അമേരിക്കയിലെ ഷാർലറ്റ് രൂപതയില് തിരുപ്പട്ട വസന്തം; 10 നവവൈദികര് ഒരുമിച്ച് അഭിഷിക്തരായി
നോര്ത്ത് കരോളിന: അമേരിക്കയിലെ നോര്ത്ത് കരോളിനയിലെ ഷാര്ലറ്റ് രൂപതയില് തിരുപ്പട്ട വസന്തം. മെയ് 30ന് ബിഷപ്പ് മൈക്കല് മാര്ട്ടിനില് നിന്നു 10 ഡീക്കന്മാരാണ് തിരുപ്പട്ടം സ്വീകരിച്ചത്.
രൂപതയുടെ ചരിത്രത്തില് ആദ്യമായാണ് ഇത്രയും പേര് ഒരുമിച്ച് തിരുപ്പട്ടം സ്വീകരിച്ചത്. 2000-ലും 2024-ലും ഏഴുപേരാണ് തിരുപ്പട്ടം സ്വീകരിച്ചത്. റെക്കോര്ഡ് ഈ സംഖ്യ മറികടക്കുന്നു, 2025-ല് ആറ് പേരാണ് തിരുപ്പട്ടം സ്വീകരിച്ചത്.
നമ്മുടെ ഇടയില് നടക്കുന്ന ദൈവത്തിന്റെ പ്രവര്ത്തിയില് അത്ഭുതത്തോടെയാണ് നോക്കികാണുന്നതെന്ന് ബിഷപ്പ് മൈക്കല് മാര്ട്ടിന് പറഞ്ഞു.
ആഴമേറിയ കുടുംബ വിശ്വാസം, സജീവമായ ഇടവക സമൂഹങ്ങള്, യുവജനങ്ങള്ക്കിടയില് വര്ഷങ്ങളായി നടത്തിയ ദൈവവിളി പ്രോത്സാഹനം എന്നിവയുടെ ഫലമായാണ് പൗരോഹിത്യ ദൈവവിളികളുടെ വളര്ച്ചയെന്ന് സഭാനേതൃത്വം അറിയിച്ചു.
അഞ്ചേമുക്കാല് ലക്ഷത്തിലധികം കത്തോലിക്ക വിശ്വാസികളാണ് രൂപതയ്ക്കു കീഴിലുള്ളത്. 145 വൈദികരാണ് വിശ്വാസികള്ക്ക് ഇടയില് ശുശ്രൂഷ ചെയ്യുന്നത്.
രൂപതയ്ക്കായി ഭാവി പുരോഹിതന്മാരെ ഒരുക്കുന്നതിനായി സ്ഥാപിതമായ സെന്റ് ജോസഫ്സ് കോളേജ് സെമിനാരിയിലാണ് പുതുതായി തിരുപ്പട്ട സ്വീകരിച്ചവരില് ഭൂരിഭാഗം പേരും പഠനം പൂര്ത്തിയാക്കിയത്.
തിരുപ്പട്ട സ്വീകരണത്തോട് അനുബന്ധിച്ച് നടന്ന വിശുദ്ധ കുര്ബാനയില് 1,600-ലധികം പേര് പങ്കെടുത്തു.
ജൂലൈ 1 മുതല്, രൂപതയിലുടനീളമുള്ള ഇടവകകളിലും സ്കൂളുകളിലും മറ്റ് സ്ഥാപനങ്ങളിലും നവവൈദികര് തങ്ങളുടെ ശുശ്രൂഷ ആരംഭിക്കും.