ദീര്‍ഘകാല രോഗങ്ങള്‍ കണ്ടെത്തുന്ന ഘട്ടം മുതല്‍ പാലിയേറ്റീവ് പരിചരണം; 'ഹൃദയരാഗം' പദ്ധതി 140 മണ്ഡലങ്ങളിലേക്കും വ്യാപിപ്പിക്കുമെന്ന് മന്ത്രി കെ. മുരളീധരന്‍
തിരുവനന്തപുരം: രോഗാവസ്ഥയുടെ അവസാനഘട്ടത്തില്‍ മാത്രമല്ല, ദീര്‍ഘകാല രോഗങ്ങള്‍ കണ്ടെത്തുന്ന ആദ്യ ഘട്ടം മുതല്‍ തന്നെ പാലിയേറ്റീവ് പരിചരണം ലഭ്യമാക്കുന്ന ശക്തമായ സംവിധാനം വികസിപ്പിച്ചെടുക്കാനാണ് സര്‍ക്കാര്‍ ലക്ഷ്യമിടുന്നതെന്ന് ആരോഗ്യമന്ത്രി കെ. മുരളീധരന്‍.
സത്യന്‍ സ്മാരക ഹാളില്‍ നടന്ന ലോക പാലിയേറ്റീവ് ദിനാചരണ സംസ്ഥാനതല ഉദ്ഘാടനവും രോഗീസംഗമവും നിര്‍വ്വഹിച്ചു സംസാരിക്കുകയായിരുന്നു അദ്ദേഹം.
ആരോഗ്യപ്രവര്‍ത്തകര്‍ വീടുകളിലെത്തി രോഗനിര്‍ണ്ണയ പരിശോധനകള്‍ നടത്തുന്ന 'ഹൃദയരാഗം' പദ്ധതി നിലവില്‍ ഇടുക്കി, നിലമ്പൂര്‍, വട്ടിയൂര്‍ക്കാവ് നിയോജക മണ്ഡലങ്ങളില്‍ പരീക്ഷണാടിസ്ഥാനത്തില്‍ നടപ്പാക്കുകയാണെന്നും പദ്ധതി വിജയകരമായാല്‍ സംസ്ഥാനത്തെ 140 നിയോജക മണ്ഡലങ്ങളിലേക്കും വ്യാപിപ്പിച്ച് പാലിയേറ്റീവ് പരിചരണവുമായി ബന്ധിപ്പിക്കുമെന്നും മന്ത്രി വ്യക്തമാക്കി.
പാലിയേറ്റീവ് പരിചരണ രംഗത്ത് രാജ്യത്തിന് തന്നെ മാതൃകയായ സംസ്ഥാനമാണ് കേരളം എന്നത് ഏറെ അഭിമാനകരമായ നേട്ടമാണെന്ന് മന്ത്രി കൂട്ടിച്ചേര്‍ത്തു. കേവലം ഒരു കാരുണ്യപ്രവര്‍ത്തനം എന്നതിനപ്പുറം അവകാശാധിഷ്ഠിതവും ജനകീയവുമായ ഒരു ആരോഗ്യപ്രവര്‍ത്തനമായി ഇതിനെ വികസിപ്പിക്കാന്‍ കേരളത്തിന് സാധിച്ചിട്ടുണ്ട്.
ശാരീരിക ബുദ്ധിമുട്ടുകള്‍ കുറയ്ക്കുന്നതിനോടൊപ്പം രോഗികള്‍ക്കും അവരുടെ കുടുംബങ്ങള്‍ക്കും ആവശ്യമായ മാനസികവും സാമൂഹികവുമായ പിന്തുണ കൂടി ഉറപ്പാക്കാന്‍ നമ്മുടെ പാലിയേറ്റീവ് ശൃംഖലയ്ക്ക് കഴിയുന്നുണ്ടെന്ന് അദ്ദേഹം ചൂണ്ടിക്കാട്ടി.
പ്രാഥമിക ആരോഗ്യസംവിധാനത്തെയും പാലിയേറ്റീവ് പരിചരണത്തെയും കൂടുതല്‍ ശക്തമായി ബന്ധിപ്പിക്കേണ്ടതുണ്ടെന്നും യുവതലമുറ കൂടുതലായി ഈ രംഗത്തേക്ക് കടന്നുവരുന്നത് സ്വാഗതാര്‍ഹമാണെന്നും മന്ത്രി അഭിപ്രായപ്പെട്ടു.
ഇതിന്റെ ഭാഗമായി എസ്.എസ്.എല്‍.സി പാസായവര്‍ക്കായി ആരോഗ്യസര്‍വകലാശാലയില്‍ പാലിയേറ്റീവ് പരിചരണത്തില്‍ പ്രത്യേക സര്‍ട്ടിഫിക്കറ്റ് കോഴ്സ് ഒരുക്കിയിട്ടുണ്ടെന്നും അദ്ദേഹം അറിയിച്ചു.
വാര്‍ഡ് കൗണ്‍സലര്‍ ഷേര്‍ളി എസ് അധ്യക്ഷത വഹിച്ച ചടങ്ങില്‍ ആരോഗ്യവകുപ്പ് അഡീഷണല്‍ ഡയറക്ടര്‍ ഡോ. റീത്ത, രോഗികള്‍, സന്നദ്ധ പ്രവര്‍ത്തകര്‍ തുടങ്ങിയവര്‍ പങ്കെടുത്തു.