കരുനാഗപ്പള്ളിയില് വധശ്രമക്കേസ് പ്രതിയെ പിടികൂടാനെത്തിയ ഡിവൈഎസ്പി സ്ക്വാഡിന് നേരെ ആക്രമണം, നേരിയ പരിക്ക്, 4 പേര് അറസ്റ്റില്, കൃത്യനിര്വഹണം തടസ്സപ്പെടുത്തിയത് ഉള്പ്പെടെയുള്ള വകുപ്പുകള് ചുമത്തി
കരുനാഗപ്പള്ളി: കൊല്ലത്ത് വധശ്രമക്കേസിലെ പ്രതിയെ പിടികൂടാനെത്തിയ പോലീസ് സംഘത്തിന് നേരെ ക്രൂരമായ ആക്രമണം. ഡിവൈഎസ്പി സ്ക്വാഡിലെ എസ്.ഐ. ജിനുവിന് ആക്രമണത്തില് സാരമായി പരിക്കേറ്റു. സെപ്റ്റംബര് 19 ശനിയാഴ്ച രാത്രിയുണ്ടായ സംഭവവുമായി ബന്ധപ്പെട്ട് പ്രതി ജെറിന്, ഒപ്പമുണ്ടായിരുന്ന രേഷ്മ, രമ്യ, ഹര്ഷ എന്നീ മൂന്ന് യുവതികള് ഉള്പ്പെടെ നാലുപേരെ പോലീസ് അറസ്റ്റ് ചെയ്തു.
വധശ്രമക്കേസ് പ്രതിയായ ജെറിന് കരുനാഗപ്പള്ളിയിലെ വീട്ടിലുണ്ടെന്ന രഹസ്യവിവരത്തിന്റെ അടിസ്ഥാനത്തിലാണ് പോലീസ് സംഘം സ്ഥലത്തെത്തിയത്. പോലീസ് ആണെന്ന് വ്യക്തമാക്കിയിട്ടും വീട്ടിലുണ്ടായിരുന്ന സംഘം പോലീസുകാരെ ആക്രമിക്കുകയായിരുന്നു. എസ്.ഐ. ജിനുവിനെ ചുടുകട്ട കൊണ്ട് തലയ്ക്കടിച്ച സംഘത്തിലെ സ്ത്രീകള് പോലീസുകാരെ മര്ദ്ദിക്കുകയും കടിക്കുകയും ചെയ്തു. തുടര്ന്ന് കൂടുതല് പോലീസുകാരെത്തിയാണ് നാലുപേരെയും ബലപ്രയോഗത്തിലൂടെ കീഴടക്കിയത്. കൃത്യനിര്വഹണം തടസ്സപ്പെടുത്തിയത് ഉള്പ്പെടെയുള്ള വകുപ്പുകള് ചുമത്തി പ്രതികളെ റിമാന്ഡ് ചെയ്തു.