നേപ്പാളിലെ 'ജനറേഷന്‍ സീ' പ്രതിഷേധം; ഫ്‌ലൈദുബായ് വിമാനങ്ങള്‍ റദ്ദാക്കി
ദുബായ്: ദുബായ്-നേപ്പാള്‍ വിമാന സര്‍വീസുകള്‍ റദ്ദാക്കി. നേപ്പാളിലെ 'ജനറേഷന്‍ സീ' പ്രതിഷേധത്തെ തുടര്‍ന്ന് കാഠ്മണ്ഡു വിമാനത്താവളം അടച്ചതോടെയാണ് സര്‍വീസുകള്‍ റദ്ദാക്കിയത്. ഇതേ തുടര്‍ന്ന് ഫ്‌ലൈ ദുബായ് വിമാനങ്ങളടക്കം റദ്ദാക്കുകയും വഴിതിരിച്ചുവിടുകയും ചെയ്തു.
ഇന്ന് ദുബായ് രാജ്യാന്തര വിമാനത്താവളത്തില്‍ നിന്ന് കാഠ്മണ്ഡുവിലേക്ക് പുറപ്പെട്ട ഫ്‌ലൈദുബായ് എഫ് ഇസെഡ് 539 വിമാനം വഴിതിരിച്ചുവിട്ട് ലഖ്‌നൗവിലേക്ക് അയച്ചതായി ഫ്‌ലൈദുബായ് വക്താവ് അറിയിച്ചു. കാഠ്മണ്ഡുവില്‍ നിന്ന് ദുബായിലേക്കുള്ള എഫ് ഇസെഡ് 540 വിമാനവുംഎഫ് ഇസെഡ് 573/574, എഫ് ഇസെഡ് 575/576 എന്നീ വിമാനങ്ങളും റദ്ദാക്കി.
വിമാനം റദ്ദാക്കിയതോടെ ബുദ്ധിമുട്ടിലായ യാത്രക്കാര്‍ക്ക് ആവശ്യമായ താമസസൗകര്യങ്ങള്‍ ഒരുക്കി നല്‍കുമെന്നും അടുത്ത ലഭ്യമായ വിമാനങ്ങളില്‍ ടിക്കറ്റുകള്‍ വീണ്ടും ബുക്ക് ചെയ്തുനല്‍കുമെന്നും ഫ്‌ലൈദുബായ് വ്യക്തമാക്കി. യാത്രക്കാര്‍ക്ക് കൂടുതല്‍ വിവരങ്ങള്‍ക്കായി ഫ്‌ലൈദുബായ് കോണ്‍ടാക്റ്റ് സെന്ററുമായി ബന്ധപ്പെടുകയോ, വെബ്‌സൈറ്റ് സന്ദര്‍ശിക്കുകയോ ചെയ്യാം.
അതേസമയം എമിറേറ്റ്സ്, ഇത്തിഹാദ് എയര്‍വേയ്സ് വിമാനങ്ങള്‍ക്ക് നേപ്പാളിലേയ്ക്ക് നേരിട്ടുള്ള സര്‍വീസുകളില്ല. ഷാര്‍ജ ആസ്ഥാനമായുള്ള എയര്‍ അറേബ്യയുടെ വിമാനങ്ങള്‍ മുടങ്ങിയോ എന്നതിനെക്കുറിച്ചുള്ള വിവരങ്ങള്‍ ലഭിച്ചിട്ടില്ല.