മേജര്‍ ആര്‍ച്ചുബിഷപ് മാര്‍ റാഫേല്‍ തട്ടിലില്‍ സപ്തതിയിലേക്ക്

കാക്കനാട്: സീറോമലബാര്‍സഭയുടെ  മേജര്‍ ആര്‍ച്ചുബിഷപ് മാര്‍ റാഫേല്‍ തട്ടില്‍ എഴുപതിന്റെ നിറവില്‍.(Major Archbishop Mar Raphael Thattil 70th birthday) തൃശൂര്‍ പുത്തന്‍പള്ളി തട്ടില്‍ ഔസേപ്പ്-ത്രേസ്യ ദമ്പതികളുടെ പത്തുമക്കളില്‍ ഇളയവനായി 1956 ഏപ്രില്‍ 21-നായിരുന്നു ജനനം. 1980 ഡിസംബര്‍ 21-ന് തൃശൂര്‍ രൂപതാധ്യക്ഷന്‍ മാര്‍ ജോസഫ് കുണ്ടുകുളത്തില്‍നിന്ന് പൗരോഹിത്യം സ്വീകരിച്ചു.

റോമിലെ ഓറിയന്റല്‍ ഇന്‍സ്റ്റിറ്റ്യൂട്ടില്‍നിന്നും കാനോന്‍ നിയമത്തില്‍ ഡോക്ടറേറ്റ് കരസ്ഥമാക്കിയിട്ടുണ്ട്.

തൃശൂര്‍ അതിരൂപതയുടെ വൈസ് ചാന്‍സലര്‍, മാര്‍ ജോസഫ് കുണ്ടുകുളത്തിന്റെ സെക്രട്ടറി, മതബോധന കേന്ദ്രം ഡയറക്ടര്‍, അതിരൂപത ചാന്‍സലര്‍, മേരിമാതാ മേജര്‍ സെമിനാരിയുടെ പ്രഥമ റെക്ടര്‍, തൃശ്ശൂര്‍ അതിരൂപതയുടെ വികാരി ജനറാള്‍ എന്നീ നിലകളില്‍ സേവനം ചെയ്തതിനുശേഷമാണ് 2010  ഏപ്രില്‍ 10 നു  അതിരൂപതയുടെ സഹായ മെത്രാനായി അഭിഷിക്തനായത്. ‘വിഭജിക്കപ്പെടാനും പങ്കുവെക്ക പ്പെടാനും’ എന്നതാണ് മാര്‍ റാഫേല്‍ തട്ടിലിന്റെ ആപ്തവാക്യം.

2014-ല്‍ ഇന്ത്യയിലെ മറ്റൊരു സീറോമലബാര്‍ രൂപതയുടെയും ഭാഗമല്ലാത്ത പ്രദേശങ്ങളിലെ അപ്പസ്‌തോലിക് വിസിറ്റേറ്ററായും, 2017-ല്‍ പുതുതായി  സ്ഥാപിക്കപ്പെട്ട ഷംഷാബാദ് രൂപതയുടെ പ്രഥമ മെത്രാനായും ഫ്രാന്‍സിസ് മാര്‍പാപ്പ മാര്‍ തട്ടിലിനെ നിയമിച്ചു.

കര്‍ദിനാള്‍ മാര്‍ ജോര്‍ജ് ആലഞ്ചേരി വിരമിച്ച സാഹചര്യത്തിലാണ് സീറോമലബാര്‍ സഭയുടെ നാലാമത്തെ മേജര്‍ ആര്‍ച്ചുബിഷപ്പായി മാര്‍ റാഫേല്‍ തട്ടില്‍ തിരഞ്ഞെടുക്കപ്പെട്ടത്.

2024 ജനുവരി 11 നായിരുന്നു  സ്ഥാനാരോഹണം.

ഇന്ന് വൈകുന്നേരം (ഏപ്രില്‍ 20) ലളിതമായ രീതിയില്‍ ക്രമീകരിച്ചിരിക്കുന്ന ചടങ്ങില്‍ എഴുപതാം പിറന്നാള്‍ ആഘോഷിക്കും.