ലെയോ പാപ്പയുടെ ഉറുഗ്വേ സന്ദര്‍ശനത്തിനായുള്ള ഔദ്യോഗിക ഗാനം പുറത്തിറക്കി
ലെയോ പതിനാലാമന്‍ മാര്‍പാപ്പയുടെ ഉറുഗ്വേയിലേക്കുള്ള അപ്പസ്‌തോലിക് സന്ദര്‍ശനത്തോടനുബന്ധിച്ചുള്ള ഔദ്യോഗിക ഗാനം ഉറുഗ്വേയിലെ കത്തോലിക്കാ സഭ പുറത്തിറക്കി. നവംബര്‍ ആറിന് രാജ്യത്തെത്തുന്ന മാര്‍പാപ്പ, രണ്ടുദിവസത്തെ പര്യടനത്തില്‍ മോണ്ടെവീഡിയോ, പൈസാണ്ടു, ഫ്‌ലോറിഡ എന്നീ നഗരങ്ങള്‍ സന്ദര്‍ശിക്കും.
'ഉനാ ഗ്രാന്‍ അലെഗ്രിയ' (ഒരു വലിയ സന്തോഷം) എന്ന് പേരിട്ടിരിക്കുന്ന ഈ ഗാനം ഡിയേഗോ മെലാനോ, സാന്തിയാഗോ സോറെസ് എന്നിവര്‍ ചേര്‍ന്നാണ് ചിട്ടപ്പെടുത്തിയത്. ഉറുഗ്വേയുടെ പരമ്പരാഗത സംഗീതശൈലികളായ മുര്‍ഗ (murga), കാന്‍ഡോംബെ (candombe), മിലോംഗ (milonga) എന്നിവയുടെ മനോഹരമായ സമ്മേളനമാണ് ഈ ഗാനം. ലൂക്കാസ് സുഗോ, കാതറിന്‍ വെര്‍ഗ്‌നസ്, ജോസഫിന ഡാമിയാനി, മാര്‍ക്കോസ് അഗ്യൂറോ, അഗസ് മാസ്, പെപെ ക്രെസ്‌പോ, ഡിയേഗോ മെലാനോ തുടങ്ങി രാജ്യത്തെ പ്രമുഖ കലാകാരന്മാര്‍ ചേര്‍ന്നാണ് ഈ ഗാനം ആലപിച്ചിരിക്കുന്നത്.
മാതേ (ഒരുതരം പരമ്പരാഗത പാനീയം), കാന്‍ഡോംബെ, ഫുട്‌ബോള്‍, കൊര്‍സോ, മുര്‍ഗ, പെരികോണ്‍ നൃത്തം തുടങ്ങിയ പ്രാദേശിക സംസ്‌കാരങ്ങളെയും, 'റാംബ്ല' പോലുള്ള പ്രശസ്തമായ സ്ഥലങ്ങളെയും ഗാനത്തില്‍ പരാമര്‍ശിക്കുന്നുണ്ട്. കൂടാതെ, ഉറുഗ്വേക്കാരുടെ സംരക്ഷക വിശുദ്ധയായ 'തേര്‍ട്ടി-ത്രീ കന്യകാമാതാവിനെ' (Virgin of the Thirty-Three) കുറിച്ചുള്ള പ്രത്യേക പരാമര്‍ശത്തിലൂടെ മാര്‍പാപ്പയെ സ്വീകരിക്കാന്‍ കാത്തിരിക്കുന്ന ജനങ്ങളുടെ ചിത്രവും ഗാനം വരച്ചുകാട്ടുന്നു.
'ഞാന്‍ നിങ്ങളോട് ഒരു വലിയ സന്തോഷം പ്രഖ്യാപിക്കുന്നു' എന്ന അപ്പസ്‌തോലിക് യാത്രയുടെ പ്രമേയത്തില്‍ നിന്നാണ് ഗാനത്തിന്റെ പേര് സ്വീകരിച്ചിരിക്കുന്നത്. സുവിശേഷം പ്രഘോഷിച്ചുകൊണ്ട് ഉറുഗ്വേയിലൂടെ സഞ്ചരിക്കുന്ന പുനരുത്ഥാനം ചെയ്ത യേശുക്രിസ്തു തരുന്ന പ്രത്യാശയെയാണ് ആനന്ദകരമായ ഈ ഈണം പ്രതിഫലിപ്പിക്കുന്നത്. ഈ ഗാനം ഇപ്പോള്‍ സ്‌പോട്ടിഫൈയില്‍ (Spotify) ലഭ്യമാണ്. ഇതിന്റെ മ്യൂസിക് വീഡിയോ ഉടന്‍ പുറത്തിറങ്ങും.