റമ്മി കളിക്ക് പണം വേണം, പോലീസുകാരനും കുടുംബവും മുക്കുപണ്ടം പണയം വെച്ച് തട്ടിയത് 52 ലക്ഷം രൂപ; അപ്രൈസറും അറസ്റ്റില്‍
തിരുവനന്തപുരം: ഓണ്‍ലൈന്‍ റമ്മി കളിക്ക് പണം കണ്ടെത്തുന്നതിനായി വ്യാജ സ്വര്‍ണം പണയം വെച്ച് 52 ലക്ഷത്തിലധികം രൂപ തട്ടിയെടുത്ത കേസില്‍ പോലീസുകാരനും ബാങ്ക് അപ്രൈസറും അറസ്റ്റില്‍.
മണ്ണന്തല പോലീസ് സ്റ്റേഷനിലെ സിവില്‍ പോലീസ് ഓഫീസര്‍ അഖില്‍ രാജ്, അപ്രൈസര്‍ വിജയകുമാര്‍ എന്നിവരെയാണ് പോലീസ് അറസ്റ്റ് ചെയ്തത്. അഖില്‍ രാജിന്റെ ഭാര്യ അനഘ, അമ്മ എന്നിവര്‍ക്കെതിരെയും കേസ് രജിസ്റ്റര്‍ ചെയ്തിട്ടുണ്ട്.
അഖില്‍ രാജും കുടുംബവും ചേര്‍ന്ന് ആസൂത്രണം ചെയ്ത തട്ടിപ്പിന് ബാങ്ക് അപ്രൈസറായ വിജയകുമാറിന്റെ സഹായം ലഭിക്കുകയായിരുന്നു. മുക്കുപണ്ടം അസ്സല്‍ സ്വര്‍ണമാണെന്ന് സാക്ഷ്യപ്പെടുത്തി നല്‍കിയാണ് അപ്രൈസര്‍ തട്ടിപ്പിന് സൗകര്യമൊരുക്കിയത്.
കഴിഞ്ഞ മാര്‍ച്ച് മാസത്തില്‍ 18 ലക്ഷം രൂപയും ജൂലൈയില്‍ 20 ലക്ഷം രൂപയും പിന്നീട് 14 ലക്ഷം രൂപയും ഉള്‍പ്പെടെ ഘട്ടംഘട്ടമായി മൊത്തം 52,89,000 രൂപയാണ് ഇവര്‍ ബാങ്കില്‍ നിന്ന് കൈപ്പറ്റിയത്.
ബാങ്കില്‍ നടന്ന നിത്യനിദാന പരിശോധനകള്‍ക്കിടയിലാണ് പണയം വെച്ച സ്വര്‍ണം വ്യാജമാണെന്ന വിവരം അധികൃതര്‍ തിരിച്ചറിയുന്നത്. തുടര്‍ന്ന് ബാങ്ക് മാനേജര്‍ മണ്ണന്തല പോലീസില്‍ നല്‍കിയ പരാതിയുടെ അടിസ്ഥാനത്തില്‍ കേസ് രജിസ്റ്റര്‍ ചെയ്യുകയും എഫ്ഐആര്‍ തയ്യാറാക്കി പ്രതികളെ കസ്റ്റഡിയിലെടുക്കുകയുമായിരുന്നു.
കൈയ്യിലുണ്ടായിരുന്ന സമ്പാദ്യം മുഴുവന്‍ ഓണ്‍ലൈന്‍ റമ്മി കളിച്ച് നഷ്ടപ്പെട്ടതിനെ തുടര്‍ന്നാണ് അഖില്‍ രാജ് കുടുംബാംഗങ്ങളെയും കൂട്ടി തട്ടിപ്പ് ആസൂത്രണം ചെയ്തതെന്ന് അന്വേഷണസംഘം വ്യക്തമാക്കി. കേസില്‍ ഉള്‍പ്പെട്ട മറ്റ് കുടുംബാംഗങ്ങള്‍ക്കായി അന്വേഷണം ഊര്‍ജ്ജിതമാക്കിയിട്ടുണ്ട്.