ലെയോ പതിനാലാമന്‍ പാപ്പയോടുള്ള ബഹുമാനാര്‍ത്ഥം ഫിലിപ്പീന്‍സ് സ്റ്റാമ്പുകള്‍ പുറത്തിറക്കി

​​​​​​​

മനില: വിശുദ്ധ പത്രോസിന്റെ പിന്‍ഗാമിയായി സ്ഥാനമേറ്റ റോബര്‍ട്ട് ഫ്രാന്‍സിസ് പ്രെവോസ്റ്റ് എന്ന ലെയോ പതിനാലാമന്‍ പാപ്പയോടുള്ള ബഹുമാനാര്‍ത്ഥം ഫിലിപ്പീന്‍സ് പോസ്റ്റല്‍ കോര്‍പ്പറേഷന്‍ സ്മാരക സ്റ്റാമ്പ് പുറത്തിറക്കി. 

ലെയോ പാപ്പയുടെ മാര്‍പാപ്പ പദവിയുടെ 100-ാം ദിവസമായ ഓഗസ്റ്റ് 6ന് അനാച്ഛാദനം ചെയ്ത സ്റ്റാമ്പിന് വലിയ സ്വീകാര്യതയാണ് രാജ്യമെമ്പാടും ലഭിച്ചുക്കൊണ്ടിരിക്കുന്നത്.

ലെയോ പാപ്പയുടെ ഛായാചിത്രങ്ങളും അദ്ദേഹത്തിന്റെ പേപ്പല്‍ ചിഹ്നങ്ങളും ഉള്‍പ്പെടുത്തിയിരിക്കുന്ന സ്റ്റാമ്പില്‍ കാരുണ്യം, ഉള്‍ക്കൊള്ളല്‍, ഐക്യം എന്നിവയ്ക്കുള്ള അദ്ദേഹത്തിന്റെ ആഹ്വാനത്തെ അടിവരയിടുന്നു. ആദ്യഘട്ടത്തില്‍ 10,000 കോപ്പികളാണ് പുറത്തിറക്കിയിരിക്കുന്നത്.

 ഓരോന്നിനും ?17 (നിലവിലെ വിനിമയ നിരക്കില്‍ ഏകദേശം $0.30) വിലയാണ് ഈടാക്കുന്നത്. മനില സെന്‍ട്രല്‍ പോസ്റ്റ് ഓഫീസിലെ പോസ്റ്റ്ഷോപ്പില്‍ പാപ്പയുടെ ചിത്രമുള്ള കവറുകളും പരിമിതമായ വിധത്തില്‍ ലഭ്യമാക്കിയിരുന്നു.

രാജ്യത്തിന്റെ പൈതൃകം സംരക്ഷിക്കുക എന്ന ദൗത്യത്തെ ഓര്‍മ്മിപ്പിക്കുന്നതാണ് സ്റ്റാമ്പ് പ്രകാശനമെന്ന് ഫിലിപ്പീന്‍സ് പോസ്റ്റല്‍ കോര്‍പ്പറേഷന്‍ ഉദ്യോഗസ്ഥര്‍ പറഞ്ഞു.

 വിശുദ്ധ ജോണ്‍ പോള്‍ രണ്ടാമന്‍ പാപ്പ, ബെനഡിക്ട് പതിനാറാമന്‍ പാപ്പ, ഫ്രാന്‍സിസ് പാപ്പ എന്നിവരുടെ അനുസ്മരണാര്‍ത്ഥം പുറത്തിറക്കിയ മുന്‍കാല പേപ്പല്‍ സ്റ്റാമ്പുകള്‍ ദേശീയ, അന്തര്‍ദേശീയ ശേഖരങ്ങളില്‍ അമൂല്യമായി ഇന്നും നിലനില്‍ക്കുന്നുണ്ട്. ജനസംഖ്യയുടെ 80% കത്തോലിക്ക വിശ്വാസികളുള്ള ഏക ഏഷ്യന്‍ രാജ്യമാണ് ഫിലിപ്പീന്‍സ്.