തട്ടിക്കൊണ്ടുപോയ അധ്യാപകരെയും വിദ്യാർഥികളെയും ഉടൻ മോചിപ്പിക്കണം: നൈജീരിയയിലെ കത്തോലിക്കാ ബിഷപ്പുമാർ

നൈജീരിയയിലെ ഓയോ സംസ്ഥാനത്തുള്ള ഒരിറെ ലോക്കൽ ഗവൺമെന്റ് ഏരിയയിലെ സ്കൂളുകൾക്ക് നേരെ മെയ് 15-നുണ്ടായ സായുധ കൊള്ളക്കാരുടെ ആക്രമണത്തിൽ തട്ടിക്കൊണ്ടുപോകപ്പെട്ട 39 വിദ്യാർഥികളെയും ഏഴ് അധ്യാപകരെയും ഉടൻ മോചിപ്പിക്കണമെന്ന് നൈജീരിയയിലെ ഇബാദാൻ എക്ലസിയാസ്റ്റിക്കൽ പ്രൊവിൻസിലെ (IEP) കത്തോലിക്കാ ബിഷപ്പുമാർ ആവശ്യപ്പെട്ടു. ജൂൺ 22 തിങ്കളാഴ്ച പുറത്തിറക്കിയ പ്രസ്താവനയിലൂടെയാണ് അവർ ഈ ആവശ്യം ഉന്നയിച്ചത്.

ഇബാദാൻ കത്തോലിക്കാ അതിരൂപതയിലെയും എകിറ്റി, ഇലോറിൻ, ഒണ്ടോ, ഓയോ രൂപതകളിലെയും ബിഷപ്പുമാർ, തട്ടിക്കൊണ്ടുപോകപ്പെട്ടവർ ദീർഘനാളായി തടവിലാക്കപ്പെട്ടിരിക്കുന്നതിൽ അനുശോചിക്കുകയും വർധിച്ചുവരുന്ന സുരക്ഷാ തകർച്ച തടയുന്നതിൽ സർക്കാരിനുള്ള പരാജയത്തെ അപലപിക്കുകയും ചെയ്തു. “39 വിദ്യാർഥികളെയും ഏഴ് അധ്യാപകരെയും തട്ടിക്കൊണ്ടുപോയിട്ട് ഇപ്പോൾ ഒരു മാസത്തിലേറെയായി” – പ്രസ്താവനയിൽ ബിഷപ്പുമാർ ചൂണ്ടിക്കാട്ടി. ഇരകളായവരിൽ രണ്ടു വയസ്സുള്ള കുട്ടികൾ ഉൾപ്പെടെയുള്ള ഏറ്റവും പ്രായം കുറഞ്ഞവരുടെ ദുരവസ്ഥയും അവർ എടുത്തുപറഞ്ഞു.

“തങ്ങൾക്ക് എന്താണ് സംഭവിച്ചതെന്ന് പോലും കൃത്യമായി തിരിച്ചറിയാൻ കഴിയാത്ത ആ കുട്ടികൾ കഴിഞ്ഞ ഒരു മാസത്തിലേറെയായി വീടില്ലാതെ, നല്ല ഭക്ഷണമില്ലാതെ, വനത്തിലെ കഠിനമായ കാലാവസ്ഥയെ പൂർണ്ണമായും അഭിമുഖീകരിച്ച് ഏറ്റവും മോശമായ സാഹചര്യങ്ങളിലാണ് ജീവിക്കുന്നത്,” ബിഷപ്പുമാർ പറഞ്ഞു.

തട്ടിക്കൊണ്ടുപോകപ്പെട്ടവർ “ഏറ്റവും ക്രൂരരും ദയയില്ലാത്തവരുമായ കുറ്റവാളികളുടെ” കൈകളിലാണെന്ന് ബിഷപ്പുമാർ സങ്കടത്തോടെ ഓർമ്മിപ്പിച്ചു. ആക്രമണത്തിനിടയിൽ ഒരു അധ്യാപകനെയും ഒരു മോട്ടോർ സൈക്കിൾ യാത്രക്കാരനെയും കൊലപ്പെടുത്തുകയും, പിന്നീട് വനത്തിനുള്ളിൽ വച്ച് മറ്റൊരു അധ്യാപകന്റെ തലയറുക്കുകയും ചെയ്ത ഈ കൊള്ളക്കാരുടെ പ്രവൃത്തിയെ “മൃഗീയമായത്” എന്നാണ് സഭാ നേതാക്കൾ വിശേഷിപ്പിച്ചത്.

ഫെഡറൽ, സംസ്ഥാന അധികാരികളുടെ ആവർത്തിച്ചുള്ള ഉറപ്പുകൾ ഉണ്ടായിരുന്നിട്ടും നൈജീരിയയിലുടനീളം സുരക്ഷാ സാഹചര്യം കൂടുതൽ വഷളായിക്കൊണ്ടിരിക്കുകയാണെന്ന് ബിഷപ്പുമാർ തങ്ങളുടെ പ്രസ്താവനയിൽ ചൂണ്ടിക്കാണിച്ചു. ഇരകളുടെ കുടുംബങ്ങൾ അനിശ്ചിതത്വത്തിന്റെ കഠിനമായ വേദന അനുഭവിക്കുമ്പോൾ തങ്ങൾക്ക് ഇനി മിണ്ടാതിരിക്കാൻ കഴിയില്ലെന്നും അവർ പറഞ്ഞു.

മനുഷ്യജീവന്റെ വിശുദ്ധിക്ക് നേരെയും സാമൂഹിക വ്യവസ്ഥിതിക്ക് നേരെയും ഉണ്ടായ ക്രൂരമായ കടന്നുകയറ്റത്തെ ബിഷപ്പുമാർ അപലപിച്ചു. ഒപ്പം, രാജ്യത്ത് ആവർത്തിച്ചുണ്ടാകുന്ന ഇത്തരം തട്ടിക്കൊണ്ടുപോകലുകൾ തടയുന്നതിൽ സർക്കാർ അധികാരികൾ പുലർത്തുന്ന നിസ്സംഗതയിൽ അവർ ശക്തമായ അമർഷം രേഖപ്പെടുത്തുകയും ചെയ്തു.