വളര്‍മതിയുടെ ആരോഗ്യനില ഗുരുതരം: ശരീരത്തിലെ മഗ്നീഷ്യത്തിന്റെയും, സോഡിയത്തിന്റെയും അളവ് കുറയുന്നു,വളര്‍മതിയുടെ നിരാഹാരം ഇന്ന് ഇരുപതാം ദിവസം
തിരുവനന്തപുരം: എല്‍പിഎസ്ടി സമരസമിതി നേതാവ് എസ് വളര്‍മതിയുടെ ആരോഗ്യനില ഗുരുതരമെന്ന് ആശുപത്രി അധികൃതര്‍. ശരീരത്തിലെ മഗ്നീഷ്യത്തിന്റെയും, സോഡിയത്തിന്റെയും അളവ് കുറവെന്ന് ഡോക്ടേഴ്‌സ്. ആശുപത്രിയിലും വളര്‍മതി നിരാഹാരം തുടരുന്നു. വളര്‍മതി നിരാഹാരം അവസാനിപ്പിക്കാതെ ചികിത്സയില്‍ കാര്യമില്ലെന്ന് ജനറല്‍ ആശുപത്രി ആര്‍എംഒ വ്യക്തമാക്കി. വളര്‍മതിയുടെ നിരാഹാരം ഇന്ന് ഇരുപതാം ദിവസത്തിലാണ്.
യുഡിഎഫ് സര്‍ക്കാരിന്റെ വാഗ്ദാന ലംഘനത്തിനെതിരായ എല്‍പിഎസ്ടി സമരം ആരംഭിച്ചിട്ട് 132 ദിവസം പിന്നിടുകയാണ്. എല്‍പിഎസ്ടി റാങ്ക് ഹോള്‍ഡര്‍ ജയകൃഷ്ണന്റെയും സിജെപിയുടെയും നിരാഹാം മൂന്നാം ദിവസത്തേയ്ക്ക് കടന്നു.
ആരോഗ്യനില മോശമായതിനെ തുടര്‍ന്ന് വീണ്ടും ആശുപത്രിയിലേക്ക് മാറ്റിയെങ്കിലും നിരാഹാര സമരത്തില്‍ നിന്ന് പിന്മാറാന്‍ എസ് വളര്‍മതി തയ്യാറായിട്ടില്ല. എന്നാല്‍ വിദ്യാര്‍ത്ഥി- അധ്യാപക അനുപാതം കുറയ്ക്കുന്നത് പ്രായോഗികമല്ലെന്ന നിലപാടില്‍ തന്നെയാണ് സര്‍ക്കാര്‍.
സമരപ്പന്തല്‍ പൊളിച്ചതിന് പിന്നാലെ ഉദ്യോഗാര്‍ഥികള്‍ക്ക് രാഷ്ട്രീയ പിന്തുണയേറുകയാണ്. വിവിധ രാഷ്ട്രീയ പാര്‍ട്ടികളും യുവജന സംഘടനകളും സമരത്തിന് പിന്തുണയുമായി രംഗത്തെത്തി.
അധ്യാപക നിയമനവുമായി ബന്ധപ്പെട്ട പ്രശ്‌നങ്ങള്‍ പരിഹരിക്കണമെന്നും ആവശ്യങ്ങള്‍ അംഗീകരിക്കുന്നതുവരെ സമരം തുടരുമെന്നും റാങ്ക് ഹോള്‍ഡര്‍മാര്‍ വ്യക്തമാക്കുന്നു.
പ്രതിപക്ഷത്തായിരുന്നപ്പോള്‍ ശരിയെന്ന് അംഗീകരിച്ച കാര്യം ഭരണപക്ഷത്തെത്തിയപ്പോള്‍ മുഖ്യമന്ത്രി വി.ഡി. സതീശനും സര്‍ക്കാരും മറന്നുവെന്നാണ് പ്രതിപക്ഷത്തിന്റെ വിമര്‍ശനം.