സന്തോഷത്തിലേക്കുള്ള ആറ് ‘വിശുദ്ധ’ പാഠങ്ങൾ

ജീവിതം പ്രതിസന്ധികൾ കൊണ്ട് നിറയുമ്പോൾ സന്തോഷം കണ്ടെത്തുക എന്നത് അസാധ്യമായി തോന്നിയേക്കാം. സന്തോഷം എന്നത് കേവലം ക്ഷണികമായ ഒരു വികാരമല്ല, മറിച്ച് കഷ്ടപ്പാടുകൾക്കിടയിലും നമുക്ക് സ്വന്തമാക്കാൻ കഴിയുന്ന ഒരു സമ്മാനമാണെന്ന് വിശുദ്ധരുടെ ജീവിതം നമ്മെ പഠിപ്പിക്കുന്നു. ലോകം ഇരുണ്ടതായി തോന്നുമ്പോൾ മനസ്സിനെ പ്രകാശിപ്പിക്കാൻ സഹായിക്കുന്ന ലളിതമായ ആറ് വഴികൾ വിശുദ്ധരുടെ ജീവിതത്തിൽ നിന്ന്…

ചെറിയ കാര്യങ്ങളിൽ സന്തോഷം കണ്ടെത്തുക എന്നതാണ് ലിസ്യൂവിലെ വി. കൊച്ചുത്രേസ്യ നൽകുന്ന പാഠം.

തന്റെ ‘ചെറിയ വഴി’ എന്ന ചിന്തയിലൂടെ വലിയ കാര്യങ്ങൾ ചെയ്യുന്നതിനേക്കാൾ ചെറിയ കാര്യങ്ങൾ വലിയ സ്നേഹത്തോടെ ചെയ്യുന്നതിലാണ് അവൾ ശ്രദ്ധ കേന്ദ്രീകരിച്ചത്. ഒരു പൂവിനെ അഭിനന്ദിക്കുന്നതോ, ആരെയെങ്കിലും നോക്കി പുഞ്ചിരിക്കുന്നതോ പോലെ ലളിതമായ നിമിഷങ്ങളെ വിലമതിക്കാൻ പഠിച്ചാൽ ജീവിതം കൂടുതൽ മനോഹരമാകും.

അസീസിയിലെ വി. ഫ്രാൻസിസ് പഠിപ്പിക്കുന്നത് കൃതജ്ഞതയുടെ പാഠമാണ്. കഷ്ടപ്പാടുകൾക്കിടയിലും ദിവസവും നന്ദിയുള്ള മൂന്ന് കാര്യങ്ങൾ കണ്ടെത്താൻ അദ്ദേഹം നമ്മെ പ്രോത്സാഹിപ്പിക്കുന്നു.
ജീവിതത്തെ അമിതമായി ഗൗരവത്തോടെ കാണാതിരിക്കുക എന്നതാണ് ആവിലയിലെ വി. തെരേസ നൽകുന്ന ഉപദേശം. ‘ദുഃഖിതരായ വിശുദ്ധന്മാരിൽ നിന്ന് ഞങ്ങളെ രക്ഷിക്കണമേ’ എന്ന് പ്രാർഥിച്ചിരുന്ന വിശുദ്ധ, പ്രതിസന്ധികളിൽപ്പോലും നർമ്മബോധം കൈവിടാതിരിക്കാൻ ഓർമ്മിപ്പിക്കുന്നു.

വി. ജോൺ പോൾ രണ്ടാമൻ മാർപാപ്പയാകട്ടെ, തന്റെ ജീവിതത്തിലുടനീളം ‘പ്രത്യാശ’ എന്ന വലിയ സന്ദേശമാണ് നൽകിയത്. ‘ഭയപ്പെടേണ്ട’ എന്ന അദ്ദേഹത്തിന്റെ വാക്കുകൾ, ഇരുണ്ട സാഹചര്യങ്ങളിലും നല്ല ദിവസങ്ങൾ വരാനിരിക്കുന്നു എന്ന വിശ്വാസം മുറുകെപ്പിടിക്കാൻ നമ്മെ സഹായിക്കുന്നു.

സന്തോഷം കണ്ടെത്താനുള്ള മറ്റൊരു മാർഗം മറ്റുള്ളവരെ സേവിക്കുക എന്നതാണെന്ന് വാഴ്ത്തപ്പെട്ട പിയർ ജോർജിയോ ഫ്രാസാറ്റി പറയുന്നു. തന്റെ സാഹസികമായ ജീവിതത്തിനിടയിലും ദരിദ്രരെ സഹായിക്കുന്നതിൽ അദ്ദേഹം വലിയ ആനന്ദം കണ്ടെത്തി.

സ്വന്തം വേദനകളിൽ ഒതുങ്ങിക്കൂടാതെ മറ്റുള്ളവരിലേക്ക് കൈനീട്ടുന്നത് ജീവിതത്തിന് പുതിയ അർഥം നൽകും.
അവസാനമായി, ‘സന്തോഷത്തിന്റെ അപ്പോസ്തലൻ’ എന്നറിയപ്പെടുന്ന വി. ഫിലിപ്പ് നേരി പഠിപ്പിക്കുന്നത് ലാളിത്യത്തെക്കുറിച്ചാണ്.

കാര്യങ്ങൾ സങ്കീർണ്ണമാക്കാതെ നൃത്തത്തിലൂടെയോ, വിനോദങ്ങളിലൂടെയോ കുട്ടിക്കാലത്തെ വീണ്ടെടുക്കുന്നത് മനസ്സിന് വലിയ ഉന്മേഷം നൽകും.
ലളിതമായ ഈ പാഠങ്ങൾ ജീവിതത്തിൽ പ്രാവർത്തികമാക്കിയാൽ ഏത് പ്രതിസന്ധിയിലും സന്തോഷത്തിന്റെ വെളിച്ചം കണ്ടെത്താൻ നമുക്ക് സാധിക്കും.