മുഹറത്തിനും ശ്രീനാരായണ ഗുരു ജയന്തിക്കും മന്നം ജയന്തിക്കും പൊതു അവധി, ചരിത്രപ്രാധാന്യമുള്ള ദുക്റാനക്ക് എന്തുകൊണ്ട് അവധി നൽകിക്കൂടാ? അവധി ആവശ്യം ശക്തമാക്കി ക്രൈസ്തവ സംഘടനകൾ
 

കൊച്ചി: കേരളത്തിന്റെ സാംസ്കാരിക-ചരിത്ര പൈതൃകത്തിൽ സുപ്രധാന സ്ഥാനമുള്ള തോമാശ്ലീഹാ സ്മരണ ദിനമായ ജൂലൈ 3-ന് അവധി നൽകണമെന്ന ആവശ്യം വീണ്ടും ചർച്ചയാകുന്നു. മുഹറം, ശ്രീനാരായണ ഗുരു ജയന്തി, മന്നം ജയന്തി തുടങ്ങിയ വിശേഷ ദിവസങ്ങൾക്ക് സർക്കാർ അവധി നൽകുന്നതുപോലെ തന്നെ, കേരളത്തിന്റെ ചരിത്രത്തോട് ചേർന്നുനിൽക്കുന്ന തോമാശ്ലീഹായുടെ ഓർമ്മയ്ക്കായി ജൂലൈ 3-ന് അവധി പ്രഖ്യാപിക്കണമെന്നാണ് പ്രധാന ആവശ്യം.  

കേരളത്തിന്റെ ചരിത്രത്തിൽ തോമാശ്ലീഹായ്ക്ക് വലിയ സ്ഥാനമാണുള്ളത്. അതിനാൽ, അദ്ദേഹത്തിന്റെ സ്മരണ ദിനത്തിന് സർക്കാർ പ്രത്യേക പരിഗണന നൽകണമെന്ന ആവശ്യം ഉയരുന്നു. 2026-ലെ കേരള സർക്കാർ ഔദ്യോഗിക അവധി പട്ടികയിൽ ജൂലൈ 3 ഉൾപ്പെട്ടിട്ടില്ല. സംസ്ഥാനത്തെ വിവിധ സമുദായങ്ങളുടെയും മതവിഭാഗങ്ങളുടെയും ആഘോഷങ്ങൾ സർക്കാർ അവധി പട്ടികയിൽ ഇടംപിടിക്കാറുണ്ട്.

മുൻ വർഷങ്ങളിലും ജൂലൈ 3-ന് അവധി നൽകണമെന്ന ആവശ്യം വിവിധ ക്രിസ്ത്യൻ സംഘടനകൾ ഉന്നയിച്ചിരുന്നു. അന്ന് പല സർവകലാശാലകളും പരീക്ഷകൾ മാറ്റിവെക്കാൻ നിർബന്ധിതമായിരുന്നു.