മാറാന്‍ സമയമായി, ബാക്ക് ബെഞ്ചേഴ്സ് സങ്കല്‍പ്പം ഒഴിവാക്കും,യുഷേപ്പിലേക്ക് മാറ്റാന്‍ ആലോചന; വിദ്യാഭ്യാസ വകുപ്പ്
തിരുവനന്തപുരം:കേരളത്തിലെ വിദ്യാഭ്യാസ മേഖലയില്‍ സമൂലമായ മാറ്റങ്ങള്‍ക്ക് ഒരുങ്ങി വിദ്യാഭ്യാസ വകുപ്പ്. വിദ്യാര്‍ത്ഥികളുടെ പഠനരീതി, ക്ലാസ് മുറികളിലെ അന്തരീക്ഷം, മൊബൈല്‍ ഫോണ്‍ ഉപയോഗം തുടങ്ങിയ വിഷയങ്ങളില്‍ പുതിയ പരിഷ്‌കാരങ്ങള്‍ കൊണ്ടുവരുമെന്ന് വിദ്യാഭ്യാസ മന്ത്രി വി. ശിവന്‍കുട്ടി അറിയിച്ചു.
ക്ലാസ് മുറികളിലെ പരമ്പരാഗതമായ ഇരിപ്പിട രീതി മാറ്റുന്നതിനെക്കുറിച്ചാണ് ഒരു പ്രധാന നിര്‍ദ്ദേശം. നിരയായി അടുക്കിയിടുന്ന ബെഞ്ചുകള്‍ക്ക് പകരം, ക്ലാസുകള്‍ 'യൂ' ഷേപ്പിലേക്ക് മാറ്റാന്‍ സര്‍ക്കാര്‍ ആലോചിക്കുന്നു. 'ബാക്ക് ബെഞ്ചേഴ്സ്' എന്ന സങ്കല്‍പം പലപ്പോഴും വിദ്യാര്‍ത്ഥികളുടെ ആത്മവിശ്വാസത്തെയും പഠനത്തെയും പ്രതികൂലമായി ബാധിക്കുന്നതായി മന്ത്രി ചൂണ്ടിക്കാട്ടി. പിന്‍ബെഞ്ചിലിരിക്കുന്ന വിദ്യാര്‍ത്ഥികള്‍ക്ക് അധ്യാപകരുമായി നേരിട്ട് സംവദിക്കാനുള്ള അവസരം കുറവായിരിക്കും.
പുതിയ 'യൂ' ഷേപ്പ് സംവിധാനം എല്ലാ വിദ്യാര്‍ത്ഥികളെയും ക്ലാസ് ചര്‍ച്ചകളില്‍ സജീവമായി പങ്കെടുക്കാന്‍ പ്രേരിപ്പിക്കും. ഇത് വിദ്യാര്‍ത്ഥികളും അധ്യാപകരും തമ്മിലുള്ള ആശയവിനിമയം മെച്ചപ്പെടുത്താനും, കൂടുതല്‍ ഊര്‍ജ്ജസ്വലമായ ഒരു പഠനാന്തരീക്ഷം സൃഷ്ടിക്കാനും സഹായിക്കും. എല്ലാ വിദ്യാര്‍ത്ഥികള്‍ക്കും തുല്യമായ പരിഗണന ലഭിക്കുന്നുണ്ടെന്ന് ഉറപ്പാക്കാനും ഈ മാറ്റം സഹായകമാകും. വിദഗ്ദ്ധ സമിതിയുടെ റിപ്പോര്‍ട്ടിന് ശേഷം ഈ വിഷയത്തില്‍ സര്‍ക്കാര്‍ അന്തിമ തീരുമാനമെടുക്കും.
ക്ലാസ് മുറികളിലെ മാറ്റങ്ങള്‍ക്കൊപ്പം, വിദ്യാര്‍ത്ഥികളുടെ മൊബൈല്‍ ഫോണ്‍ ഉപയോഗം സംബന്ധിച്ചും സര്‍ക്കാര്‍ ഗൗരവമായി ചിന്തിക്കുന്നുണ്ട്. സ്‌കൂളുകളില്‍ കുട്ടികളുടെ മൊബൈല്‍ ഫോണ്‍ ഉപയോഗം നിയന്ത്രിക്കുന്നത് സംബന്ധിച്ച് വിപുലമായ ഒരു ചര്‍ച്ച നടത്തേണ്ടത് ആവശ്യമാണെന്ന് മന്ത്രി പറഞ്ഞു.
മൊബൈല്‍ ഫോണ്‍ ലഭിക്കാത്തതിന്റെ പേരില്‍ കുട്ടികളില്‍ ആത്മഹത്യാ പ്രവണത വര്‍ധിക്കുന്നുണ്ടെന്ന് മന്ത്രി ചൂണ്ടിക്കാട്ടി. കുട്ടികളുടെ ആത്മഹത്യകളില്‍ ഏകദേശം 50 ശതമാനവും മൊബൈല്‍ ഫോണ്‍ ലഭിക്കാത്തതുമായി ബന്ധപ്പെട്ടതാണെന്ന് അദ്ദേഹം വ്യക്തമാക്കി. ഈ വിഷയത്തിന്റെ ഗൗരവം കണക്കിലെടുത്ത്, കുട്ടികളുടെ മാനസികാരോഗ്യത്തെയും പഠനത്തെയും സംരക്ഷിക്കുന്ന തരത്തിലുള്ള ഒരു നയം രൂപീകരിക്കാന്‍ സമൂഹത്തിന്റെ എല്ലാ കോണുകളില്‍ നിന്നും അഭിപ്രായങ്ങള്‍ തേടേണ്ടത് അത്യാവശ്യമാണെന്നും മന്ത്രി കൂട്ടിച്ചേര്‍ത്തു.
ഈ പുതിയ പരിഷ്‌കാരങ്ങളിലൂടെ, കൂടുതല്‍ ആധുനികവും, വിദ്യാര്‍ത്ഥി സൗഹൃദപരവുമായ ഒരു വിദ്യാഭ്യാസ അന്തരീക്ഷം സൃഷ്ടിക്കാനാണ് വിദ്യാഭ്യാസ വകുപ്പ് ശ്രമിക്കുന്നത്. ഈ മാറ്റങ്ങള്‍ ലക്ഷ്യമിട്ടുള്ള സര്‍ക്കാര്‍ തീരുമാനത്തിന് പിന്നില്‍ 2024-ല്‍ പുറത്തിറങ്ങിയ 'സ്ഥാനാര്‍ഥി ശ്രീക്കുട്ടന്‍' എന്ന സിനിമയുടെ സ്വാധീനമുണ്ടെന്ന് തന്നെ പറയാം. വിനേഷ് വിശ്വന്ത് സംവിധാനം ചെയ്ത ചിത്രം പരമ്പരാഗതമായ ക്ലാസ് മുറി പഠനരീതികളെയും, 'ബാക്ക് ബെഞ്ചേഴ്സ്' എന്ന സങ്കല്‍പ്പത്തെയും ചോദ്യം ചെയ്തിരുന്നു. സിനിമയുടെ ക്ലൈമാക്‌സില്‍ ക്ലാസ് മുറികള്‍ 'യൂ' ഷേപ്പിലേക്ക് മാറ്റുന്ന ആശയം വലിയ ചര്‍ച്ചകള്‍ക്ക് വഴിയൊരുക്കി. ഇപ്പോള്‍ കേരള സര്‍ക്കാരും ഈ ആശയത്തെ ഏറ്റെടുക്കാന്‍ ഒരുങ്ങുകയാണ്.