ഷിക്കാഗോയിലെ കത്തോലിക്കാ സ്കൂളുകളിൽ ഭിന്നശേഷിക്കാരായ വിദ്യാർത്ഥികൾക്ക് നൽകിവന്നിരുന്ന പ്രത്യേക വിദ്യാഭ്യാസ ഫണ്ട് ഷിക്കാഗോ പബ്ലിക് സ്കൂൾസ്  പുനഃസ്ഥാപിച്ചു

ഷിക്കാഗോയിലെ കത്തോലിക്കാ സ്കൂളുകളിൽ ഭിന്നശേഷിക്കാരായ വിദ്യാർത്ഥികൾക്ക് നൽകിവന്നിരുന്ന പ്രത്യേക വിദ്യാഭ്യാസ ഫണ്ട് ഷിക്കാഗോ പബ്ലിക് സ്കൂൾസ് (CPS) പുനഃസ്ഥാപിച്ചു.

ആർച്ച് ഡയോസിസിന്റെയും രക്ഷിതാക്കളുടെയും ശക്തമായ പ്രതിഷേധത്തെത്തുടർന്നാണ് വെട്ടിക്കുറച്ച സേവനങ്ങൾ ഏപ്രിൽ 20 മുതൽ പുനരാരംഭിക്കാൻ അധികൃതർ തീരുമാനിച്ചത്.

അധ്യയന വർഷം അവസാനിക്കാൻ ആഴ്ചകൾ മാത്രം ബാക്കിനിൽക്കെ, വിശുദ്ധ വാരത്തിൽ മുന്നറിയിപ്പില്ലാതെ ഫണ്ട് നിർത്തലാക്കിയത് വലിയ വിവാദങ്ങൾക്ക് വഴിവെച്ചിരുന്നു.

ഗണിതം, വായന തുടങ്ങിയ വിഷയങ്ങളിൽ പഠന വൈകല്യമുള്ള കുട്ടികൾക്ക് ലഭിച്ചിരുന്ന ട്യൂട്ടോറിംഗ് ഉൾപ്പെടെയുള്ള സേവനങ്ങളെയാണ് ഈ നടപടി ബാധിച്ചിരുന്നത്.

സി.പി.എസിന്റെ തീരുമാനം വിവേചനപരവും കത്തോലിക്കരോടുള്ള അവഹേളനവുമാണെന്ന് കർദ്ദിനാൾ ബ്ലേസ് കുപിച്ച് നേരത്തെ കുറ്റപ്പെടുത്തിയിരുന്നു.

പ്രശ്നപരിഹാരത്തിനായി സഭ നടത്തിയ ശ്രമങ്ങൾ വിജയിച്ചതോടെ, മെയ് 22 വരെ ഈ സേവനങ്ങൾ വിദ്യാർത്ഥികൾക്ക് തടസ്സമില്ലാതെ ലഭിക്കും.

വരും മാസങ്ങളിൽ ഭിന്നശേഷി വിദ്യാർത്ഥികളുടെ അവകാശങ്ങൾ ഉറപ്പാക്കാൻ സി.പി.എസുമായി ചേർന്ന് പ്രവർത്തിക്കുമെന്ന് ആർച്ച് ഡയോസിസ് വ്യക്തമാക്കി.