പ്രഭാത പ്രാർത്ഥന.........
ഞാനാണ്‌ പുനരുത്ഥാനവും ജീവനും. എന്നില്‍ വിശ്വസിക്കുന്നവന്‍ മരിച്ചാലും ജീവിക്കും.
യോഹന്നാന്‍ 11 : 25

കാരുണ്യവാനായ ഞങ്ങളുടെ നല്ല ദൈവമേ... സകല മരിച്ച വിശ്വാസികളുടെയും ഓർമ്മ തിരുനാൾ ദിനത്തിലെ ഈ അനുഗ്രഹീത പ്രഭാതത്തിലേക്ക് ഞങ്ങളെ ഉണർത്തിയതിന് നന്ദി പറയുന്നു. ഈ പുതിയ ദിവസം അങ്ങയുടെ തിരുസന്നിധിയിൽ ഞങ്ങൾ സമർപ്പിക്കുന്നു.
ജീവിതത്തിന്റെ വഴിത്താരകളിൽ ഞങ്ങളെക്കാൾ മുൻപേ നടന്നുപോവുകയും, അങ്ങിലേക്ക് വിളിക്കപ്പെടുകയും ചെയ്ത ഞങ്ങളുടെ മാതാപിതാക്കൾ, സഹോദരങ്ങൾ, ബന്ധുമിത്രാദികൾ, ഉപകർത്താക്കൾ എന്നിവരെ ഞങ്ങൾ ഈ വേളയിൽ ഭക്തിപൂർവ്വം ഓർക്കുന്നു. ഈ ലോകത്തിൽ ജീവിച്ചിരുന്നപ്പോൾ അവർക്ക് സംഭവിച്ചുപോയ എല്ലാ തെറ്റുകളും കുറ്റങ്ങളും അങ്ങയുടെ അനന്തമായ കാരുണ്യത്താൽ ക്ഷമിക്കണമേ.
പ്രത്യേകമായി, ഈ ലോകത്തിൽ ഓർക്കപ്പെടാൻ ആരുമില്ലാത്തവരും, പ്രാർത്ഥന സഹായം ഏറ്റവും കൂടുതൽ ആവശ്യമുള്ളവരുമായ ശുദ്ധീകരണ സ്ഥലത്തിലെ എല്ലാ ആത്മാക്കളെയും ഞങ്ങൾ അങ്ങയുടെ തിരുക്കരങ്ങളിൽ ഏൽപ്പിക്കുന്നു. ഈശോനാഥാ, അങ്ങയുടെ തിരുരക്തത്തിന്റെ വിലയാൽ വീണ്ടെടുക്കപ്പെട്ട ആ ആത്മാക്കളുടെ മേൽ കനിവുണ്ടാകണമേ. അങ്ങയുടെ ദർശനമാകുന്ന സ്വർഗ്ഗീയ ആനന്ദത്തിലേക്ക് അവരെ എത്രയും വേഗം പ്രവേശിപ്പിക്കണമേ.
ഭൂമിയിൽ തീർത്ഥാടകരായ ഞങ്ങളെയും അങ്ങ് അനുഗ്രഹിക്കണമേ. മരണത്തെ ഭയപ്പെടാതെ, നിത്യജീവനിലുള്ള പ്രത്യാശയോടെ വിശുദ്ധിയിൽ ജീവിക്കുവാനുള്ള കൃപ ഞങ്ങൾക്ക് നൽകണമേ. ഞങ്ങളുടെ ഇന്നത്തെ എല്ലാ പ്രാർത്ഥനകളും ത്യാഗങ്ങളും ഈ ആത്മാക്കളുടെ മോചനത്തിനായി ഞങ്ങൾ സമർപ്പിക്കുന്നു.
(ഇവിടെ അങ്ങയുടെ പ്രത്യേക നിയോഗങ്ങളും മരിച്ചുപോയ പ്രിയപ്പെട്ടവരുടെ പേരുകളും ഓർത്തു പ്രാർത്ഥിക്കാം...)
നിത്യപിതാവേ, അങ്ങയുടെ പ്രിയപുത്രനും ഞങ്ങളുടെ കർത്താവുമായ ഈശോമിശിഹായുടെ അമൂല്യമായ തിരുരക്തത്തെ ഓർത്തുകൊണ്ട്, ശുദ്ധീകരണ സ്ഥലത്തിലെ ആത്മാക്കളുടെ മേൽ കൃപയുണ്ടാകണമേ.
കർത്താവേ, അവർക്ക് നിത്യശാന്തി നൽകണമേ; അങ്ങയുടെ നിത്യപ്രകാശം അവരുടെ മേൽ പ്രകാശിക്കട്ടെ. അവർ ദൈവകാരുണ്യത്താൽ നിത്യതയിൽ സമാധാനമായി ആശ്വസിക്കട്ടെ...
സ്വർഗ്ഗസ്ഥനായ ഞങ്ങളുടെ പിതാവേ... (ചൊല്ലുക)
നന്മ നിറഞ്ഞ മറിയമേ... (ചൊല്ലുക)
പിതാവിനും പുത്രനും പരിശുദ്ധാത്മാവിനും സ്തുതി... (ചൊല്ലുക)
ആമേൻ