സുഡാനിൽ തുടരുന്ന കടുത്ത ആഭ്യന്തരയുദ്ധം ഒരു തലമുറയുടെ തന്നെ ഭാവിയെ ഇല്ലാതാക്കുന്നതായി ഐക്യരാഷ്ട്രസഭ മുന്നറിയിപ്പ് നൽകി. മൂന്ന് വർഷത്തിലേറെയായി തുടരുന്ന പോരാട്ടം കാരണം 80 ലക്ഷത്തിലധികം കുട്ടികൾക്ക് പഠനം ഉപേക്ഷിക്കേണ്ടി വന്നിട്ടുണ്ട്. രാജ്യത്തെ ഭൂരിഭാഗം സ്കൂളുകളും തകരുകയോ സൈനിക ആവശ്യങ്ങൾക്കായി ഉപയോഗിക്കുകയോ ചെയ്തതോടെ പഠനാന്തരീക്ഷം പൂർണ്ണമായും തകർന്നു.

കുട്ടികളുടെ സുരക്ഷയെക്കരുതി മാതാപിതാക്കൾ അവരെ സ്കൂളുകളിലേക്ക് അയക്കാൻ ഭയപ്പെടുകയാണെന്ന് ഐക്യരാഷ്ട്രസഭയുടെ ഉപമേധാവി അമിന മുഹമ്മദ് വ്യക്തമാക്കി. ശമ്പളം ലഭിക്കാതെയാണ് അധ്യാപകരിൽ ഭൂരിഭാഗവും കുട്ടികൾക്കായി പ്രവർത്തിക്കാൻ ശ്രമിക്കുന്നത്. എങ്കിലും വൻതോതിലുള്ള സാമ്പത്തിക തകർച്ചയും സംഘർഷവും പ്രതിസന്ധി കൂടുതൽ വഷളാക്കുന്നു.

യുദ്ധം ഏറ്റവും കൂടുതൽ ബാധിച്ചിരിക്കുന്നത് നിരപരാധികളായ സ്ത്രീകളെയും കുട്ടികളെയുമാണെന്ന് റിപ്പോർട്ടുകൾ സൂചിപ്പിക്കുന്നു. ഇതുവരെ ഒന്നരക്കോടിയോളം ആളുകൾക്ക് സ്വന്തം വീടുകൾ ഉപേക്ഷിച്ച് പലായനം ചെയ്യേണ്ടി വന്നിട്ടുണ്ട്. നിലവിൽ വലിയൊരു ജനവിഭാഗം അടിയന്തര മാനുഷിക സഹായത്തിനായി കാത്തിരിക്കുകയാണ്.