മന്ത്രി ബിന്ദുകൃഷ്ണയുടെ തലയിൽ ചൂട് പായസം വീണു, സംഭവം പ്രിയദർശിനി ഉദ്ഘാടന യാത്രക്കിടെ

കൊല്ലം: കെഎസ്ആർടിസി ഓർഡിനറി ബസുകളിലെ സൗജന്യ യാത്രാ പദ്ധതിയായ 'പ്രിയദർശിനി'യുടെ കൊല്ലത്തെ ഉദ്ഘാടനച്ചടങ്ങിനിടെ മന്ത്രി ബിന്ദുകൃഷ്ണയ്ക്ക് അപ്രതീക്ഷിത അപകടം. ഉദ്ഘാടനത്തോടനുബന്ധിച്ച് വിതരണം ചെയ്ത ചൂട് പായസം മന്ത്രിയുടെ തലയിൽ വീഴുകയായിരുന്നു.

കൊല്ലം കെഎസ്ആർടിസി ഡിപ്പോയിൽ വെച്ച് നടന്ന ഉദ്ഘാടനത്തിന് ശേഷം ബസിനകത്ത് വെച്ചായിരുന്നു പായസവിതരണം നടന്നത്. യൂത്ത് കോൺഗ്രസ് ജില്ലാ അധ്യക്ഷന്റെ നേതൃത്വത്തിലായിരുന്നു മധുരപലഹാര വിതരണം സംഘടിപ്പിച്ചത്. പ്രവർത്തകരും യാത്രക്കാരും അടക്കം വലിയ തിരക്ക് അനുഭവപ്പെട്ടിരുന്ന ബസിനുള്ളിൽ, വിതരണത്തിനിടെ അബദ്ധത്തിൽ പായസം മന്ത്രിയുടെ തലയിലേക്ക് മറിഞ്ഞു വീഴുകയായിരുന്നു.

അപകടം നടന്ന ഉടൻ തന്നെ ഒപ്പമുണ്ടായിരുന്ന പാർട്ടി പ്രവർത്തകരും കെഎസ്ആർടിസി ജീവനക്കാരും ചേർന്ന് ഷാൾ ഉപയോഗിച്ച് മന്ത്രിയുടെ തലയും മുഖവും തുടച്ച് വൃത്തിയാക്കി. പരിക്കുകൾ ഒന്നുമില്ലെന്ന് ഉറപ്പുവരുത്തിയ ശേഷം മന്ത്രി ചിന്നക്കട വരെ നിശ്ചയിച്ചതുപോലെ ബസിൽ യാത്ര തുടരുകയും ചെയ്തു. പിന്നീട് അവിടെ വെച്ചാണ് മന്ത്രി മടങ്ങിയത്.

ചടങ്ങിനിടെയുണ്ടായ ഈ സംഭവം സുരക്ഷാ വീഴ്ചയാണോ അതോ അപ്രതീക്ഷിതമായി സംഭവിച്ച അപകടമാണോ എന്ന് അധികൃതർ പരിശോധിച്ചുവരികയാണ്.