പോളണ്ടിന്റെ പാലക മദ്ധ്യസ്ഥയായി അറിയപ്പെടുന്ന വിശുദ്ധ ഹെഡ്വിഗിനെക്കുറിച്ചറിയാം
ക്രൊയേഷ്യയിലെ ബാവരിയ എന്ന സ്ഥലത്തെ ഒരു പ്രഭുവിന്റെ മകളായി 1174-ല്‍ ആണ് വിശുദ്ധ ഹെഡ്വിഗ് ജനിച്ചത്. വിശുദ്ധ ഹെഡ്വിഗ് ദൈവ ഭക്തിയും അനുകമ്പയും നിറഞ്ഞ ഒരു ജീവിതമാണ് നയിച്ചിരുന്നത്.
സിലേസിയയിലെ പ്രഭുവായ ഹെന്റി ആണ് വിശുദ്ധയെ വിവാഹം ചെയ്തത്. ഈ വിവാഹത്തില്‍ അവര്‍ക്ക് എഴ് മക്കളുണ്ടായി. ജെര്‍ട്രൂഡ് എന്ന തന്റെ മകള്‍ ഒഴികെ ഹെഡ്വിഗ് തന്റെ മക്കളെക്കാള്‍ അധികകാലം ജീവിച്ചിരുന്നു.
തന്റെ സ്ത്രീധനമായി കിട്ടിയ സമ്പത്ത് ഉപയോഗിച്ച് ഒരു സിസ്റ്റെരിയന്‍ മഠം പണിയുന്നതിന് ഹെഡ്വിഗ് തന്റെ ഭര്‍ത്താവിനെ നിരന്തരം പ്രേരിപ്പിച്ചു കൊണ്ടിരുന്നു.
അവരുടെ മകളായ ജെര്‍ട്രൂഡ് പില്‍ക്കാലത്ത് ട്രെബ്‌നിറ്റ്‌സ് എന്ന സ്ഥലത്ത് സ്ഥാപിച്ച ഈ മഠത്തിലെ മഠാദ്ധ്യക്ഷയായി തീര്‍ന്നു. പാവങ്ങളോടും രോഗികളോടും പ്രത്യേക കരുണയും അവര്‍ക്ക് മത-വിദ്യാഭ്യാസവും വിശുദ്ധ നല്‍കിയിരുന്നു. ശൈത്യകാലത്ത് പോലും എല്ലാദിവസവും വിശുദ്ധ പാദരക്ഷ ധരിക്കാതെയാണ് നടന്നിരുന്നത്.
ഇപ്രകാരം ഒരു കഥ നിലവിലുണ്ട്, 'ഇവ കൂടാതെ നടക്കരുത്' എന്ന നിര്‍ദ്ദേശത്തോട് കൂടി ഹെഡ്വിഗിന്റെ ഭര്‍ത്താവ് ഒരു ജോടി പാദരക്ഷകള്‍ ഹെഡ്വിഗിന് നല്‍കി. എന്നാല്‍ വിശുദ്ധ ഇത് പാദങ്ങളില്‍ ധരിക്കാതെ കൈകളില്‍ പിടിച്ചു കൊണ്ടാണ് നടന്നിരുന്നത്.
തന്റെ ഭര്‍ത്താവിന്റെ മരണത്തിന് ശേഷം വിശുദ്ധ ഹെഡ്വിഗ് ഇഹലോക സുഖങ്ങളെ പൂര്‍ണ്ണമായും പരിത്യജിച്ചുകൊണ്ട് താന്‍ പണികഴിപ്പിച്ച ട്രെബ്‌നിറ്റ്‌സിലെ ആശ്രമത്തില്‍ പ്രവേശിച്ചു.
1243 ഒക്ടോബര്‍ 15ന് ആണ് ഈ വിശുദ്ധ മരണമടഞ്ഞത്. പോളണ്ടിന്റെ പാലക മദ്ധ്യസ്ഥയായി വിശുദ്ധ അറിയപ്പെട്ടു. ഈ വിശുദ്ധയെ ജോണ്‍ പോള്‍ രണ്ടാമന്‍ മാര്‍പാപ്പയാല്‍ വിശുദ്ധയായി പ്രഖ്യാപിച്ച ഹെഡ്വിഗ് എന്ന മറ്റൊരു വിശുദ്ധയുമായി (ഈ വിശുദ്ധയുടെ നാമഹേതു തിരുന്നാള്‍ ഫെബ്രുവരി 28 ആണ്) പലരും തെറ്റിദ്ധരിക്കാറുണ്ട്.