ഉത്തരാഖണ്ഡില്‍ ക്രൈസ്തവ വിദ്യാഭ്യാസ സ്ഥാപനങ്ങള്‍ക്കു ന്യൂനപക്ഷ ആനുകൂല്യം
ഡെറാഡൂണ്‍: ക്രൈസ്തവര്‍ ഉള്‍പ്പെടെയുള്ളവരുടെ വിദ്യാഭ്യാസ സ്ഥാപനങ്ങള്‍ക്ക് ന്യൂനപക്ഷ ആനുകൂല്യം നല്കുന്ന ബില്ലിന് ഉത്തരാഖണ്ഡ് മന്ത്രിസഭ അംഗീകാരം നല്കി.
മൈനോറിറ്റി എഡ്യൂക്കേഷന്‍ ബില്‍-2025 പ്രകാരം സിക്ക്, ജൈന, ബുദ്ധ, പാഴ്‌സി വിഭാഗങ്ങളുടെ വിദ്യാഭ്യാസ സ്ഥാപനങ്ങള്‍ക്കും ന്യൂനപക്ഷ ആനുകൂല്യം ലഭിക്കും. നിലവില്‍ സംസ്ഥാനത്ത് മുസ്ലിം വിഭാഗത്തിന്റെ വിദ്യാഭ്യാസ സ്ഥാപനങ്ങള്‍ക്കു മാത്രമാണു ന്യൂനപക്ഷ പദവിയുള്ളത്.
ഇന്നാരംഭിക്കുന്ന നിയമസഭ സമ്മേളനത്തില്‍ ബില്‍ അവതരിപ്പിക്കും. ഉത്തരാഖണ്ഡ് മദ്രസ എഡ്യൂക്കേഷന്‍ ബോര്‍ഡ് ആക്ട് 2106, ഉത്തരാഖണ്ഡ് നോണ്‍-ഗവണ്‍മെന്റ് അറബിക് ആന്‍ഡ് പേര്‍ഷ്യന്‍ മദ്രസ റെക്കഗ്‌നിഷന്‍ റൂള്‍സ് 2019 എന്നിവ പിന്‍വലിക്കാനും മുഖ്യമന്ത്രി പുഷ്‌കര്‍ സിംഗ് ധാമിയുടെ അധ്യക്ഷതയില്‍ ചേര്‍ന്ന മന്ത്രിസഭാ യോഗം തീരുമാനിച്ചു. 2026 ജൂലൈ ഒന്നിന് ഇതു പ്രാബല്യത്തിലാകും.