ചെറുകിട നാമമാത്ര കർഷകര് എന്നത് ബലഹീനതയായി മാറുന്ന കാലഘട്ടത്തെ സംഘടിതമായ മുന്നേറ്റം കൊണ്ട് അതിജീവിക്കലാണ് കെസിബിസിയുടെ നേതൃത്വത്തിൽ ഇൻഫാം നടത്തുന്നതെന്ന് ദേശീയ ചെയർമാൻ ഫാ. തോമസ് മറ്റമുണ്ടയിൽ
പാറത്തോട്: കർഷകർക്ക് തനിയെ ചെയ്യാൻ പറ്റാത്ത കാര്യങ്ങള് കൂട്ടായ ഏകോപനത്തിലൂടെ നടപ്പിൽ വരുത്താനാണ് ഇൻഫാം ശ്രമിക്കുന്നതെന്ന് ദേശീയ ചെയർമാൻ ഫാ. തോമസ് മറ്റമുണ്ടയിൽ. ഇൻഫാം മാവേലിക്കര കാർഷികജില്ല അസംബ്ലി പാറത്തോടുള്ള ഇൻഫാം കേന്ദ്ര ഓഫീസിൽ ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.
ഇൻഫാം കർഷകന്റെ ഉന്നതി ലക്ഷ്യം വെച്ചാണ് പ്രവർത്തിക്കുന്നത്. ചെറുകിട നാമമാത്ര കർഷകരായിരിക്കുന്നു എന്നത് കാർഷിക മേഖലയിലുള്ള കര്ഷകരില് വലിയൊരു വിഭാഗത്തിന്റെ ബലഹീനതയായി മാറുന്ന കാലഘട്ടമാണിത്. സംഘടിതമായ മുന്നേറ്റം കൊണ്ട് അതിനെ ബലപ്പെടുത്താനാണ് കെസിബിസിയുടെ നേതൃത്വത്തിൽ ഇൻഫാം ശ്രമിക്കുന്നത്.
അതിന്റെ ഫലമായിട്ടാണ് കാർഷിക ഗ്രാമം മുതൽ ദേശീയ തലം വരെയുള്ള അസംബ്ലികൾ നടത്തുകയും, അസംബ്ലികളുടെ അടിസ്ഥാനത്തിൽ വിവിധങ്ങളായ പദ്ധതികൾ ആവിഷ്കരിക്കുകയും ചെയ്യുന്നത്. ദേശീയ തലത്തിലും സംസ്ഥാന തലത്തിലും പഞ്ചവത്സര പദ്ധതികൾ പ്രഖ്യാപിച്ചു നടപ്പിലാക്കി വരികയാണ്.
ഇതോടൊപ്പം, കാർഷിക ജില്ലകളുടെയും താലൂക്കുകളുടെയും അടിസ്ഥാനത്തിൽ അതത് പ്രദേശങ്ങൾക്ക് യോജിച്ച, അതത് പ്രദേശങ്ങളിലെ കർഷകരെ സഹായിക്കാൻ പറ്റുന്ന, അവരുടെ കൃഷി വികസിപ്പിക്കാൻ പറ്റുന്ന, അവരുടെ മണ്ണ് പരിപോഷിപ്പിക്കാൻ പറ്റുന്ന പദ്ധതികൾ ഗ്രാമതലം മുതൽ ആവിഷ്കരിച്ചെടുക്കാനുള്ള നടപടികൾ വിവിധ കാർഷിക ജില്ലകളുടെ നേതൃത്വത്തിൽ നടപ്പാക്കണമെന്നും ഫാ. തോമസ് മറ്റമുണ്ടയിൽ പറഞ്ഞു.
മാവേലിക്കര കാർഷികജില്ല വിവിധ ഗ്രാമങ്ങളിലായി 1500-ൽ പരം കർഷക കുടുംബങ്ങളെ അണിചേർത്തുകൊണ്ട് മുന്നേറുകയാണ്. ആറു കാർഷിക താലൂക്കുകൾ രൂപീകരിക്കുന്നതിൽ ഇതിനോടകം സാധിച്ചു. വിവിധ കാർഷിക ഗ്രാമങ്ങൾ രൂപപ്പെടുത്താനുള്ള ശ്രദ്ധേയമായ മുന്നേറ്റം നടത്തി. രണ്ട് വർഷത്തിനുള്ളിലാണ് ഈ മികച്ച നേട്ടം അവർ കൈവരിച്ചത്.
വരും വർഷങ്ങളിലും ഈ മുന്നേറ്റം തുടരുന്നതിനും, പ്രാദേശിക പദ്ധതികൾ ആവിഷ്കരിച്ച് അതത് തലങ്ങളിലുള്ള എക്സിക്യൂട്ടീവിന്റെ നേതൃത്വത്തിൽ കർഷക ക്ഷേമത്തിനായി നടപ്പിൽ വരുത്തുന്നതിനും ഇൻഫാം പരിശ്രമിക്കുന്നത് സ്ലാഘനീയമായ കാര്യമാണ്.
പ്രവർത്തനങ്ങൾക്കു നേതൃത്വം നൽകുന്ന കാർഷിക ജില്ലയുടെ രക്ഷാധികാരി ബിഷപ്പ് ഡോ. മാത്യൂസ് മാര് പോളികാര്പ്പസ് പിതാവിനെയും , കാർഷിക ജില്ലാ ഡയറക്ടർ ഫാ. തോമസ് ചെറുപുഷ്പത്തെയും, ജില്ലാ ജോയിന്റ് ഡയറക്ടർ ഫാ. ഫിലിപ്പ് ജന്മത്തുകളത്തിനെയും, വിവിധ ഭാരവാഹികളെയും പ്രത്യേകം അഭിനന്ദിക്കുന്നുവെന്നും ദേശീയ ചെയർമാൻ പറഞ്ഞു.
മാവേലിക്കര കാർഷികജില്ലയിലെ മാവേലിക്കര, പുത്തൂർ, ചെങ്ങന്നൂർ, കറ്റാനം, കടന്പനാട്, കൊല്ലം കാർഷിക താലൂക്കുകളിലെ പ്രവർത്തന റിപ്പോർട്ടുകൾ അസംബ്ലിയിൽ അവതരിപ്പിച്ചു.
കാർഷികജില്ല ഡയറക്ടർ ഫാ. തോമസ് ചെറുപുഷ്പം, പുത്തൂർ കാർഷിക താലൂക്ക് ഡയറക്ടർ ഫാ. ഗീവർഗീസ് ചെരുവിള, മാവേലിക്കര കാർഷിക താലൂക്ക് ഡയറക്ടർ ഫാ. കുര്യാക്കോസ് തിരുവാലിൽ, കറ്റാനം കാർഷിക താലൂക്ക് ഡയറക്ടർ ഫാ. ജെയ്ൻ തെങ്ങുവിള, കാർഷികജില്ല പ്രസിഡന്റ് സഞ്ജീവ് മാരൂർ, സെക്രട്ടറി സ്റ്റീഫൻ തോമസ്, ദേശീയ ട്രഷറർ ജെയ്സൺ ജോസഫ് ചെംബ്ലായിൽ, ദേശീയ എക്സിക്യൂട്ടീവ് അംഗം നെൽവിൻ സി. ജോയി, ഇൻഫാം സംസ്ഥാന എക്സിക്യൂട്ടീവ് അംഗം റെജി രാജു എന്നിവർ പ്രസംഗിച്ചു.