അയര്ലണ്ട് സീറോ മലബാര് സഭയുടെ പ്രഥമ ദേശീയ ബൈബിള് കലോത്സവം ഏപ്രില് 25-ന് താലായില്
ഡബ്ലിന്: അയര്ലണ്ടിലെ സീറോ മലബാര് സമൂഹത്തിന്റെ ആഭിമുഖ്യത്തില് പ്രഥമ നാഷണല് ബൈബിള് കലോത്സവം 25-ന് താലായില് നടക്കും.
ഡബ്ലിന് റീജിയന് ആതിഥേയത്വം വഹിക്കുന്ന വിശ്വാസ കലാമാമാങ്കം താലയിലെ സെന്റ് മാര്ക്ക് സ്കൂളിലാണ് അരങ്ങേറുന്നത്. രാവിലെ ഒമ്പതിന് മത്സരങ്ങള് ആരംഭിക്കും.
അയര്ലണ്ടിലെ നാല് റീജിയണുകളില് നടന്ന പ്രാഥമിക മത്സരങ്ങളില് വിജയിച്ച് ഫൈനല് റൗണ്ടിലേക്ക് തിരഞ്ഞെടുക്കപ്പെട്ടവരാണ് മത്സരങ്ങളില് പങ്കെടുക്കേണ്ടത്. വിവിധ പ്രായക്കാര്ക്കുള്ള ഏഴ് വിഭാഗങ്ങളിലായി 17 മത്സര ഇനങ്ങളാണ് ക്രമീകരിച്ചിരിക്കുന്നത്.
വിശ്വാസവും ബൈബിള് അറിവും കലാപരമായ കഴിവുകളുമായി സംയോജിപ്പിച്ച്, മുതിര്ന്നവര്ക്കും, യുവജനങ്ങള്ക്കും കുട്ടികള്ക്കും അവരുടെ കഴിവുകള് പ്രകടിപ്പിക്കാന് വേദിയൊരുക്കുകയാണ് ഈ കലോത്സവം.
ബൈബിള് അധിഷ്ഠിതമായ മൂല്യങ്ങള് ജീവിതത്തില് കൂടുതല് ഉറപ്പിക്കാന് സഹായിക്കുന്നതിനൊപ്പം, സമൂഹത്തില് ആത്മീയ ഐക്യം വളര്ത്തുന്നതിനും ഈ കലോത്സവം നിര്ണായക പങ്ക് വഹിക്കുമെന്ന് സംഘാടകര് പ്രതീക്ഷിക്കുന്നു.
നാഷണല് പാസ്റ്ററല് കൗണ്സില്, കാറ്റിക്കിസം ഡിപ്പാര്ട്ട്മെന്റ്, ഡബ്ലിന് റീജിയണല് കൗണ്സില്, താല കുര്ബാന സെന്റര് എന്നിവയുടെ നേതൃത്വത്തില് വിവിധ കമ്മിറ്റികള് കലോത്സവത്തിന്റെ വിജയത്തിനായി പ്രവര്ത്തിച്ചു വരുന്നു.