പി.എസ്.സി. ക്രമക്കേട്; മൂന്ന് അംഗങ്ങളെ ചോദ്യം ചെയ്തു; ചെയര്‍മാനോട് ബുധനാഴ്ച ഹാജരാകാന്‍ നിര്‍ദ്ദേശം നല്‍കി ക്രൈംബ്രാഞ്ച്
തിരുവനന്തപുരം: പി.എസ്.സി. പരീക്ഷാ ക്രമക്കേടുമായി ബന്ധപ്പെട്ട അന്വേഷണത്തില്‍ നിര്‍ണ്ണായക നീക്കങ്ങളുമായി പ്രത്യേക അന്വേഷണ സംഘം. കേസില്‍ മൂന്ന് പി.എസ്.സി. അംഗങ്ങള്‍ ഇന്ന് അന്വേഷണ സംഘത്തിന് മുന്നില്‍ ചോദ്യം ചെയ്യലിനായി ഹാജരായി.
എസ്. ശ്രീകുമാര്‍, സെയ്ഫ്, സ്റ്റാനി തോമസ് എന്നിവരാണ് അന്വേഷണ സംഘത്തിന് മുന്നിലെത്തിയത്. എസ്‌ഐടി തലവന്‍ അജിതാ ബീഗത്തിന്റെ നേതൃത്വത്തിലാണ് ചോദ്യം ചെയ്യല്‍ പുരോഗമിക്കുന്നത്. നാളെയും (ഒക്ടോബര്‍ 27) രണ്ട് പി.എസ്.സി. അംഗങ്ങളോട് ഹാജരാകാന്‍ അന്വേഷണ സംഘം നിര്‍ദ്ദേശിച്ചിട്ടുണ്ട്.
അതേസമയം, പി.എസ്.സി. ചെയര്‍മാന്‍ ഡോ. എം.ആര്‍. ബൈജുവിനോട് ബുധനാഴ്ച (ഒക്ടോബര്‍ 28) ക്രൈംബ്രാഞ്ച് ആസ്ഥാനത്ത് ഹാജരാകാന്‍ ആവശ്യപ്പെട്ട് അന്വേഷണ സംഘം നോട്ടീസ് അയച്ചു. മുന്‍പ് ക്രൈംബ്രാഞ്ചിന് മുന്നില്‍ ഹാജരാകാന്‍ കഴിയില്ലെന്ന് പി.എസ്.സി. അറിയിക്കുകയും ചോദ്യം ചെയ്യലിനെതിരെ ഹൈക്കോടതിയെ സമീപിക്കുകയും ചെയ്തിരുന്നു. എന്നാല്‍ പി.എസ്.സിയുടെ ഈ ആവശ്യം ഹൈക്കോടതി തള്ളുകയായിരുന്നു.
ഇതിനിടെ, പി.എസ്.സി. ചെയര്‍മാനെയും അംഗങ്ങളെയും പുറത്താക്കണമെന്ന് ആവശ്യപ്പെട്ട് മുന്‍ ഗവര്‍ണര്‍ രാജേന്ദ്ര അര്‍ലേക്കര്‍ രാഷ്ട്രപതിക്ക് നല്‍കിയ ശുപാര്‍ശയില്‍ അടിയന്തിര നടപടികള്‍ വേണ്ടെന്ന് പി.എസ്.സി. യോഗം തീരുമാനിച്ചു. വിഷയത്തില്‍ രാഷ്ട്രപതിയുടെ തീരുമാനവും നിലപാടും പുറത്തുവന്നതിന് ശേഷം മാത്രം തുടര്‍ചര്‍ച്ചകള്‍ മതിയെന്നാണ് കമ്മീഷന്റെ നിലപാട്. ഗവര്‍ണര്‍ സമര്‍പ്പിച്ച ശുപാര്‍ശയുടെ പൂര്‍ണ്ണ വിവരങ്ങളോ രേഖകളോ കമ്മീഷന് ലഭ്യമാകാത്ത സാഹചര്യത്തിലാണ് ഈ വിലയിരുത്തല്‍.