സുഡാനിൽ കത്തോലിക്കാ വൈദികന്റെ കൊലപാതകം; മരുന്ന് മോഷണം പുറത്തുകൊണ്ടുവന്നതിലെ പകയെന്ന് റിപ്പോർട്ട്

നൂബ: യുദ്ധം വിഴുങ്ങിയ സുഡാനിലെ നൂബ പർവതനിരകളിൽ സമാധാനത്തിന്റെ കാവലായി നിലകൊണ്ട കത്തോലിക്കാ വൈദികൻ ഫാ. യൂഹന്ന അൽ-അമീൻ ദാരുണമായി കൊല്ലപ്പെട്ടു. കൗഡ സെന്റ് വിൻസെന്റ് ഇടവക വികാരിയായ ഫാ. യൂഹന്നയും  ഇടവകയിലെ ഒരു ജോലിക്കാരനും ജൂൺ 19 നാണ് അക്രമികളുടെ വെടിയേറ്റ് മരിച്ചത്.

പ്രദേശത്തെ ജനങ്ങൾക്കായി സഭ സുരക്ഷിതമായി സൂക്ഷിച്ചിരുന്ന മരുന്നുകൾ സായുധ സംഘം മോഷ്ടിച്ച വിവരം ഫാ. യൂഹന്ന അധികൃതരെ അറിയിച്ചിരുന്നു. ഇതിലുള്ള പകയാണ് ഈ കൊലപാതകത്തിന് കാരണമെന്നാണ് പ്രാദേശിക വൃത്തങ്ങൾ നൽകുന്ന സൂചന. ഗോത്രവർഗ സംഘർഷങ്ങളും സായുധ സംഘങ്ങളുടെ ആധിപത്യവും രൂക്ഷമായ നൂബ പർവതമേഖലയിൽ നടന്ന ഈ സംഭവം കത്തോലിക്കാ സഭയെയാകെ ഞെട്ടിച്ചിരിക്കുകയാണ്.

സുരക്ഷാ ഭീഷണികൾ കാരണം പല വൈദികരും സന്ന്യാസികളും പ്രദേശം വിട്ടുപോയപ്പോഴും തന്റെ ജനങ്ങളെ തനിച്ചാക്കി പോകാൻ ഫാ. യൂഹന്ന തയ്യാറായിരുന്നില്ല. ദാരിദ്ര്യവും യുദ്ധക്കെടുതിയും നിറഞ്ഞ പ്രദേശത്ത് ആത്മീയ ശുശ്രൂഷകൾക്കപ്പുറം ദുർബലരായ കുടുംബങ്ങൾക്ക് ആരോഗ്യപരിപാലനവും സഹായവും നൽകുന്ന കേന്ദ്രമായി കൗഡ ഇടവക മാറിയിരുന്നു.

1997 മുതൽ 2021 വരെ സെന്റ് പീറ്റേഴ്സ് ബാബ്നൂസ ഇടവകയിൽ ചെയ്ത സേവനങ്ങൾ എൽ ഒബെയ്ദ് രൂപത അഗാധമായ വേദനയോടെ അനുസ്മരിച്ചു. യുവാക്കളുടെയും കുട്ടികളുടെയും പ്രിയങ്കരനായ സുഹൃത്തായിരുന്ന ഫാ. യൂഹന്ന സെമിനാരി വിദ്യാർഥിയായി തുടങ്ങി വൈദികനായി മാറിയ നാളുകൾ എൽ ഒബെയ്ദ് രൂപതയിലെ വിശ്വാസികൾക്ക് ഇന്നും ഓർമ്മയുണ്ട്.

സുഡാനിൽ കത്തോലിക്കാ സഭയ്ക്കുനേരെ നടക്കുന്ന അക്രമങ്ങളുടെ ദീർഘമായ പരമ്പരയിലെ ഒടുവിലത്തെ കണ്ണിയാണ് ഈ കൊലപാതകം. 
2025 ജൂണിൽ എൽ ഫാഷറിലുണ്ടായ ആക്രമണത്തിൽ ഫാ. ലൂക്കാ ജോമോ അബദ്ധത്തിൽ വെടിയേറ്റ് കൊല്ലപ്പെട്ടിരുന്നു. എൽ ഒബെയ്ദ് രൂപതാ ബിഷപ്പ് യവനൻ ടോംബെ ട്രില്ലെ കുക്കു ആൻഡാലിക്കും സായുധ സംഘത്തിന്റെ ആക്രമണത്തിൽ ഗുരുതരമായി പരിക്കേറ്റിരുന്നു.

കടുത്ത സംഘർഷങ്ങൾക്കിടയിലും നീതിക്കും ജനങ്ങളുടെ ജീവനും വേണ്ടി നിലകൊണ്ട വൈദികന്റെ വിയോഗം സുഡാനിലെ ക്രൈസ്തവ സമൂഹത്തിന് തീരാനഷ്ടമായിരിക്കുകയാണ്.