ലക്ഷം അടുക്കളത്തോട്ടങ്ങൾ എന്ന ലക്ഷ്യത്തിലേക്ക് ഇൻഫാം. പദ്ധതിയിലേക്ക് തെരഞ്ഞെടുക്കപ്പെട്ടത് 25,000 കുടുംബങ്ങൾ. ഇന്നു മുതൽ പച്ചക്കറി വിത്തുകൾ നട്ടുതുടങ്ങുമെന്ന് ദേശീയ ചെയർമാൻ ഫാ. തോമസ് മറ്റമുണ്ടയിൽ
പാറത്തോട്: അടുത്ത അഞ്ചു വർഷത്തിനുള്ളിൽ ഒരു ലക്ഷം കർഷക കുടുംബങ്ങളിൽ അടുക്കളത്തോട്ടങ്ങൾ നിർമ്മിക്കുകയെന്ന വൻ പദ്ധതിയുമായി ഇൻഫാം.
ഇൻഫാമിന്റെ പഞ്ചവത്സര പദ്ധതിയുടെ ഭാഗമായി നടപ്പിലാക്കുന്ന സംരംഭത്തിന്റെ ഒന്നാം ഘട്ടത്തിലേക്ക് 25,000 കുടുംബങ്ങളെയാണ് തെരഞ്ഞെടുത്തിട്ടുള്ളത്.
പരിസ്ഥിതി ദിനത്തോടനുബന്ധിച്ച് തുടക്കം കുറിച്ച 'വിത്തുകൊട്ട' എന്ന പ്രോഗ്രാമിലൂടെ, ഇതുവരെ നാലു കോടിയിലധികം പച്ചക്കറി വിത്തുകൾ തെരഞ്ഞെടുക്കപ്പെട്ട 25,000 കുടുംബങ്ങളിലേക്ക് എത്തിച്ചുകഴിഞ്ഞു.
സംസ്ഥാന കർഷകദിനാചരണത്തോടൊപ്പം ഈ അടുക്കളത്തോട്ട പദ്ധതിയുടെ ഉദ്ഘാടനവും കൃഷിവകുപ്പ് മന്ത്രി ടി. സിദ്ദിഖ് നിർവ്വഹിച്ചു.
കൃഷിമന്ത്രി പദ്ധതിക്ക് തുടക്കം കുറിച്ചതോടെ, ഇൻഫാം കർഷക കുടുംബങ്ങളിൽ ഇന്നു മുതൽ പച്ചക്കറി വിത്തുകൾ നട്ടു തുടങ്ങുമെന്ന് ഇൻഫാം ദേശീയ ചെയർമാൻ ഫാ. തോമസ് മറ്റമുണ്ടയിൽ അറിയിച്ചു.
വീടുകളിൽ വിഷരഹിത പച്ചക്കറികൾ ഉത്പാദിപ്പിക്കുന്നതിനും ഹരിതാഭമായ പരിസ്ഥിതി സൃഷ്ടിക്കുന്നതിനും സഹായിക്കുന്ന ഈ പദ്ധതി കർഷക കുടുംബങ്ങളിൽ വലിയ ആവേശമാണ് ഉണ്ടാക്കിയിരിക്കുന്നത്.
