ഇന്ത്യയുടെ ഓപ്പറേഷൻ സിന്ദൂർ വൻ വിജയം, പാക് സൈന്യം സത്യം മറച്ചുവെച്ചെന്ന് ഇമ്രാൻ ഖാന്റെ സഹോദരി നൗറീൻ നിയാസി

ഇസ്ലാമാബാദ്: പാകിസ്ഥാനെതിരായ ഇന്ത്യയുടെ 'ഓപ്പറേഷൻ സിന്ദൂർ' ദൗത്യം വൻ വിജയമായിരുന്നെന്ന് പാക് മുൻ പ്രധാനമന്ത്രി ഇമ്രാൻ ഖാന്റെ സഹോദരി നൗറീൻ നിയാസി. ഓപ്പറേഷനിലെ ഇന്ത്യയുടെ വിജയം മറച്ചുവെക്കാൻ പാകിസ്ഥാൻ സൈന്യം വ്യാജകഥകൾ കെട്ടിച്ചമയ്ക്കുകയാണെന്നും അവർ വെളിപ്പെടുത്തി. ഒരു അഭിമുഖത്തിലാണ് നൗറീൻ നിയാസിയുടെ വിവാദ വെളിപ്പെടുത്തൽ.

പാകിസ്ഥാൻ ജനറൽമാരും സൈനിക നേതൃത്വവും പൊതുജനങ്ങൾക്ക് മുന്നിൽ അവതരിപ്പിച്ചത് പോലെയല്ല നാലുദിവസം നീണ്ടുനിന്ന ഇന്ത്യ-പാക് സംഘർഷത്തിന്റെ യഥാർത്ഥ ചിത്രമെന്ന് അവർ വ്യക്തമാക്കി. ഇന്ത്യ നടത്തിയ ഓപ്പറേഷൻ സിന്ദൂർ വൻ വിജയമായിരുന്നുവെന്നും, എന്നാൽ പാകിസ്ഥാൻ സൈന്യം അത് പൂർണ്ണമായി മറച്ചുവെക്കാൻ ശ്രമിക്കുകയായിരുന്നുവെന്നും നൗറീൻ നിയാസി ആരോപിച്ചു.

സംഘർഷം കൂടുതൽ വഷളാകാതിരിക്കാൻ അന്നത്തെ യു.എസ് പ്രസിഡന്റ് ഡൊണാൾഡ് ട്രംപ് ഇടപെടൽ നടത്തിയെന്നും അവർ പറഞ്ഞു. ഈ ഇടപെടലാണ് കൂടുതൽ നാണംകെടാതെ സംഘർഷത്തിൽനിന്ന് പിന്മാറാൻ പാക് സൈന്യത്തെ സഹായിച്ചതെന്നും, അതുവഴി ട്രംപ് പാക് സൈന്യത്തിന്റെ മുഖം രക്ഷിക്കുകയാണുണ്ടായതെന്നും അവർ കൂട്ടിച്ചേർത്തു.

അതേസമയം, നൗറീൻ നിയാസിയുടെ ഈ പ്രസ്താവന പാകിസ്ഥാനിൽ വലിയ രാഷ്ട്രീയ വിവാദങ്ങൾക്ക് തിരികൊളുത്തിയിട്ടുണ്ട്. അഭിമുഖം പുറത്തുവന്നതിന് പിന്നാലെ പാകിസ്ഥാനിലെ നാഷണൽ സൈബർ ക്രൈം ഇൻവെസ്റ്റിഗേഷൻ ഏജൻസി (NCCIA) ഇവർക്ക് സമൻസ് അയച്ചു. പാക് സർക്കാരിനെയും സൈന്യത്തെയും സാമൂഹിക മാധ്യമങ്ങളിലൂടെ അപകീർത്തിപ്പെടുത്തിയെന്ന് ആരോപിച്ചാണ് ഏജൻസി നോട്ടീസ് നൽകിയിരിക്കുന്നത്. കൂടാതെ ഭരണകക്ഷിയായ പി.എം.എൽ.എൻ (PML-N) ഉൾപ്പെടെയുള്ള പാർട്ടികളും നൗറീൻ നിയാസിക്കെതിരെ ശക്തമായ പ്രതിഷേധവുമായി രംഗത്തെത്തിയിട്ടുണ്ട്.