അണ്വായുധ ഭീഷണി ലോകത്തെ വെല്ലുവിളിക്കുന്നു: ആര്‍ച്ചുബിഷപ്പ് കാച്ച
വത്തിക്കാന്‍: ന്യൂയോര്‍ക്കില്‍, അന്താരാഷ്ട്ര ആണവ പരീക്ഷണങ്ങള്‍ക്കെതിരായ ദിനത്തോടനുബന്ധിച്ച് നടന്ന ഐക്യരാഷ്ട്ര പൊതുസഭയുടെ ഉന്നതതല യോഗത്തില്‍, പരിശുദ്ധ സിംഹാസനത്തിന്റെ സ്ഥിരം നിരീക്ഷകനായ ആര്‍ച്ച് ബിഷപ്പ് ഗബ്രിയേലെ കാച്ച പ്രസ്താവന നടത്തി.
വര്‍ദ്ധിച്ചുവരുന്ന വിനാശകരമായ ആയുധങ്ങളുടെ ആശങ്കാജനകമായ ശേഖരം, സമാധാനത്തിലേക്ക് മുന്നേറുന്നതിനുപകരം, ലോകം വിപരീത ദിശയിലേക്ക് നീങ്ങുന്നതായി തോന്നിപ്പിക്കുന്നുവെന്നു പ്രസ്താവനയില്‍ പറഞ്ഞു.
എണ്‍പത് വര്‍ഷങ്ങള്‍ക്ക് മുമ്പ് ആദ്യത്തെ ആണവായുധത്തിന്റെ സ്‌ഫോടനം ലോകത്തെ അഭൂതപൂര്‍വമായ ഒരു വിനാശകരമായ അവസ്ഥയിലേക്ക് കൊണ്ടുവന്നതും, ചരിത്രത്തിന്റെ ഗതി മാറ്റിമറിച്ചുകൊണ്ട്, ഗുരുതരമായ പ്രത്യാഘാതങ്ങള്‍ സൃഷ്ടിച്ചുകൊണ്ട് മനുഷ്യരാശിയുടെമേല്‍ നിഴല്‍ വീഴ്ത്തിയതിനെയും ആര്‍ച്ചുബിഷപ്പ് പരാമര്‍ശിച്ചു.
ആണവ പ്രതിരോധത്തിന്റെ യുക്തിയിലൂടെ സമാധാനവും സുരക്ഷയും നിലനിര്‍ത്താന്‍ കഴിയുമെന്ന ചിന്ത, ഇന്നും ധാര്‍മ്മിക യുക്തിയെയും അന്താരാഷ്ട്ര മനസ്സാക്ഷിയെയും വെല്ലുവിളിക്കുന്നതാണെന്നും ആര്‍ച്ചുബിഷപ്പ് ചൂണ്ടിക്കാട്ടി.
1945 ജൂലൈ 16-ന് നടന്ന ആദ്യ ആണവ പരീക്ഷണത്തിനുശേഷം, അന്തരീക്ഷത്തിലും, ഭൂമിക്കടിയിലും, സമുദ്രങ്ങളിലും, കരയിലും രണ്ടായിരത്തിലധികം ആണവ പരീക്ഷണങ്ങള്‍ നടത്തിയിട്ടുണ്ടെന്നും, അവ മനുഷ്യരാശിയെ, പ്രത്യേകിച്ച്, തദ്ദേശീയ ജനതയെയും, സ്ത്രീകളെയും, കുട്ടികളെയും, ഗര്‍ഭസ്ഥ ശിശുക്കളെയും സാരമായി ബാധിച്ചിട്ടുണ്ടെന്നും ആര്‍ച്ചുബിഷപ്പ് കാച്ച ഓര്‍മ്മപ്പെടുത്തി.
ഇക്കാരണത്താല്‍, കഴിഞ്ഞ കാലത്തെ ഭയാനകമായ അനുഭവങ്ങള്‍ ആവര്‍ത്തിക്കാതിരിക്കാന്‍ അടിയന്തിരമായി നടപടികള്‍ സ്വീകരിക്കണം എന്നതാണ് പരിശുദ്ധ സിംഹാസനത്തിന്റെ നിലപാടെന്നതും ആര്‍ച്ചുബിഷപ്പ് അടിവരയിട്ടു.
വര്‍ധിച്ചുവരുന്ന സൈനിക ചിലവ്, പലപ്പോഴും സമഗ്രമായ മനുഷ്യ വികസനത്തിനും പൊതുനന്മയുടെ ഉന്നമനത്തിനുമുള്ള നിക്ഷേപത്തിന് ഹാനികരമാണെന്നും ആര്‍ച്ചുബിഷപ്പ് എടുത്തു പറഞ്ഞു.