മനുഷ്യത്വത്തിന്റെ 'കേരള സ്റ്റോറി'; മെട്രോ തൂണിൽ നിന്ന് പൂച്ചക്കുട്ടിയെ രക്ഷിച്ച ആവേശം ലോകത്തിന് മാതൃക
 

കൊച്ചി: വിഭജനത്തിന്റെയും വിദ്വേഷത്തിന്റെയും വാർത്തകൾക്കിടയിൽ, ഒരു നിസ്സാര ജീവനെ രക്ഷിക്കാൻ ഒരു നാട് മുഴുവൻ കൈകോർക്കുന്ന മനോഹരമായ കാഴ്ചയ്ക്കാണ് കൊച്ചി സാക്ഷ്യം വഹിച്ചത്. കലൂർ സ്റ്റേഡിയത്തിന് സമീപമുള്ള 556-ാം നമ്പർ മെട്രോ തൂണിന് മുകളിൽ ഒരാഴ്ചയായി കുടുങ്ങിക്കിടന്ന പൂച്ചയെ അതിസാഹസികമായി രക്ഷിച്ച ദൗത്യം കേരളത്തിന്റെ യഥാർത്ഥ ഐക്യവിളംബരമായി മാറി.

ഒരാഴ്ച മുൻപാണ് ഓട്ടോറിക്ഷാ തൊഴിലാളികൾ മെട്രോ തൂണിന് മുകളിൽ പൂച്ച കുടുങ്ങിയത് ശ്രദ്ധിക്കുന്നത്. തുടർന്ന് നടന്ന രക്ഷാപ്രവർത്തനം അത്യന്തം നാടകീയമായിരുന്നു. മാൻ ലിഫ്റ്റർ ഉപയോഗിച്ച് സമീപമെത്തിയെങ്കിലും ഭയന്ന പൂച്ച ഓടിമാറി. ലിഫ്റ്റ് തകരാറിലായതും സജീവമായ മെട്രോ സർവീസുകളും ദൗത്യത്തിന് വലിയ തടസ്സമായി.

മെട്രോ സർവീസുകൾ അവസാനിച്ച ശേഷം വൈദ്യുതി ബന്ധം പൂർണ്ണമായി വിച്ഛേദിച്ചാണ് രാത്രിയിൽ ദൗത്യം പുനരാരംഭിച്ചത്. അഗ്നിരക്ഷാ സേനയും എസ്.പി.സി.എ. (SPCA) പ്രവർത്തകരും നടത്തിയ കഠിനശ്രമത്തിനൊടുവിൽ പുലർച്ചെയോടെ പൂച്ചയെ സുരക്ഷിതമായി താഴെയിറക്കി ആശുപത്രിയിലേക്ക് മാറ്റി.

രക്ഷാപ്രവർത്തനത്തിന്റെ ലൈവ് സംപ്രേക്ഷണം ആയിരക്കണക്കിന് ആളുകളാണ് ശ്വാസമടക്കിപ്പിടിച്ച് കണ്ടുകൊണ്ടിരുന്നത്. ഗുണാ കേവിന്റെ ആഴങ്ങളിൽ നിന്ന് കൂട്ടുകാരെ ജീവിതത്തിലേക്ക് പിടിച്ചുയർത്തിയ 'മഞ്ഞുമ്മൽ ബോയ്‌സ്' സിനിമയിലെ സുഭാഷിന്റെ പേരാണ് നാട്ടുകാർ ഈ പൂച്ചയ്ക്കും നൽകിയത്. ഉയരങ്ങളിൽ നിന്ന് സുരക്ഷിതമായി മടങ്ങിയെത്തിയ പൂച്ച ഇപ്പോൾ കൊച്ചിക്കാരുടെ പ്രിയപ്പെട്ട 'സുഭാഷ്' ആണ്.

ജാതിയുടെയോ മതത്തിന്റെയോ വേർതിരിവുകളില്ലാതെ, ഓരോ ജീവനും ഒരുപോലെ വിലപ്പെട്ടതാണെന്ന് കരുതുന്ന കേരളീയ സംസ്കാരത്തിന്റെ അടയാളമായാണ് ഈ സംഭവം വിലയിരുത്തപ്പെടുന്നത്. പ്രളയകാലത്ത് നാം കാത്തുസൂക്ഷിച്ച അതേ സഹോദര്യത്തിന്റെ തുടർച്ചയാണ് ഈ കൊച്ചു ജീവന്റെ രക്ഷയ്ക്കായി കൈകോർത്തതിലൂടെ ലോകം കണ്ടത്. ശ്രീനാരായണ ഗുരുവിന്റെയും അയ്യങ്കാളിയുടെയും ദർശനങ്ങൾ നെഞ്ചേറ്റുന്ന ഈ മണ്ണിൽ മനുഷ്യത്വം തന്നെയാണ് ഏറ്റവും വലിയ കരുത്ത്.