കൂട്ടപിരിച്ചുവിടല്; മാനേജ്മെന്റുമായുള്ള ചര്ച്ച ജൂലൈ പത്തിന്; ബോര്ഡ് അംഗങ്ങള് പങ്കെടുത്തില്ലെങ്കില് നിയമനടപടി: ലേബര് കമ്മീഷണര്
കൊച്ചി: കോറോഹെല്ത്തിലെ കൂട്ടപിരിച്ചുവിടലില് ലേബര് കമ്മീഷണറും ജീവനക്കാരുമായുള്ള ചര്ച്ച അവസാനിച്ചു. ജൂലൈ പത്തിന് തൊഴില് വകുപ്പ് മന്ത്രി ബിന്ദു കൃഷ്ണ മാനേജ്മെന്റുമായി കൊച്ചിയില് നേരിട്ട് ചര്ച്ച നടത്തും. കമ്പനി ബോര്ഡിലുള്ളവര് ഈ യോഗത്തില് പങ്കെടുക്കാത്തപക്ഷം നിയമനടപടി സ്വീകരിക്കുമെന്നും ലേബര് കമ്മീഷണര് സഫ്ന പറഞ്ഞു.
ജൂലൈ പത്ത് വരെ സ്ഥാപനം പ്രവര്ത്തിക്കുമെന്നും അതുവരെയുള്ള ശമ്പളം ഉറപ്പാക്കുമെന്നും ലേബര് കമ്മീഷണര് അറിയിച്ചു. അതേസമയം ഇന്നത്തെ ചര്ച്ചയില് കോറോഹെല്ത്തിന്റെ ബോര്ഡ് അംഗങ്ങള് പങ്കെടുത്തില്ല.
ഉമ തോമസ് എംഎല്എ, ഹൈബി ഈഡന് എംപി, മുഹമ്മദ് ഷിയാസ് എംഎല്എ തുടങ്ങിയവരുടെ നേതൃത്വത്തിലാണ് യോഗം നടന്നത്.
തൊഴിലാളികളുടെ പ്രശ്നങ്ങള് കേട്ടുവെന്നും ഈ മാസം പത്തിന് കമ്പനി മാനേജ്മെന്റുമായി ചര്ച്ച നടത്തുമെന്നും ഉമ തോമസ് എംഎല്എ പറഞ്ഞു. കഴിഞ്ഞ ദിവസം മന്ത്രി ബിന്ദു കൃഷ്ണയും ഇക്കാര്യം വ്യക്തമാക്കിയിരുന്നു.
വിഷയം കേന്ദ്ര തൊഴില് വകുപ്പ് മന്ത്രിയെ അറിയിക്കുമെന്ന് ഹൈബി ഈഡന് പറഞ്ഞു. അതേസമയം ഡിവൈഎഫ്ഐ നേതാക്കളായ വി.വസീഫ്, വി.കെ സനോജ് എന്നിവരുടെ നേതൃത്വത്തില് ഒരു സംഘം പ്രവര്ത്തകര് കോറോഹെല്ത്തിലേക്ക് തള്ളി കയറാന് ശ്രമിച്ചു.
കോറോഹെല്ത്തിലെ കൂട്ടപ്പിരിച്ചുവിടല് തൊഴില് ചട്ടങ്ങളുടെ ലംഘനമാണെന്ന് പി.എ മുഹമ്മദ് റിയാസ് എംഎല്എ ചൂണ്ടിക്കാട്ടി.
വിഷയത്തില് സര്ക്കാര് അടിയന്തരമായി ഇടപെടണമെന്നും എല്ഡിഎഫ് സര്ക്കാര് ഭരിക്കുമ്പോള് ഇത്തരം സംഭവങ്ങള് ഉണ്ടായിട്ടില്ലെന്നും അദ്ദേഹം പറഞ്ഞു. തൊഴില് മന്ത്രിയെ കണ്ട് വിഷയം ചര്ച്ച ചെയ്യുമെന്നും എംഎല്എ അറിയിച്ചു.
ചര്ച്ചയില് പ്രതീക്ഷയുണ്ടെന്നാണ് ജീവനക്കാര് നല്കുന്ന പ്രതികരണം. ജൂലൈ 10 വരെ ജോലി ചെയ്യാമെന്നും അല്പസമയത്തിനകം ഓഫിസ് തുറക്കുമെന്നാണ് അറിയിച്ചിരിക്കുന്നതെന്നും ജീവനക്കാര് പറഞ്ഞു.