പോളണ്ടിൽ നിന്നുള്ള ഒൻപത് സലേഷ്യൻ വൈദികർ വാഴ്ത്തപ്പെട്ട പദവിയിലേക്ക്

രണ്ടാം ലോകമഹായുദ്ധകാലത്ത് നാസിപ്പട ക്രൂരമായി കൊലപ്പെടുത്തിയ ഒൻപത് സലേഷ്യൻ വൈദികരെ ഇന്ന് (ജൂൺ 6) പോളണ്ടിലെ ക്രാക്കോവിലുള്ള സെന്റ് ജോൺ പോൾ രണ്ടാമൻ തീർഥാടന കേന്ദ്രത്തിൽ വച്ച് വാഴ്ത്തപ്പെട്ട പദവിയിലേക്ക് ഉയർത്തുന്നു. മാർപാപ്പയാകുന്നതിന് മുൻപ് വി. ജോൺ പോൾ രണ്ടാമൻ പാപ്പ ഈ രക്തസാക്ഷികളിൽ ചിലരെ നാസികൾ അറസ്റ്റ് ചെയ്യുന്നതിന് നേരിട്ട് സാക്ഷിയായിരുന്നു. ഇവരുടെ അടിയുറച്ച വിശ്വാസവും വൈദിക ജീവിതത്തോടുള്ള വിശ്വസ്തതയും അദ്ദേഹത്തിന്റെ ദൈവവിളി രൂപപ്പെടുന്നതിൽ വലിയ സ്വാധീനം ചെലുത്തിയിട്ടുണ്ടാകാമെന്നാണ് കരുതപ്പെടുന്നത്.

ഇടവക ശുശ്രൂഷകളിലും വിദ്യാഭ്യാസ മേഖലയിലും സജീവമായിരുന്ന സലേഷ്യൻ വൈദികരായിരുന്നു ഈ ഒൻപതുപേരും. രണ്ടാം ലോകമഹായുദ്ധം പൊട്ടിപ്പുറപ്പെട്ടപ്പോൾ, കത്തോലിക്കാ വൈദികർ എന്ന ഒരൊറ്റ കാരണത്താലാണ് ഇവർ അറസ്റ്റ് ചെയ്യപ്പെട്ടത്. യാതൊരുവിധ രാഷ്ട്രീയ അല്ലെങ്കിൽ സൈനിക പ്രവർത്തനങ്ങളിലും ഇവർ പങ്കാളികളായിരുന്നില്ല. എങ്കിലും ഇവരുടെ ആത്മീയ പ്രവർത്തനങ്ങൾ നാസി ഭരണകൂടം തങ്ങൾക്ക് ഭീഷണിയായി കണ്ടു.

കോൺസെൻട്രേഷൻ ക്യാമ്പുകളിലെ പട്ടിണിയും പീഡനങ്ങളും അപമാനങ്ങളും സഹിക്കുമ്പോഴും ഇവർ തങ്ങളുടെ ദൈവവിളിയിൽ വിശ്വസ്തരായി നിലകൊണ്ടു. കൂടെയുണ്ടായിരുന്ന തടവുകാരെ ആശ്വസിപ്പിക്കാനും അവർക്കായി പ്രാർഥിക്കാനും തത്പരരായിരുന്നു. ക്രൈസ്തവ വിശ്വാസത്തോടുള്ള വിദ്വേഷം കാരണമാണ് ഇവർ വധിക്കപ്പെട്ടത്.

ക്രാക്കോവിലുള്ള സെന്റ് ജോൺ പോൾ രണ്ടാമൻ തീർഥാടന കേന്ദ്രത്തിൽ വച്ചാണ് വാഴ്ത്തപ്പെട്ട പദവി പ്രഖ്യാപന ചടങ്ങുകൾ നടക്കുന്നത്. യുദ്ധകാലത്ത് ക്രാക്കോവിലെ ദെബ്നിക്കി (Dębniki) എന്ന സ്ഥലത്ത് താമസിച്ചിരുന്ന യുവാവായ കാരോൾ വോയ്റ്റീവ, ഒൻപതിൽ ആറ് വൈദികരെയും ജർമ്മൻകാർ അറസ്റ്റ് ചെയ്യുന്നത് നേരിട്ട് കണ്ടിരുന്നു. പിന്നീട് ഇവരെ ദാഹാവു (Dachau) കോൺസെൻട്രേഷൻ ക്യാമ്പിലേക്ക് നാടുകടത്തി. ഈ സംഭവം അദ്ദേഹത്തിന്റെ മനസ്സിൽ ആഴത്തിലുള്ള മുറിവാണ് ഉണ്ടാക്കിയത്. വൈദിക ജീവിതത്തിലേക്ക് അദ്ദേഹത്തെ നയിച്ച പ്രധാന സംഭവങ്ങളിൽ ഒന്നുകൂടിയായിരുന്നു ഇത്.

“വിശുദ്ധ ജോൺ പോൾ രണ്ടാമൻ മാർപാപ്പയുടെ വൈദിക ദൈവവിളി രൂപപ്പെട്ടത് ഇവരുടെ രക്തസാക്ഷിത്വത്തിൽ നിന്നാണെന്ന് ഞാൻ ഉറച്ചു വിശ്വസിക്കുന്നു,” എന്ന് ക്രാക്കോവ് ആർച്ചുബിഷപ്പ് കർദ്ദിനാൾ ഗ്രസെഗോർസ് റൈസ് (Grzegorz Ryś) പറഞ്ഞു. ഇടയന്മാരില്ലാത്ത ഒരു സഭ അനുഭവിക്കുന്ന നഷ്ടം എത്ര വലുതാണെന്ന് യുവ വോയ്റ്റീവ അന്ന് നേരിട്ടറിഞ്ഞിരുന്നുവെന്നും കർദിനാൾ അനുസ്മരിച്ചു.

ഫാ. ജാൻ സ്വീർക്, ഫാ. ഇഗ്നാസി അന്തോനോവിച്ച്, ഫാ. കാരോൾ ഗോൾഡ, ഫാ. വ്ലോഡ്സിമിയർസ് സെംബെക്, ഫാ. ഫ്രാൻസിഷെക് ഹരാസിം, ഫാ. ലുഡ്വിക് മ്രോചെക്, ഫാ. ഇഗ്നാസി ഡോബിയാസ്, ഫാ. കാസിമിയർസ് വോയ്ചെഹോവ്സ്കി, ഫാ. ഫ്രാൻസിഷെക് മിഷ്ക എന്നിവരാണ് 1941-നും 1942-നും ഇടയിൽ ഔഷ്വിറ്റ്സ്, ഡാഹാവു എന്നീ ജർമ്മൻ നാസി ക്യാമ്പുകളിൽ ക്രൂരമായി കൊല്ലപ്പെട്ടത്. 2025 ഒക്ടോബർ 24-നാണ് ലെയോ പതിനാലാമൻ മാർപാപ്പ ഇവരുടെ രക്തസാക്ഷിത്വം അംഗീകരിക്കുന്ന ഡിക്രിക്ക് അനുമതി നൽകിയത്.

ഈ ഒൻപത് സലേഷ്യൻ വൈദികരുടെ വാഴ്ത്തപ്പെട്ട പദവി പ്രഖ്യാപനം, രണ്ടാം ലോകമഹായുദ്ധത്തിലെ രക്തസാക്ഷികൾക്കുള്ള ആദരവ് മാത്രമല്ല, വിശ്വാസത്തിലുള്ള ഉറപ്പും ദൈവവിളിയിലെ വിശ്വസ്തതയും ഭാവി തലമുറകൾക്ക് എക്കാലവും പ്രതീക്ഷയുടെ ഉറവിടമായിരിക്കുമെന്ന ഓർമ്മപ്പെടുത്തൽ കൂടിയാണ്.