കുവൈത്തില്‍ തിങ്കളാഴ്ച മുതല്‍ മൂന്ന് ദിവസത്തേക്ക് ശക്തമായ പൊടിക്കാറ്റിനും ഉയര്‍ന്ന താപനിലക്കും സാധ്യത
കുവൈത്ത്: കുവൈത്തില്‍ തിങ്കളാഴ്ച മുതല്‍ മൂന്ന് ദിവസത്തേക്ക് ശക്തമായ പൊടിക്കാറ്റിനും ഉയര്‍ന്ന താപനിലക്കും സാധ്യതയുണ്ടെന്ന് കാലാവസ്ഥാ നിരീക്ഷണ വകുപ്പ് ഡയറക്ടര്‍ ധരാര്‍ അല്‍ അലി അറിയിച്ചു. കൂടാതെ രാജ്യത്ത് വരണ്ടതും ചൂടേറിയതുമായ കാറ്റിന് സാധ്യതയുണ്ടെന്നും ഇത് തുറന്ന പ്രദേശങ്ങളില്‍ പൊടിക്കാറ്റിന് കാരണമാകുമെന്നും അധികൃതര്‍ മുന്നറിയിപ്പ് നല്‍കി.
കുവൈത്തില്‍ ചൊവ്വ, ബുധന്‍ ദിവസങ്ങളില്‍ കാറ്റിന്റെ ശക്തി കൂടും. കൂടാതെ ചൂടേറിയതും പൊടി നിറഞ്ഞതുമായ കാലാവസ്ഥയായിരിക്കും. വടക്ക് പടിഞ്ഞാറന്‍ ദിശയില്‍ നിന്ന് മിതമായ വേഗതയില്‍ വീശുന്ന കാറ്റ് ചില സമയങ്ങളില്‍ മണിക്കൂറില്‍ 20 മുതല്‍ 65 കിലോമീറ്റര്‍ വരെ വേഗത കൈവരിച്ച് ശക്തമാകാന്‍ സാധ്യതയുണ്ട്.
ഇത് ചില പ്രദേശങ്ങളില്‍ കാഴ്ചപരിധി 1000 മീറ്ററില്‍ താഴെയാക്കാന്‍ ഇടയാക്കും. ഈ ദിവസങ്ങളില്‍ പരമാവധി താപനില 44 മുതല്‍ 47 ഡിഗ്രി സെല്‍ഷ്യസ് വരെയും ഏറ്റവും കുറഞ്ഞ താപനില 32 മുതല്‍ 35 ഡിഗ്രി സെല്‍ഷ്യസ് വരെയും എത്താന്‍ സാധ്യതയുണ്ടെന്നും കാലാവസ്ഥാ നിരീക്ഷണ കേന്ദ്രം അറിയിച്ചു.