കേരാഫെഡ് വെളിച്ചെണ്ണ സപ്ലൈകോ വഴി സബ്‌സിഡി നിരക്കില്‍ വില കുറച്ചു നല്‍കും:മന്ത്രി ജി ആര്‍ അനില്‍
ഓണത്തിന് 'കേരാഫെഡ്' വെളിച്ചെണ്ണ സപ്ലൈകോ വഴി സബ്‌സിഡി നിരക്കില്‍ വില കുറച്ചു നല്‍കുമെന്ന് ഭക്ഷ്യ മന്ത്രി ജി ആര്‍ അനില്‍. വെളിച്ചെണ്ണ വിലവര്‍ധനവുമായി ബന്ധപ്പെട്ട് കൃഷിമന്ത്രിയും താനും രണ്ടു വകുപ്പിലെ ഉദ്യോഗസ്ഥരും തമ്മില്‍ ചര്‍ച്ച നടത്തി.
അതില്‍ത്തന്നെ കേരാഫെഡിന്റെ ഉത്പന്നങ്ങള്‍ വിലകുറച്ച് നല്‍കാനാവുമോ എന്നതില്‍ ചര്‍ച്ച നടന്നു. ചര്‍ച്ചയില്‍ അനുകൂലമായ നിലപാടാണ് ഉണ്ടായത്. ഡയറക്ടര്‍ ബോര്‍ഡുമായി ആലോചിച്ച് എത്രത്തോളം വിലകുറച്ച് നല്‍കാന്‍ കഴിയുമെന്ന് അറിയിക്കും.
അങ്ങനെ കിട്ടുന്നതിന്റെ കൂടെ സബ്‌സിഡി വില കൂടി കുറച്ച് നല്‍കാനാണ് ആലോചിക്കുന്നത്. എന്തായാലും കേരാഫെഡ് ഉത്പ്പന്നം സപ്ലൈകോ വഴി വിലകുറച്ചു നല്‍കുമെന്ന് മന്ത്രി വ്യക്തമാക്കി.
സപ്ലൈകോ വഴി തൊട്ടടുത്ത ദിവസം മുതല്‍ വിതരണം ചെയ്യാന്‍ കഴിയുന്ന രീതിയിലാണ് നിര്‍ദേശം വെച്ചത് പതിനഞ്ചാം തീയതിയോടുകൂടി വീണ്ടുമൊരു ഘട്ടത്തില്‍ കൂടി വില കുറയ്ക്കാനുള്ള ശ്രമം നടത്തുമെന്നും അദ്ദേഹം പറഞ്ഞു.