ഏറ്റുമാനൂര്‍ പുന്നത്തുറയില്‍ നിയന്ത്രണം നഷ്ടമായ 108 ആംബുലന്‍സ് കാറില്‍ ഇടിച്ച് മറിഞ്ഞ് നഴ്സ് മരിച്ചു. ആംബുലന്‍സ് ഡ്രൈവറും രോഗികളും അടക്കം മൂന്നു പേര്‍ക്ക് പരിക്ക്
ഏറ്റുമാനൂര്‍: പുന്നത്തുറയില്‍ നിയന്ത്രണം നഷ്ടമായ 108 ആംബുലന്‍സ് കാറില്‍ ഇടിച്ച് മറിഞ്ഞ് നഴ്സ് മരിച്ചു. അപകടത്തില്‍ ആംബുലന്‍സ് ഡ്രൈവറും രോഗികളും അടക്കം മൂന്നു പേര്‍ക്ക് പരിക്കേറ്റു.
കട്ടപ്പന സ്വദേശിയായ മെയില്‍ നഴ്സ് ജിതിന്‍ ആണ് മരിച്ചത്. പരിക്കേറ്റ ആംബുലന്‍സ് യാത്രക്കാരായ ഇടുക്കി നെടുങ്കണ്ടം സ്വദേശികളായ ഷിനി, തങ്കമ്മ എന്നിവരെ കോട്ടയം മെഡിക്കല്‍ കോളേജ് ആശുപത്രിയില്‍ പ്രവേശിപ്പിച്ചു.
ഇന്ന് ഉച്ചയ്ക്ക് രണ്ടരയോടെ ഏറ്റുമാനൂര്‍ പാലാ റോഡില്‍ പുന്നത്തുറ കവലയ്ക്ക് സമീപമായിരുന്നു സംഭവം. ഇടുക്കിയില്‍ നിന്നും രോഗിയെയുമായി എത്തിയ 108 ആംബുലന്‍സ് നിയന്ത്രണം നഷ്ടമായി റോഡരികില്‍ നിന്നും തെന്നി മാറി എതിര്‍ ദിശയില്‍ നിന്നും എത്തിയ കാറില്‍ ഇടിച്ച് മറിയുകയായിരുന്നു.
അപകടത്തില്‍ ആംബുലന്‍സിന്റെ ഒരു ഭാഗം പൂര്‍ണമായും തകര്‍ന്നു. കാറിനും സാരമായി കേടുപാടുകള്‍ സംഭവിച്ചിട്ടുണ്ട്. ഓടിക്കൂടിയ നാട്ടുകാര്‍ ചേര്‍ന്നാണ് പരിക്കേറ്റവരെ മൂന്നു വാഹനങ്ങളിലായി ആശുപത്രിയിലേയ്ക്കി മാറ്റിയത്. പരിക്കേറ്റവരുടെ നില ഗുരുതരമല്ല. അപകടത്തെ തുടര്‍ന്ന് ഏറ്റുമാനൂര്‍ പാലാ റോഡില്‍ ഗതാഗത തടസവും ഉണ്ടായി.