കളമശേരി മാര്‍ത്തോമ്മ ഭവന ആക്രമണം: സര്‍ക്കാര്‍ അടിയന്തരമായി ഇടപെടണമെന്ന് ആര്‍ച്ച് ബിഷപ്പ് മാര്‍ ജോസഫ് പാംപ്ലാനി
കൊച്ചി: കളമശേരി മാര്‍ത്തോമ്മാ ഭവനത്തിനു നേരേ നടന്ന അതിക്രമങ്ങളില്‍ സര്‍ക്കാര്‍ അടിയന്തരമായി ഇടപെടണമെന്ന് എറണാകുളം-അങ്കമാലി അതിരൂപത മെത്രാപ്പോലീത്തന്‍ വികാരി ആര്‍ച്ച് ബിഷപ്പ് മാര്‍ ജോസഫ് പാംപ്ലാനി.
നാലു പതിറ്റാണ്ടിലധികമായി മാര്‍ത്തോമ്മാ ഭവനത്തിന്റെ കൈവശമുള്ള ഭൂമിയില്‍ നടന്ന അതിക്രമങ്ങളും കൈയേറ്റവും അപലപനീയവും നിയമ വ്യവസ്ഥിതിക്കേറ്റ മുറിവുമാണ്.
ഇവിടെയുള്ള വൈദികര്‍ക്കും സന്യാസിനിമാര്‍ക്കും സുരക്ഷയും നീതിയും ഉറപ്പാക്കണം.
രോഗികളുള്‍പ്പെടെയുള്ള സന്യാസിനിമാര്‍ താമസിക്കുന്ന മഠത്തിലേക്കുള്ള വഴി തട ഞ്ഞ് സഞ്ചാരസ്വാതന്ത്ര്യം നിഷേധിച്ചിരിക്കുന്നത് ഒരു തരത്തിലും നീതീകരിക്കാനാ കില്ല.
കോടതിവിധിയെ മറികടന്ന് ആസൂത്രിതമായാണു രാത്രിയില്‍ ഇവിടെ അക്രമവും ഭീഷണിപ്പെടുത്തലും കൈയേറ്റവും ഉണ്ടായത്.
നിയമ സംവിധാനങ്ങള്‍ക്കും സമൂഹത്തിലെ സൗഹാര്‍ദ അന്തരീക്ഷത്തിനും ഭീഷണി ഉയര്‍ത്തുന്ന അക്രമികളെ നിയന്ത്രിക്കാനും നീതി ഉറപ്പാക്കാനും സര്‍ക്കാര്‍ ശ്രദ്ധിക്കണമെന്ന് മാര്‍ പാംപ്ലാനി ആവശ്യപ്പെട്ടു.
അതിക്രമങ്ങള്‍ നടന്ന മാര്‍ത്തോമ്മാ ഭവന ത്തില്‍ മാര്‍ പാംബ്ലാനി ഇന്നലെ സന്ദര്‍ശനം നടത്തി.
ഇവിടത്തെ വൈദികര്‍ക്കും സന്യാസിനിമാര്‍ക്കും സഭയുടെ പൂര്‍ണ പിന്തുണയുണ്ടെന്നും അദ്ദേഹം വ്യക്തമാക്കി.
അതിരൂപതാ പ്രൊക്യുറേറ്റര്‍ ഫാ. തോമസ് വൈക്കത്തുപറമ്പിലും ആര്‍ച്ച്ബിഷപ്പിനൊപ്പം ഉണ്ടായിരുന്നു. നേരത്തേ ബിഷപ്പ് മാര്‍ തോമസ് ചക്യത്ത്, യൂഹാനോന്‍ മാര്‍ പോളികാര്‍പ്പോസ് മെത്രാപ്പോലീത്ത തുടങ്ങിവരും മാര്‍ത്തോമ്മാ ഭവനം സന്ദര്‍ശിച്ചു പിന്തുണ അറിയിച്ചിരുന്നു.