നൈജീരിയയിൽ തട്ടിക്കൊണ്ടുപോകപ്പെട്ട കാറ്റക്കിസ്റ്റ് ക്രൂരമായ പീഡനങ്ങളെത്തുടർന്ന് തടങ്കലിൽ വെച്ച് കൊല്ലപ്പെട്ടു

ഫെബ്രുവരിയിൽ തട്ടിക്കൊണ്ടുപോകപ്പെട്ട കാറ്റക്കിസ്റ്റ് വിക്ടർ പോൾ ക്രൂരമായ പീഡനങ്ങളെത്തുടർന്ന് തടങ്കലിൽ വെച്ച് മരിച്ചതായി കടുന അതിരൂപത സ്ഥിരീകരിച്ചു. നൈജീരിയയിലുടനീളം ആക്രമണങ്ങളും തട്ടിക്കൊണ്ടുപോകലുകളും കൊലപാതകങ്ങളും യാതൊരു നിയന്ത്രണവുമില്ലാതെ തുടരുകയാണ്. ഇത് ഏറ്റവും രൂക്ഷമായി ബാധിക്കപ്പെടുന്നത് ക്രൈസ്തവ സമൂഹങ്ങളെയാണ്.

ഈ അക്രമങ്ങളുടെ ഏറ്റവും അവസാനത്തെ ഇരയാണ് കടുന സംസ്ഥാനത്തെ കഗാർകോ ഡിസ്ട്രിക്റ്റിലുള്ള സ്വന്തം വീട്ടിൽ നിന്ന് തട്ടിക്കൊണ്ടുപോകപ്പെടുകയും, പിന്നീട് തടങ്കലിൽ വെച്ച് മരണപ്പെടുകയും ചെയ്ത വിക്ടർ പോൾ എന്ന കത്തോലിക്കാ മതബോധകൻ (Catechist). ജൂലൈ രണ്ടിന് പുറത്തിറക്കിയ ഔദ്യോഗിക പ്രസ്താവനയിലൂടെ കടുന അതിരൂപത ഇദ്ദേഹത്തിന്റെയും തട്ടിക്കൊണ്ടുപോകപ്പെട്ട മറ്റ് അഞ്ചുപേരുടെയും മരണം സ്ഥിരീകരിച്ചു.

2026 ഫെബ്രുവരി ഒമ്പതിന് കുതാഹോ, കുഗുർ എന്നീ പ്രദേശങ്ങളിൽ ഭീകരർ നടത്തിയ ആക്രമണത്തിലാണ് വിക്ടർ പോളിനെയും അദ്ദേഹത്തിന്റെ ഗർഭിണിയായ ഭാര്യയെയും മകനെയും മറ്റ് മുപ്പതോളം ആളുകളെയും തട്ടിക്കൊണ്ടുപോയത്. ഇതിൽ അദ്ദേഹത്തിന്റെ മകൻ പിന്നീട് കൊല്ലപ്പെട്ടിരുന്നു.

വിക്ടർ പോളിനെ തട്ടിക്കൊണ്ടുപോയവർ ക്രൂരമായ പീഡനങ്ങൾക്ക് ഇരയാക്കുകയും ആഹാരം നൽകാതെ പട്ടിണിക്കിട്ട് കൊല്ലുകയുമായിരുന്നു എന്ന് കടുന അതിരൂപതാ ചാൻസലർ ഫാ. ക്രിസ്റ്റ്യൻ ഒകെവു ഇമ്മാനുവൽ പ്രസ്താവനയിൽ പറഞ്ഞു. മറ്റ് ഇരകളെയും ഭീകരർ ക്രൂരമായി കൊലപ്പെടുത്തുകയായിരുന്നു. എന്നാൽ ഈ മരണങ്ങളെക്കുറിച്ച് കടുന സംസ്ഥാന സർക്കാരോ പൊലീസോ ഇതുവരെ ഔദ്യോഗിക പ്രസ്താവനകളൊന്നും പുറപ്പെടുവിച്ചിട്ടില്ല.

ഫെബ്രുവരിയിൽ തട്ടിക്കൊണ്ടുപോകപ്പെട്ട മുപ്പതോളം പേരിൽ, മതബോധകന്റെ ഭാര്യ ഉൾപ്പെടെയുള്ള 11 സ്ത്രീകളെയും കുട്ടികളെയും പ്രാദേശിക സമൂഹം 30 ദശലക്ഷം നൈറ (നൈജീരിയൻ കറൻസി) മോചനദ്രവ്യമായും നാല് മോട്ടോർ സൈക്കിളുകളും നൽകിയതിനെത്തുടർന്ന് ഏപ്രിൽ അഞ്ചിന് മോചിപ്പിച്ചിരുന്നു. ഇവരുടെ മോചനത്തിന് ശേഷം, ബാക്കിയുള്ള തടവുകാർക്കായി തട്ടിക്കൊണ്ടുപോയവർ 15 ദശലക്ഷം നൈറ കൂടി ആവശ്യപ്പെട്ടു. തുടർന്ന് 2026 മെയ് ഒന്നിന് വെള്ളിയാഴ്ച ഒമ്പത് പുരുഷന്മാരെക്കൂടി മോചിപ്പിച്ചിരുന്നു.

“ബാക്കിയുണ്ടായിരുന്ന നാല് പുരുഷന്മാർ കൂടി 2026 ജൂൺ 30-ന് സ്വാതന്ത്ര്യം വീണ്ടെടുത്തതിൽ ഞങ്ങൾ ദൈവത്തോട് നന്ദി പറയുന്നു. അവർ സുരക്ഷിതമായി തിരിച്ചെത്തിയതിൽ ഞങ്ങൾ സന്തോഷിക്കുമ്പോഴും, ജീവനോടെ മടങ്ങിവരാൻ കഴിയാത്തവരുടെ ദാരുണമായ നഷ്ടം ഞങ്ങളുടെ ഹൃദയങ്ങളെ ദുഃഖത്തിലാഴ്ത്തുന്നു,” ഫാദർ ഇമ്മാനുവൽ പറഞ്ഞു.