പുതുവര്ഷത്തില് പ്രത്യാശയോടെ വിശ്വാസയാത്ര തുടരാന് ആഹ്വാനവുമായി ലിയോ പാപ്പാ
പുതുവര്ഷത്തില് പ്രത്യാശയോടെ വിശ്വാസയാത്ര തുടരാന് ആഹ്വാനവുമായി ലിയോ പാപ്പാ
തിരുവനന്തപുരം:ജൂബിലി വര്ഷം അവസാനിച്ചുവെങ്കിലും വിശ്വാസയാത്ര പ്രത്യാശയോടെ തുടരാമെന്ന് ലിയോ പതിനാലാമന് പാപ്പാ. 2026-ലെ ആദ്യ ബുധനായ ജനുവരി 7-ന് വത്തിക്കാനിലെ പോള് ആറാമന് ശാലയില് പൊതുകൂടിക്കാഴ്ച അനുവദിച്ച വേളയിലാണ്, ഈ കൂടിക്കാഴ്ചയുടെ അവസാന ഭാഗത്ത് ഇത്തരമൊരു ആഹ്വാനം പാപ്പാ മുന്നോട്ടുവച്ചത്.
രണ്ടാം വത്തിക്കാന് കൗണ്സിലിനെക്കുറിച്ചും കൗണ്സില് രേഖകളെക്കുറിച്ചുമുള്ള പുതുതായ ഒരു പഠനം ലക്ഷ്യമാക്കിയുള്ള ഉദ്ബോധനപരമ്പരയുടെ ആദ്യദിനം കൂടിയായിരുന്നു ഇത്തവണത്തെ പൊതുകൂടിക്കാഴ്ച.
പൊതുപ്രഭാഷണത്തിന് ശേഷം വിവിധ ഭാഷക്കാരായ ആളുകളെ അഭിവാദ്യം ചെയ്ത പാപ്പാ, ജര്മ്മന് ഭാഷക്കാരായ ആളുകളോട് സംസാരിക്കവെ, കഴിഞ്ഞ ദിവസം വിശുദ്ധ വാതില് അടയ്ക്കപ്പെട്ടതോടെ അവസാനിച്ച ജൂബിലി വര്ഷമെന്ന ഈ പ്രത്യേക കാലയളവില് ദൈവം നല്കിയ എല്ലാ കൃപകള്ക്കും നമുക്ക് നന്ദി പറയാമെന്ന് ആഹ്വാനം ചെയ്തു.
പുതുവര്ഷത്തില് പ്രത്യാശയോടെ വിശ്വാസയാത്രയില് തുടരാന് ഈ കൃപകള് നമ്മെ അനുഗ്രഹിക്കട്ടെയെന്നും പാപ്പാ ആശംസിച്ചു.
ഇറ്റാലിയന് ഭാഷക്കാരായ ആളുകളെ അഭിസംബോധന ചെയ്ത വേളയില്, യുവജനങ്ങളെയും രോഗികളെയും നവവധൂവരന്മാരെയും പ്രത്യേകം അഭിവാദ്യം ചെയ്ത പാപ്പാ, ക്രിസ്തുമസ് രഹസ്യത്തില് നാം ധ്യാനിക്കുന്ന യേശു, നാമാരംഭിച്ച പുതുവര്ഷത്തില് നമുക്കേവര്ക്കും ഉറപ്പുള്ള വഴികാട്ടിയാകട്ടെയെന്ന് ആശംസിച്ചു.
ഫ്രഞ്ച് ഭാഷക്കാരായ ആളുകളോട് സംസാരിക്കവെ, ജൂബിലി വര്ഷമെന്ന കൃപയുടെ സമയമാണ് നാം ജീവിച്ചതെന്ന ബോധ്യത്തില്, നമ്മെ നയിച്ച പ്രത്യാശ ഇല്ലാതാകാന് അനുവദിക്കാതിരിക്കാമെന്നും, ഇത് മാനവികതയോട് സുവിശേഷത്തിന്റെ സദ്വാര്ത്ത അറിയിക്കുന്നതിനായുള്ള കണ്ടുമുട്ടലിന് നമ്മെ നയിക്കുന്ന ഒരു മാനദണ്ഡവും വഴികാട്ടിയുമായി തുടരട്ടെയെന്നും പാപ്പാ ആശംസിച്ചു.
ക്രൈസ്തവര് സ്നേഹത്തിന്റേയും നീതിയുടേതും സമാധാനത്തിന്റേതുമായ ദൈവാരാജ്യത്തിന്റെ സുവിശേഷം ലോകത്തെങ്ങും സന്തോഷത്തോടെ എത്തിക്കാന് വിളിക്കപ്പെട്ടവരാണെന്ന്, അറബ് ഭാഷ സംസാരിക്കുന്ന ആളുകളെ അഭിസംബോധന ചെയ്ത വേളയില് പാപ്പാ ഓര്മ്മിപ്പിച്ചു.
ഏതാണ്ട് ഏഴായിരത്തോളം ആളുകളാണ് പരിശുദ്ധ പിതാവ് അനുവദിച്ച ഇത്തവണത്തെ പൊതുകൂടിക്കാഴ്ചയില് പങ്കെടുത്തത്.