കൊല്ലം സായ് ഹോസ്റ്റലിലെ വിദ്യാര്ഥിനികളുടെ ആത്മഹത്യ: കേസ് വിശദമായി അന്വേഷിക്കണമെന്ന് ആവശ്യപ്പെട്ട് മാതാപിതാക്കള്
കൊല്ലം: സായ് ഹോസ്റ്റലിലെ വിദ്യാര്ഥിനികള് ആത്മഹത്യ ചെയ്ത സംഭവത്തില് കേസ് വിശദമായി അന്വേഷിക്കണമെന്ന് മാതാപിതാക്കള്.
കോഴിക്കോട് കടലുണ്ടി സ്വദേശിനിയും പന്ത്രണ്ടാം ക്ലാസ് വിദ്യാര്ഥിനിയുമായ സാന്ദ്രയുടെ മാതാപിതാക്കളാണ് ആവശ്യപ്പെട്ടത്.
മുഖ്യമന്ത്രിക്ക് പരാതി നല്കുമെന്നും സായ് സെന്ററിലെ അധ്യാപകനെതിരെ അന്വേഷിക്കണമെന്നും മാതാപിതാക്കള് ആവശ്യപ്പെട്ടു.
കഴിഞ്ഞ വ്യാഴാഴ്ച പുലര്ച്ചെ അഞ്ച് മണിയോടെയാണ് ഇരുവരുടെയും മരണവിവരം പുറത്തറിയുന്നത്.
ദിവസേനയുള്ള പരിശീലന പരിപാടിയില് ഇരുവരും പങ്കെടുക്കാത്തതിനെ തുടര്ന്ന് മറ്റ് വിദ്യാര്ഥികള് മുറിയിലേക്കെത്തുകയായിരുന്നു.
കതക് അടഞ്ഞ നിലയില് കണ്ടതോടെ ജനലിലൂടെ നോക്കിയപ്പോള് ഇരുവരെയും മുറിക്കുള്ളില് മരിച്ച നിലയില് കണ്ടെത്തുകയായിരുന്നു.
മരിച്ച മറ്റൊരു വിദ്യാര്ഥിയായ വൈഷ്ണവി കബഡി താരമാണ്. പ്ലസ് ടു വിദ്യാര്ഥിയായ സാന്ദ്ര അത്ലറ്റിക് താരമാണ്. ഇരുവരുടെയും മരണകാരണം എന്താണെന്ന് വ്യക്തമല്ല.