പ്രകൃതി സംരക്ഷണത്തിന്റെ ആവശ്യകത മുന്‍നിര്‍ത്തി 'ലൗദാത്തോ സി ഗ്രാമം' തയാറായി. ലെയോ പാപ്പ ഉദ്ഘാടനം ചെയ്യും

​​​​​​​

 
lovedathoo


വത്തിക്കാന്‍ സിറ്റി: കാലാവസ്ഥ വ്യതിയാനത്തിന്റെ പരിണിതഫലങ്ങള്‍ അനുഭവിക്കുന്ന ആധുനിക കാലഘട്ടത്തില്‍, പ്രകൃതിയെയും അതിന്റെ വിഭവങ്ങളെയും സംരക്ഷിക്കേണ്ടതിന്റെ ആവശ്യകത മുന്‍നിര്‍ത്തി പഠനങ്ങള്‍ക്കും ഗവേഷണങ്ങള്‍ക്കുമായി വത്തിക്കാനില്‍ ഒരുക്കിയിരിക്കുന്ന 'ലൗദാത്തോ സി ഗ്രാമം' ലെയോ പതിനാലാമന്‍ പാപ്പ ഉദ്ഘാടനം ചെയ്യും. 

നൂറ്റാണ്ടുകളായി പാപ്പമാരുടെ വേനല്‍ക്കാലവസതിയായ കാസ്റ്റല്‍ ഗന്ധോള്‍ഫോയിലാണ് ഈ ഗ്രാമം ഒരുക്കിയിരിക്കുന്നത്.

'ലൗദാത്തോ സി' എന്ന ഫ്രാന്‍സിസ് പാപ്പയുടെ ചാക്രികലേഖന പ്രസിദ്ധീകരണത്തിന്റെ പത്താം വാര്‍ഷികത്തിലാണ്, ലേഖനത്തിന്റെ പ്രതിപാദ്യ വിഷയങ്ങളെ ചൂണ്ടിക്കാണിച്ചുകൊണ്ട്, ഗ്രാമത്തിനു തുടക്കം കുറിക്കുന്നതെന്നത് ശ്രദ്ധേയമാണ്. സെപ്റ്റംബര്‍ മാസം അഞ്ചാം തീയതിയാണ് ഉദ്ഘാടനം നിശ്ചയിച്ചിരിക്കുന്നത്. 

സൃഷ്ടിയോടുള്ള കരുതലും പ്രകൃതി സംരക്ഷണത്തിനുള്ള പരിശീലനം നല്‍കുവാനും, പരസ്പര സഹകരണം ഉറപ്പുവരുത്തുവാനും പ്രവര്‍ത്തനങ്ങള്‍ മുന്‍പോട്ടു കൊണ്ടുപോകുവാനുമാണ് 'ലൗദാത്തോ സി ഗ്രാമം' പദ്ധതിയിലൂടെ ലക്ഷ്യമിടുന്നത്.

സമൂഹത്തില്‍ ഏറ്റവും ദുര്‍ബലമായവയെ സംരക്ഷിക്കാനും, വര്‍ദ്ധിപ്പിക്കാനും കഴിയുന്ന ഒരു സ്ഥലം സൃഷ്ടിക്കുക എന്ന ഫ്രാന്‍സിസ് പാപ്പയുടെ ചിന്തകളില്‍ നിന്നുമാണ്, ഇത്തരമൊരു കേന്ദ്രത്തിന് രൂപം നല്‍കിയിരിക്കുന്നത്. 

55 ഹെക്ടര്‍ വിസ്തൃതിയുള്ള ഗ്രാമത്തില്‍ ചരിത്രപരമായ പൂന്തോട്ടങ്ങള്‍, കൊട്ടാരങ്ങള്‍, സ്മാരകങ്ങള്‍, പുരാവസ്തു അവശിഷ്ടങ്ങള്‍, കാര്‍ഷിക പ്രദേശങ്ങള്‍, ജൈവവും പുനരുജ്ജീവനവുമായ പരിശീലനത്തിനും കൃഷിക്കുമായി സമര്‍പ്പിച്ചിരിക്കുന്ന പുതിയ സ്ഥലങ്ങള്‍ എന്നിവ ഉള്‍പ്പെടുന്നു. 

ആത്മീയതയ്ക്കും, പഠനത്തിനും ഒരുപോലെപോലെ പ്രയോജനപ്പെടുന്ന ഇടം കൂടിയാണിതെന്ന് വത്തിക്കാന്‍ വ്യക്തമാക്കുന്നു.

സെപ്റ്റംബര്‍ അഞ്ചാം തീയതി ഉച്ചകഴിഞ്ഞാണ് ഉദ്ഘാടനം ക്രമീകരിച്ചിരിക്കുന്നത്. ലെയോ പതിനാലാമന്‍ പാപ്പായുടെ മുഖ്യകാര്‍മ്മികത്വത്തില്‍, ആശീര്‍വാദ ശുശ്രൂഷയും, യാമപ്രാര്‍ത്ഥനയും നടക്കും. 

പ്രാര്‍ത്ഥനകള്‍ക്ക് മുന്‍പായി പാപ്പ ഗ്രാമത്തിലെ പ്രധാന സ്ഥലങ്ങള്‍ സന്ദര്‍ശിച്ച്, ജീവനക്കാര്‍, സഹകാരികള്‍, അവരുടെ കുടുംബങ്ങള്‍, ഈ പദ്ധതിക്ക് സംഭാവന നല്‍കിയ ആളുകള്‍ എന്നിവരെ അഭിവാദ്യം ചെയ്യുമെന്നും വത്തിക്കാന്‍ അറിയിച്ചിട്ടുണ്ട്.

Tags

Share this story

From Around the Web