ശ്രവണ,ഐക്യ പരിപോഷണ വരങ്ങള്‍ ലഭിക്കട്ടെ. അഗസ്റ്റീനിയന്‍ സമൂഹത്തിന് പാപ്പായുടെ ആശംസ
വത്തിക്കാന്‍:എല്ലാ ഭാഷകളും മനസ്സിലാക്കാനോ സംസാരിക്കാനോ ഉള്ള വരം തീര്‍ച്ചയായും നല്‍കപ്പെടണമെന്നില്ല. എന്നാല്‍ കേള്‍ക്കാനുള്ള വരവും എളിമയുള്ളവരായിരിക്കാനുള്ള വരവും, അഗസ്റ്റീനിയന്‍ സമൂഹത്തിനകത്തും സഭയിലും ലോകമെമ്പാടും ഐക്യം വളര്‍ത്താനുള്ള വരവും ലഭിക്കുന്നതിനായി പരിശുദ്ധാരൂപിയോടു പ്രാര്‍ത്ഥിക്കാന്‍ പാപ്പാ അഗസ്റ്റീനിയന്‍ സഭയുടെ പ്രതിനിധികളെ ക്ഷണിക്കുന്നു.
അഗസ്റ്റീനിയന്‍ സമൂഹത്തിന്റെ സാധാരണ പൊതുസംഘത്തിന്റെ, അഥവാ, ജനറല്‍ ചാപ്റ്ററിന്റെ ഉദ്ഘാടന ദിവ്യബലിയില്‍, റോമില്‍, കാമ്പൊ മാര്‍ത്സിയൊയില്‍ വിശുദ്ധ അഗസ്റ്റിന്റെ ബസിലിക്കയില്‍ സെപ്റ്റംബര്‍ 1-ന് തിങ്കളാഴ്ച വൈകുന്നേരം മുഖ്യകാര്‍മ്മികത്വം വഹിച്ച ലിയൊ പതിനാലാമന്‍ പാപ്പാ തദ്ദവസരത്തില്‍ സുവിശേഷ ചിന്തകള്‍ പങ്കുവയ്ക്കുകയായിരുന്നു.
നമ്മുടെ ഹൃദയങ്ങളിലേക്ക് ക്രിസ്തുവിന്റെ സ്‌നേഹം ചൊരിയപ്പെട്ടിരിക്കുന്നത് ആരിലൂടെയാണോ ആ പരിശുദ്ധാരൂപി ഈ പൊതുസംഘത്തിന്റെ പ്രവര്‍ത്തനങ്ങളെ അനുദിനം നയിക്കട്ടെയെന്ന് പാപ്പാ ആശംസിച്ചു.
സഹോദരങ്ങളും ജീവിതസഹാചര്യങ്ങളും വഴി പരിശുദ്ധാരൂപി ഗതകാലത്തെന്നപോലെ ഇന്നും ഹൃദയത്തിന്റെ ആഴങ്ങളില്‍ നമ്മോടു സംസാരിക്കുന്നുവെന്നും ആകയാല്‍ ദൈവശ്രവണത്തിന്റെയും മറ്റുള്ളവരെ ശ്രവിക്കലിന്റെയും ഒരു അന്തരീക്ഷം ഈ പൊതുസംഘത്തില്‍ ഉണ്ടാകേണ്ടത് സുപ്രധാനമാണെന്നും പാപ്പാ പറഞ്ഞു.
പരസ്പര വിനിമയത്തിനും പരസ്പരം മനസ്സിലാക്കുന്നതിനുമുള്ള ആത്മാര്‍ഥമായ പരിശ്രമം ആവശ്യമാണെന്നു വ്യക്തമാക്കിയ പാപ്പാ ഇവിടെ എളിമ എന്ന പുണ്യത്തിന്റെ അനിവാര്യത എടുത്തുകാട്ടി.
അതുപോലെതന്നെ അവരുടെ പ്രവര്‍ത്തനത്തില്‍ അവരുടെ കൂട്ടായ യത്‌നത്തില്‍ ഐക്യത്തിന്റെ പ്രാധാന്യവും പാപ്പാ ഊന്നിപ്പറഞ്ഞു. കാരണം ഒന്നിപ്പിക്കുന്നതിന്റെയെല്ലാം ഉറവിടം പരിശുദ്ധാരൂപിയാണെന്ന് പാപ്പാ ഉദ്‌ബോധിപ്പിച്ചു.