പാര്ലമെന്റ് നടപടികള് ഇനി മലയാളത്തിലും; 22 ഭാഷകളില് എഐ വിവര്ത്തനം
ന്യൂഡല്ഹി: അടുത്ത വര്ഷം മുതല് പാര്ലമെന്റ് നടപടികള് മലയാളം ഉള്പ്പെടെയുള്ള 22 ഔദ്യോഗിക ഭാഷകളില് ലഭ്യമാക്കാന് കേന്ദ്ര സര്ക്കാര് ഒരുങ്ങുന്നു.
ആര്ട്ടിഫിഷ്യല് ഇന്റലിജന്സ് സാങ്കേതികവിദ്യയുടെ സഹായത്തോടെയാണ് ഈ വിപ്ലവകരമായ മാറ്റം നടപ്പിലാക്കുന്നത്.
സഭയിലെ ചര്ച്ചകള് തത്സമയം വിവര്ത്തനം ചെയ്യുന്നതിലൂടെ വിവിധ ഭാഷകള് സംസാരിക്കുന്ന ജനങ്ങള്ക്ക് പാര്ലമെന്റ് നടപടികള് സ്വന്തം മാതൃഭാഷയില് തന്നെ തടസ്സമില്ലാതെ മനസ്സിലാക്കാന് സാധിക്കും.
സഭയിലെ പ്രസംഗങ്ങള്ക്കും ചര്ച്ചകള്ക്കും പുറമെ, സഭാ രേഖകളും മറ്റ് ഔദ്യോഗിക പേപ്പര് വര്ക്കുകളും ഈ പദ്ധതിയുടെ ഭാഗമായി വിവര്ത്തനം ചെയ്യും. നിലവില് ഹിന്ദിയിലും ഇംഗ്ലീഷിലും മാത്രമായി പരിമിതപ്പെട്ടിരിക്കുന്ന സഭാ രേഖകള് ഇതോടെ രാജ്യത്തെ എല്ലാ പ്രധാന പ്രാദേശിക ഭാഷകളിലേക്കും മാറ്റപ്പെടും. ഡിജിറ്റല് ഇന്ത്യ പദ്ധതിയുടെ ഭാഗമായുള്ള ഈ നീക്കം ഭരണനിര്വ്വഹണത്തില് കൂടുതല് സുതാര്യത കൊണ്ടുവരാന് സഹായിക്കുമെന്ന് അധികൃതര് വിലയിരുത്തുന്നു.
ആധുനിക സാങ്കേതികവിദ്യയുടെ സഹായത്തോടെ ഭാഷാപരമായ തടസ്സങ്ങള് നീക്കി ജനപ്രതിനിധികള്ക്കും സാധാരണക്കാര്ക്കും സഭാ കാര്യങ്ങള് ലളിതമായി ലഭ്യമാക്കുക എന്നതാണ് ഈ പദ്ധതിയുടെ പ്രധാന ലക്ഷ്യം.
ഓരോ സംസ്ഥാനത്തെയും ജനങ്ങള്ക്ക് തങ്ങളുടെ പ്രതിനിധികള് പാര്ലമെന്റില് നടത്തുന്ന ഇടപെടലുകള് കൃത്യമായി നിരീക്ഷിക്കാനും ഇതിലൂടെ സാധിക്കും.
പദ്ധതിയുടെ പ്രാരംഭ പ്രവര്ത്തനങ്ങള് ഇതിനോടകം തന്നെ ആരംഭിച്ചു കഴിഞ്ഞു.