതൃകവും വി. പത്രോസിന്റെ ശ്ലൈഹിക സിംഹാസനത്തിലെ അപ്പോസ്‌തോലിക പിന്തുടര്‍ച്ചയും ചേര്‍ത്തു പിടിച്ച് കൂട്ടായ്മയിലൂടെ ക്രിസ്തീയ സാക്ഷ്യം നല്‍കാന്‍ നമുക്ക് മുന്നേറാമെന്ന് ശ്രേഷ്ഠ ബാവ ആഹ്വാനം ചെയ്തു. കാലഘട്ടത്തിലെ പ്രതിസന്ധികളെ ഒരുമിച്ചു നിന്ന് നേരിടാന്‍ കഴിയുമെന്നും ബാവ പ്രത്യാശ പ്രകടിപ്പിച്ചു.
യാക്കോബായ സുറിയാനി ഓര്‍ത്തഡോക്‌സ് സഭയ്ക്ക് എപ്പോഴും ഏതാവശ്യത്തിലും സഹോദര്യത്തിന്റെ കരം നീട്ടാന്‍ സീറോ മലബാര്‍ സഭ സന്നദ്ധമാണെന്ന് മേജര്‍ ആര്‍ച്ച്ബിഷപ്പ് മാര്‍ റാഫേല്‍ തട്ടില്‍ ഉറപ്പു നല്‍കി. ഇരു സഭകളും തമ്മിലുള്ള പൊതുവായ വിശ്വാസപൈതൃകവും പാരമ്പര്യങ്ങളും കാത്തുസൂക്ഷിക്കാന്‍ കൂട്ടായ പരിശ്രമം ഉണ്ടാകണമെന്നും മേജര്‍ ആര്‍ച്ച് ബിഷപ്പ് കൂട്ടിച്ചേര്‍ത്തു.
ബിഷപ്പ് മാര്‍ സെബാസ്റ്റ്യന്‍ എടയന്ത്രത്ത് സ്വാഗതവും, സി.ബി.സി.ഐ പ്രസിഡന്റ് ആര്‍ച്ച് ബിഷപ്പ് മാര്‍ ആന്‍ഡ്രൂസ് താഴത്ത്, ബിഷപ്പ് മാര്‍ ജോസഫ് കല്ലറങ്ങാട്ട്, യാക്കോബായ സുറിയാനി സഭ മീഡിയാ സെല്‍ ചെയര്‍മാനും എക്യുമെനിക്കല്‍ ഓഫീസ് പ്രസിഡന്റുമായ അഭിവന്ദ്യ ഡോ. കുര്യാക്കോസ് മോര്‍ തെയോഫിലോസ് മെത്രാപ്പോലീത്ത എന്നിവരും ചടങ്ങില്‍ സംസാരിച്ചു. ശ്രേഷ്ഠ ബാവായുടെ സെക്രട്ടറി ഫാ. ജോഷി മാത്യു ചിറ്റേത്തും സന്നിഹിതനായിരുന്നു.