സാംബശിവ റാവുവിന്റെ കോഴ ആരോപണം; വിജിലന്‍സ് അന്വേഷണം ഉടന്‍ പ്രഖ്യാപിച്ചേക്കും
തിരുവനന്തപുരം: മുന്‍ എക്‌സൈസ് കമ്മീഷണര്‍ സാംബശിവ റാവു ഉന്നയിച്ച കോഴ ആരോപണത്തില്‍ സര്‍ക്കാര്‍ ഉടന്‍ അന്വേഷണം പ്രഖ്യാപിച്ചേക്കും. സംഭവത്തില്‍ വിജിലന്‍സ് അന്വേഷണം നടത്തണമെന്നാണ് എക്‌സൈസ് വകുപ്പിന്റെ ശുപാര്‍ശ. അതേസമയം, പുതിയ എക്‌സൈസ് കമ്മീഷണറെ നിയമിക്കാനുള്ള നടപടികളും സര്‍ക്കാര്‍ വേഗത്തിലാക്കി.
പദവി ഒഴിയുന്നതിന് മുന്‍പ് മുന്‍ എക്‌സൈസ് കമ്മീഷണര്‍ സാംബശിവ റാവു സര്‍ക്കാരിന് സമര്‍പ്പിച്ച റിപ്പോര്‍ട്ടിലാണ് ഗുരുതരമായ കോഴ ആരോപണങ്ങളുള്ളത്. സെന്‍ട്രല്‍ എക്‌സൈസ് ജോയിന്റ് കമ്മീഷണര്‍ എസ്. വിനോദ്, ആലപ്പുഴ എക്‌സൈസ് ഡെപ്യൂട്ടി കമ്മീഷണര്‍ കെ.ആര്‍. അജയ് എന്നിവര്‍ ബാറുടമകളില്‍ നിന്ന് കോഴ വാങ്ങിയെന്ന വിവരമാണ് റിപ്പോര്‍ട്ടിലുള്ളത്. ആരോപണങ്ങള്‍ ഗൗരവമുള്ളതാണെന്നാണ് എക്‌സൈസ് വിജിലന്‍സ് വിഭാഗത്തിന്റെ വിലയിരുത്തല്‍.
അന്വേഷണം വൈകിയാല്‍ അഴിമതിക്കാര്‍ക്കൊപ്പം സര്‍ക്കാര്‍ നില്‍ക്കുകയാണെന്ന വിമര്‍ശനം പ്രതിപക്ഷം ഉയര്‍ത്താനും സാധ്യതയുണ്ട്. ഈ സാഹചര്യത്തിലാണ് വിജിലന്‍സ് അന്വേഷണത്തിന് ശുപാര്‍ശ ചെയ്യാന്‍ എക്‌സൈസ് വകുപ്പ് നീക്കം നടത്തുന്നത്.
അതേസമയം, പുതിയ എക്‌സൈസ് കമ്മീഷണറെ നിയമിക്കുന്നതുമായി ബന്ധപ്പെട്ട് മുഖ്യമന്ത്രി വി.ഡി. സതീശന്‍, എക്‌സൈസ് മന്ത്രി എം. ലിജു എന്നിവരുമായി ചീഫ് സെക്രട്ടറി ആശയവിനിമയം നടത്തി. യുവ ഐഎഎസ് ഉദ്യോഗസ്ഥര്‍ ഉള്‍പ്പെടെയുള്ളവരുടെ പേരുകളാണ് പരിഗണനയിലുള്ളത്. വൈകാതെ പുതിയ കമ്മീഷണറെ നിയമിക്കുമെന്നാണ് സൂചന.