ട്രെയിനുകള്ക്ക് നേരെ കല്ലെറിഞ്ഞാല് ഇനി പണി കിട്ടും
ന്യൂഡല്ഹി: ട്രെയിനുകള്ക്ക് നേരെയുള്ള കല്ലേറ് വ്യാപകമായതിനെ തുടര്ന്ന് സ്ഥിരയാത്രക്കാരുടെയും റെയില്വേ സുരക്ഷാസേനയുടെയും സംയുക്ത സഹകരണത്തോടെ റെയില്വേ കൂടുതല് കരുതല് നടപടികള് സ്വീകരിച്ചു.
റെയില്വേ ട്രാക്കിന് സമീപം സാമൂഹ്യ വിരുദ്ധ സാന്നിധ്യം ശ്രദ്ധയില്പ്പെട്ടാല് ട്രാക്കിന് സമീപമുള്ള പോസ്റ്റുകള്, സൈന് ബോര്ഡുകളിലെ നമ്പറുകള് റെയില്വേ പോലീസിന് കൈമാറാന് യാത്രക്കാര്ക്ക് നിര്ദേശം നല്കി.
കല്ലേറ് പോലുള്ള അനിഷ്ട സംഭവം ഉണ്ടാകുമ്പോള് കൃത്യമായ സ്ഥലം കണ്ടെത്താന് കഴിയാതെ വരുന്നതാണ് പലപ്പോഴും പ്രതികളെ കണ്ടെത്താന് കാലതാമസം നേരിടുന്നത്.
ട്രാക്കിന് സമീപം ഓരോ നൂറുമീറ്റര് അകലത്തിലും വെള്ളയില് കറുപ്പ് അക്ഷരത്തില് കൃത്യമായി ദൂരം അടയാളപ്പെടുത്തിയ കുറ്റികള് സ്ഥാപിച്ചിട്ടുണ്ട്.
ഈ അക്കങ്ങള് കൃത്യമായി സ്ഥലം കണ്ടെത്താന് പോലീസിനെ സഹായിക്കും. അതുകൊണ്ട് യാത്രയില് സംശയാസ്പദമായത് എന്തെങ്കിലും ശ്രദ്ധയില്പ്പെട്ടാല് കുറ്റിയില് അടയാളപ്പെടുത്തിയ ഈ നമ്പറുകള് ശ്രദ്ധിക്കണമെന്നും സുരക്ഷാസേനയ്ക്ക് കൈമാറണമെന്നാണ് യാത്രക്കാര്ക്ക് നിര്ദേശം നല്കിയിരിക്കുന്നത്.
കുട്ടികള് ട്രാക്കില് നാണയവും മെറ്റല് കഷ്ണങ്ങളും വെയ്ക്കുന്നതായി പലയിടത്തും റിപ്പോര്ട്ട് ചെയ്തിട്ടുണ്ട്.
അതുമൂലം ഉണ്ടാകുന്ന ഗൗരവകരമായ അനന്തരഫലങ്ങളെക്കുറിച്ച് വീടുകളിലും സ്കൂളുകളിലും ബോധവല്ക്കരണം നടത്തണമെന്നും റെയില്വേ പോലീസ് അഭ്യര്ത്ഥിച്ചു.
റെയില്വേ ഭൂമിയില് അതിക്രമിച്ച് കടക്കുന്നതും, ട്രാക്കിലും പരിസരത്തും ലഹരിപദാര്ത്ഥങ്ങളുടെ ഉപയോഗവും, പൊതുമുതല് നശിപ്പിക്കുന്നതും രാജ്യദ്രോഹകുറ്റമായാണ് കണക്കാക്കുന്നത്. ട്രാക്കിലൂടെയുള്ള പരിശോധനകള് ശക്തമാക്കിയിട്ടുണ്ട്. യാത്രക്കാരുടെ പരിപൂര്ണ പിന്തുണയും ആര്പിഎഫ് തേടിയിട്ടുണ്ട്.
പതിവായി കല്ലേറ് റിപ്പോര്ട്ട് ചെയ്യുന്ന കൊല്ലം പെരിനാട് സെക്ഷനില് ട്രാക്കിന് സമീപം സംശയം തോന്നുന്ന വിധം കുട്ടികളെയോ മറ്റ് സാമൂഹ്യ വിരുദ്ധരുടെയോ സാന്നിധ്യം ശ്രദ്ധയില്പ്പെട്ടാല് സൈന് ബോര്ഡുകള് ശ്രദ്ധിക്കണമെന്നും അതിലൂടെ അവരെ നിയമത്തിന് മുന്നില് കൊണ്ടുവരാനും അനിഷ്ട സംഭവങ്ങള്ക്കെതിരെ പ്രതിരോധം കടുപ്പിക്കാനും സാധിക്കുമെന്ന വിശ്വാസത്തിലാണ് ആര് പി എഫും യാത്രക്കാരും.
16605 തിരുവനന്തപുരം ഏറനാട്, 12075 ജനശതാബ്ദി, 66315 കോട്ടയം കൊല്ലം മെമു, നാഗര്കോവില് കോട്ടയം എക്സ്പ്രസ്സ്, ഗുരുവായൂര് ഇന്റര്സിറ്റി, മധുര ഗുരുവായൂര് ട്രെയിനുകളില് പതിവായി ഈ സെക്ഷനില് കല്ലേറ് റിപ്പോര്ട്ട് ചെയ്തിട്ടുണ്ടെന്നും കര്ശന നടപടികളുമായി മുന്നോട്ട് പോകുമെന്നും റെയില്വേ അറിയിച്ചു.
ജാഗ്രത പുലര്ത്തുന്നതിനോടൊപ്പം സാമൂഹ്യ വിരുദ്ധശല്യം പൂര്ണ്ണമായും ഒഴിവാക്കുന്നതിന് ആര് പി എഫ് ഹെല്പ് ലൈന് നമ്പറില് വിവരങ്ങള് കൈമാറണമെന്നും യാത്രക്കാരോട് റെയില്വേ അഭ്യര്ത്ഥിച്ചു.