പാപ്പായുടെ ശസ്ത്രക്രിയ ഇന്ന് റോമിലെ ജെമെല്ലി ആശുപത്രിയില്‍ നടക്കും
ലിയോ പതിനാലാമന്‍ പാപ്പായുടെ ശ്വാസകോശത്തില്‍ കണ്ടെത്തിയ മുഴ നീക്കം ചെയ്യുന്നതിനായുള്ള ശസ്ത്രക്രിയ, ഒക്ടോബര്‍ മാസം പതിമൂന്നാം തീയതി, റോമിലെ ജെമെല്ലി ആശുപത്രിയില്‍, പ്രാദേശിക സമയം വൈകുന്നേരം നടക്കും. പ്രാഥമിക ഘട്ടത്തിലുള്ളതും ഒരു പ്രത്യേക ഭാഗത്ത് മാത്രമായി ഒതുങ്ങിനില്‍ക്കുന്നതുമായ ഒരു മുഴയാണിതെന്നതു പാപ്പാ കഴിഞ്ഞ ദിവസം മധ്യാഹ്ന പ്രാര്‍ത്ഥന വേളയില്‍ വിശ്വാസികളെ അറിയിച്ചിരുന്നു. ശസ്ത്രക്രിയക്ക് ശേഷം, പാപ്പായുടെ വിശ്രമം കണക്കിലെടുത്തുകൊണ്ട്, ഒക്ടോബര്‍ 20 ചൊവ്വാഴ്ച വരെയുള്ള പാപ്പായുടെ എല്ലാ പൊതുപരിപാടികളും കൂടിക്കാഴ്ചകളും റദ്ദാക്കിയതായി വത്തിക്കാന്‍ അറിയിച്ചു.
ആരോഗ്യസ്ഥിതിയെ തുടര്‍ന്ന് വത്തിക്കാനില്‍ നടക്കുന്ന 'അമോറിസ് ലെതീത്സ്യ' 10-ാം വാര്‍ഷിക ഉച്ചകോടിയുടെ, ചില സമയ ക്രമങ്ങളിലും മാറ്റങ്ങള്‍ വരുത്തിയിട്ടുണ്ട്. ഒക്ടോബര്‍ മാസം പതിനാലാം തീയതി, ബുധനാഴ്ച്ച, വിശുദ്ധ പത്രോസിന്റെ ബസിലിക്കയില്‍ നടക്കുന്ന വിശുദ്ധ ബലിക്ക്, പാപ്പായ്ക്ക് പകരം, കര്‍ദിനാള്‍ സംഘത്തിന്റെ ഡീന്‍ കര്‍ദിനാള്‍ ലൂയിസ് അന്തോണിയോ താഗ്ലെ നേതൃത്വം നല്‍കും. അതുപോലെ, 'അമോറിസ് ലെതീത്സ്യ' ഉച്ചകോടിയുടെ അന്തിമ റിപ്പോര്‍ട്ടിന്റെ പ്രസിദ്ധീകരണവും മാറ്റിവച്ചിട്ടുണ്ട്.
പാപ്പായുടെ രോഗ സൗഖ്യത്തിനായി, ലോകമെമ്പാടും, കത്തോലിക്കാ സഭയിലെ അംഗങ്ങളും, ലോക നേതാക്കളും, വിവിധ പ്രാര്‍ത്ഥന സംഗമങ്ങള്‍ സംഘടിപ്പിച്ചിട്ടുണ്ട്. റോം രൂപതയുടെ നേതൃത്വത്തില്‍ ഇന്ന് (ഒക്ടോബര്‍ 13) വൈകുന്നേരം 6 മണിക്ക് ജെമെല്ലി ആശുപത്രിയിലെ വിശുദ്ധ ജോണ്‍ പോള്‍ രണ്ടാമന്‍ കപ്പേളയില്‍, റോം രൂപതയുടെ വികാരി കര്‍ദിനാള്‍ ബാള്‍ദോ റെയ്‌നയുടെ നേതൃത്വത്തില്‍, പ്രത്യേക ജപമാല പ്രാര്‍ത്ഥന നടക്കും, അതുപോലെ, വിവിധ ഇടവകകളിലും ജപമാല പ്രാര്‍ത്ഥന സംഘടിപ്പിച്ചിട്ടുണ്ട്.