ഒരു വില്ലയ്ക്ക് 15 ലക്ഷം; ഐ.എ.എസ് - ഐ.പി.എസ് ദമ്പതികള്‍ വാങ്ങിക്കൂട്ടിയത് 36 വില്ലകള്‍, അന്വേഷണം
രാജസ്ഥാന്‍: രാജസ്ഥാനിലെ മുതിര്‍ന്ന ഐഎഎസ് ഉദ്യോഗസ്ഥന്‍ ശിഖര്‍ അഗര്‍വാളും ഭാര്യയും ഐപിഎസ് ഉദ്യോഗസ്ഥയുമായ പ്രശാഖ മാത്തൂറും ചേര്‍ന്ന് വാങ്ങിയത് 36 വില്ലകളെന്ന് കണ്ടെത്തല്‍.
വിപണി മൂല്യത്തേക്കാള്‍ വളരെ കുറഞ്ഞ വിലയില്‍ തങ്ങള്‍ക്കും കുടുംബാംഗങ്ങള്‍ക്കും വേണ്ടി വില്ലകള്‍ സ്വന്തമാക്കിയാതായി പ്രാഥമിക അന്വേഷണത്തില്‍ സ്ഥിരീകരിച്ചു.
ഇരുവര്‍ക്കുമെതിരെ വിശദമായ അന്വേഷണത്തിനു രാജസ്ഥാന്‍ ആന്റി കറപ്ഷന്‍ ബ്യൂറോയ്ക്ക് സര്‍ക്കാര്‍ നിര്‍ദേശം നല്‍കി. അഗര്‍വാളിന്റെയും ഭാര്യയുടെയും കുടുംബാംഗങ്ങളുടെയും പേരിലാണ് ഒട്ടേറെ സ്വത്തുക്കള്‍ വാങ്ങികൂട്ടിയത്.
ഉദയ്പൂരിലെ ബുജ്ദയില്‍ 20 വില്ലകള്‍ വാങ്ങിയതായി ആരോപിക്കപ്പെടുന്നു, അതില്‍ 10 എണ്ണം അഗര്‍വാളിന്റെ പേരിലും 10 എണ്ണം ഭാര്യ പ്രശാഖ മാത്തൂറിന്റെ പേരിലുമാണ്.
വില്ലയ്ക്ക് ഓരോന്നിനും 15 ലക്ഷം മാത്രമാണ് റജിസ്‌ട്രേഷനില്‍ കാണിച്ചിട്ടുള്ളത്. ഇതുകൂടാതെ അല്‍വാറിലും 8 വില്ലകള്‍ വാങ്ങിയിട്ടുണ്ട്. 4 എണ്ണം വീതം അഗര്‍വാളിന്റെയും ഭാര്യയുടെയും പേരിലാണ് റജിസ്റ്റര്‍ ചെയ്തിട്ടുള്ളത്.
15 ലക്ഷം മുതല്‍ 16.5 ലക്ഷം രൂപയാണ് ഈ വില്ലകളില്‍ ഓരോന്നിനും വില കാണിച്ചിട്ടുള്ളത്. ശിഖര്‍ അഗര്‍വാളുമായി ബന്ധപ്പെട്ട 36 വില്ലകളാണ് രണ്ട് സ്ഥലങ്ങളിലുമായി കണ്ടെത്തിയിട്ടുള്ളത്. ഇദ്ദേഹം രേഖപ്പെടുത്തിയ മൂല്യം അനുസരിച്ചായാലും 5.52 കോടി രൂപയുടെ സ്വത്തുക്കള്‍ ഇതിലൂടെ സമ്പാദിച്ചിട്ടുണ്ട്.
രാജസ്ഥാന്‍ സര്‍ക്കാരിനു കീഴിലെ വ്യവസായ വകുപ്പിന്റെ അഡീഷനല്‍ ചീഫ് സെക്രട്ടറിയായി അടുത്ത കാലം വരെ സേവനമനുഷ്ഠിച്ച അഗര്‍വാള്‍ ഹോസ്പിറ്റാലിറ്റി മേഖലയില്‍ പ്രവര്‍ത്തിക്കുന്ന ചില കമ്പനികള്‍ക്ക് ഇളവുകള്‍ അനുവദിക്കുകയും റിസോര്‍ട്ട് നിര്‍മാണ വ്യവസ്ഥകള്‍ ലഘൂകരിക്കുകയും ചെയ്തതായി കണ്ടെത്തി.
അഗര്‍വാളിന്റെ നടപടികളിലൂടെ സംസ്ഥാന സര്‍ക്കാരിന് ഗണ്യമായ സാമ്പത്തിക നഷ്ടമുണ്ടായിട്ടുണ്ടെന്നും അന്വേഷണത്തില്‍ കണ്ടെത്തി.
ഉദയ്പുര്‍ ജില്ലാ കലക്ടര്‍, രാജസ്ഥാന്‍ സംസ്ഥാന മലിനീകരണ നിയന്ത്രണ ബോര്‍ഡ് ചെയര്‍മാന്‍, വ്യവസായ വകുപ്പിന്റെ അഡീഷനല്‍ ചീഫ് സെക്രട്ടറി എന്നിങ്ങനെ ഒട്ടേറെ സ്ഥാനങ്ങള്‍ ശിഖര്‍ അഗര്‍വാള്‍ വഹിച്ചിട്ടുണ്ട്.