പരിസ്ഥിതി – ആരോഗ്യ പ്രതിസന്ധി നേരിടുന്ന ഇറ്റലിയിലെ അസെറ നഗരം സന്ദർശിക്കാൻ ലെയോ പാപ്പ

ഇറ്റാലിയൻ മാഫിയ സംഘങ്ങൾ നിയമവിരുദ്ധമായി തള്ളിയ മാരക വിഷമാലിന്യങ്ങൾ മൂലം വൻ പരിസ്ഥിതി – ആരോഗ്യ പ്രതിസന്ധി നേരിടുന്ന ‘ലാൻഡ് ഓഫ് ഫയേഴ്സ്’ (തീയുടെ ദേശം) എന്നറിയപ്പെടുന്ന അസെറ ലെയോ പതിനാലാമൻ പാപ്പ സന്ദർശിക്കും. ദക്ഷിണ ഇറ്റലിയിൽ വലിയ തോതിൽ അർബുദ ബാധയ്ക്കും ജനന വൈകല്യങ്ങൾക്കും കാരണമായ പരിസ്ഥിതി ദുരന്തത്തിന്റെ കേന്ദ്രമാണ് അസെറ നഗരം.

​ഭൂമിയുടെ സംരക്ഷണത്തെക്കുറിച്ച് ഫ്രാൻസിസ് മാർപാപ്പ പുറപ്പെടുവിച്ച ‘ലൗദാത്തോ സി’ (Laudato Si’) എന്ന ചാക്രികലേഖനത്തിന്റെ വാർഷികത്തോടനുബന്ധിച്ചാണ് ഈ ചരിത്ര സന്ദർശനം. റോമിൽ നിന്ന് ഹെലികോപ്റ്റർ മാർഗം എത്തുന്ന പാപ്പ, മലിനീകരണം മൂലം അകാലത്തിൽ പ്രിയപ്പെട്ടവരെ നഷ്ടപ്പെട്ട കുടുംബങ്ങളുമായും രോഗബാധിതരുമായും കൂടിക്കാഴ്ച നടത്തും. തുടർന്ന് നഗര ചത്വരത്തിൽ ഒത്തുകൂടുന്ന ജനങ്ങളെയും ജനപ്രതിനിധികളെയും മാർപാപ്പ അഭിസംബോധന ചെയ്യും.

​ഇറ്റലിയിലെ വടക്കൻ മേഖലകളിലെ ഫാക്ടറികളിൽ നിന്നുള്ള ദശലക്ഷക്കണക്കിന് ടൺ വിഷമാലിന്യങ്ങളാണ് ‘കമോറ’ (Camorra) പോലുള്ള പ്രാദേശിക മാഫിയാ സംഘങ്ങൾ ഇവിടുത്തെ കാർഷിക മേഖലകളിൽ നിക്ഷേപിച്ചതും കത്തിച്ചതും. വായുവിലും ഭക്ഷണശൃംഖലയിലും ഡയോക്സിൻ ഉൾപ്പെടെയുള്ള മാരക വിഷാംശങ്ങൾ പടർന്നതോടെ ഈ പ്രദേശം ‘തീയുടെ ദേശം’ എന്ന പേരിലാണ് അറിയപ്പെടുന്നത്.

​അധികാരികളുടെ കണ്ണ് തുറപ്പിക്കാനും ദുരിതമനുഭവിക്കുന്ന ജനങ്ങൾക്ക് പ്രത്യാശ നൽകാനും മാർപാപ്പയുടെ സന്ദർശനം സഹായിക്കുമെന്ന് പ്രാദേശിക രൂപതാ നേതൃത്വവും സാമൂഹിക പ്രവർത്തകരും പ്രത്യാശ പ്രകടിപ്പിച്ചു.