അയർലണ്ടിന്റെ തൊഴിൽ വിപണി ശക്തമാണെന്ന് സി എസ് ഒ റിപ്പോർട്ട്

ഡബ്ലിൻ: അയർലണ്ടിൽ തൊഴിലില്ലാത്തവരുടെ എണ്ണം വീണ്ടും കുറഞ്ഞു. ഓഗസ്റ്റിൽ തൊഴിലില്ലായ്മ നിരക്ക് മുൻ മാസത്തെ അപേക്ഷിച്ച് 4.7% ആയി കുറഞ്ഞെന്ന് സി എസ് ഒ റിപ്പോർട്ട് വെളിപ്പെടുത്തുന്നു. കഴിഞ്ഞ വർഷത്തെ ഓഗസ്റ്റി(4.1%)നെ അപേക്ഷിച്ച് തൊഴിലില്ലായ്‌മ നിരക്ക് അൽപ്പം കൂടുതലാണെങ്കിലും ആഗോള താരിഫ് അനിശ്ചിതത്വത്തിനിടയിലും തൊഴിൽ വിപണിയിലെ നല്ല മാറ്റം ഏറെ സ്വാഗതം ചെയ്യപ്പെടുന്നു.

ഓഗസ്റ്റിൽ പുരുഷന്മാരുടെ തൊഴിലില്ലായ്‌മ നിരക്ക് 4.9% ആയിരുന്നു. ജൂലൈയിലെ 5%ൽ നിന്നാണ് കുറഞ്ഞത്. കഴിഞ്ഞ വർഷം ഓഗസ്റ്റിലേതിനേക്കാൾ 4%മാണ്. സ്ത്രീകളുടെ തൊഴിലില്ലായ്മ‌ നിരക്ക് ജൂലൈയിൽ 4.7% ൽ നിന്ന് 4.5% ആയി കുറഞ്ഞു. 2024 ഓഗസ്റ്റിൽ 4.3%മായിരുന്നു ഇത്.അതേസമയം, യുവാക്കളുടെ തൊഴിലില്ലായ്‌മ നിരക്ക് ഓഗസ്റ്റിൽ 11.9%മായി കുറഞ്ഞു. ജൂലൈയിൽ ഇത് 12.1%മായിരുന്നു.

ജൂലൈയിൽ 1,42,200 ആയിരുന്ന തൊഴിലില്ലാത്തവരുടെ എണ്ണം ഓഗസ്റ്റിൽ 1,38,200 ആയി ഉയർന്നു. കഴിഞ്ഞ വർഷത്തെ ഇതേ കാലയളവിനെ അപേക്ഷിച്ച് 19,600 പേരുടെ വർദ്ധനവാണിതെന്ന് സിഎസ്ഒ പറയുന്നു.അയർലണ്ടിലെ തൊഴിൽ രംഗത്തെ വളർച്ച ഇപ്പോഴും ശക്തമാണെന്നാണ് സി എസ് ഒ കണക്കുകൾ പറയുന്നതെന്ന് വിദഗ്ദ്‌ധർ പറയുന്നു.

2025ലെ രണ്ടാം പാദത്തിൽ ഒരു വർഷം മുമ്പുള്ളതിനേക്കാൾ 63,900 പേർക്ക് കൂടി തൊഴിൽ ലഭിച്ചുവെന്ന് കണക്കുകൾ സാക്ഷ്യപ്പെടുത്തുന്നു. തൊഴിലില്ലായ്മ നിരക്ക് ഇയു ശരാശരിയേക്കാൾ താഴെയാണെന്ന മെച്ചവുമുണ്ട്.