സ്കൂളിൽ നൃത്തപരിശീലനത്തിനിടെ കുഴഞ്ഞുവീണ പ്ലസ് വൺ വിദ്യാർഥിനി മരിച്ചു
Jul 31, 2026, 13:59 IST
തിരുവനന്തപുരം: സ്കൂളിലെ പരിപാടിയുമായി ബന്ധപ്പെട്ട നൃത്തപരിശീലനത്തിനിടെ കുഴഞ്ഞുവീണ പ്ലസ് വൺ വിദ്യാർഥിനി അന്തരിച്ചു. തിരുവല്ലം ക്രൈസ്റ്റ് നഗർ ഹയർ സെക്കൻഡറി സ്കൂളിലെ പ്ലസ് വൺ വിദ്യാർഥിനിയായ ആർ. ആവണി (16) ആണ് മരിച്ചത്.
വ്യാഴാഴ്ച വൈകിട്ട് മൂന്നോടെയായിരുന്നു സംഭവം. സഹപാഠികൾക്കൊപ്പം നൃത്തപരിശീലനം നടത്തുന്നതിനിടെ ആവണിക്ക് പെട്ടെന്ന് ദേഹാസ്വാസ്ഥ്യമുണ്ടാകുകയും കുഴഞ്ഞുവീഴുകയുമായിരുന്നു. സ്കൂൾ അധികൃതർ ഉടൻ തന്നെ വിദ്യാർഥിനിയെ അമ്പലത്തറയിലെ സ്വകാര്യ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല.
മുട്ടയ്ക്കാട് കോളിയൂർ ചുനക്കര രവീന്ദ്രൻ നായർ റോഡിലെ തിരുവാതിര വീട്ടിൽ സിറ്റി ഡിപ്പോയിലെ കണ്ടക്ടറായ അഭിലാഷിന്റെയും ക്രൈസ്റ്റ് നഗർ സ്കൂളിലെ ഹൈസ്കൂൾ അധ്യാപികയായ എസ്. രാജിയുടെയും മകളാണ്. അഥിതിയാണ് സഹോദരി.