പലസ്തീൻ ഐക്യദാർഢ്യവുമായി മൈം; കലോത്സവം മാറ്റിവച്ച സംഭവം അന്വേഷിക്കുമെന്നു വിദ്യാഭ്യാസമന്ത്രി
തിരുവനന്തപുരം: കാസർഗോഡ് കുന്പള ഹയർ സെക്കൻഡറി സ്കൂളിൽ കലോത്സവത്തിൽ പലസ്തീൻ ഐക്യദാർഢ്യം പ്രകടിപ്പിച്ച് മൈം അവതരിപ്പിച്ചതിന് പരിപാടി നിർത്തിവയ്പിക്കുകയും കലോത്സവം മാറ്റിവയ്ക്കുകയും ചെയ്ത സംഭവത്തേക്കുറിച്ച് അടിയന്തരമായി അന്വേഷിച്ച് റിപ്പോർട്ട് നൽകാൻ പൊതുവിദ്യാഭ്യാസ ഡയറക്ടർക്ക് നിർദേശം നൽകിയതായി വിദ്യാഭ്യാസമന്ത്രി വി. ശിവൻകുട്ടി.
വിദ്യാർഥികൾക്ക് ഇതേ മൈം വേദിയിൽ അവതരിപ്പിക്കാൻ അവസരമൊരുക്കുമെന്നും മന്ത്രി പറഞ്ഞു. പലസ്തീൻ വിഷയത്തിൽ മൈം അവതരിപ്പിച്ചതിനാണ് നടപടി എന്നാണ് മനസിലാക്കുന്നത്. പലസ്തീനിൽ ഇസ്രയേൽ നടത്തുന്ന വംശഹത്യയ്ക്ക് എതിരെ എന്നും നിലപാടെടുത്ത ജനവിഭാഗമാണ് കേരളം.
പലസ്തീനിൽ വേട്ടയാടപ്പെടുന്ന കുഞ്ഞുങ്ങൾക്കൊപ്പമാണ് കേരളം. പലസ്തീൻ വിഷയത്തിൽ അവതരിപ്പിച്ച മൈം തടയാൻ ആർക്കും അധികാരമില്ലെന്നും ശിവൻകുട്ടി പറഞ്ഞു.